Major Consejo
El Major Consejo (in latin Consilium Sapientis, Consejo dei Saji) el gera el màsimo òrgano połìtego de ła Repùblica de Venesia e el se conglomerava inte na càmara fata postatamente inte el Pałaso Dogal.
A sto cua ghe pervegniva ła nòmina del doxe (el proséder de ełesion el gera dabon conplicada e el prevedéva sirca diéxe pasagi de ełesion e sortegi) e de tuti i altri consegi e numeroxe magistraùre, co poderi iłimitai e sovrani su cualsevoja custion. Ła partecipasion al Major Consejo ła gera un derito ereditàrio e privativa de łe fameje patrisie iscrite inte el Libro d'Oro de ła nobiltà venesiana.
Istoria
canbiaOrìxene
canbiaUn primo Consilium Sapientis forse ghe gera xà da ténpo come consejo personal del Doxe. Anpò, a partir dal 1143 un nóvo Consilium el xe stà creà come raprexentansa duraùra del rengo popołar, fiancando el doxe inte el governo. L'ato el dava el via al'aseto in forma comunal del Stato, co ła nasesta del Commune Veneciarum ("Comun de Venesia").
Gnanca na trenténa de ani daspò, inte el 1172, el Consilium el vegniva trasformà in asenblea sovrana col nome de Major Consejo, ai inisi conposto de trentasincue e in sèguito da 100 consegièri, ai cuai ghe xe xontai de raxon, a partir dal 1178, cuełi che i partegniva al nóvo organismo de ła Cuarantia. Dal 1207 i consegièri, daspò, i no xe stai più nominai dretamente dal'asenblea popołar, ma da tre ełetóri sièlti da sta cua, daspò xónti a sete inte el 1230.
Ła Serada del Major Consejo
canbiaPar savèrghene de pì, vardarse ła voxe Serada del Major Consejo. |
Proposte de trasformasion de ła partecipasion al consejo in derito ereditario o par siàlta sóa del consejo stéso xà łe gera stae più volte prexentae e respénte soto i dogadi de Xuane Dandolo, inte el 1286, e Piero Gradenigo, inte el 1296.
Ma oramai ła voja de łe fameje aristocràteghe e del stéso doxe Gradenigo de segurarse co major stabiłità e continuità ła partecipasion al governo de ła Repùblica, oramai masa forte, ła ga portà el 28 de fevrèr 1297 a ła Serada del Major Consejo: sto provedimento el verxeva de derito el Major Consejo a tuti cuei che i ghe gavése xà fato parte inte i cuatro ani prima[1] e, ogni ano, a cuaranta sortexai intrà i sói desendénti. Ła reforma ła levava ogni lìmite a cuełi che i partesipava al Consejo.[2]
L'intrada de nóvi partesipanti el xe stà limitada co lexe del 1307 e del 1316; el 19 de lujo 1315 ła xe stada ordenada ła creasion del Libro d'Oro inte el cual iscrìver, co se faxeva disdoto ani, i nomi de cuanti che i gavarìa avesto el derito de intrar al Major Consejo.
Inte el 1319 i ga fato ła stréta final. I xe ndai vanti a dar n'ociada ténta a ła vałidità dei tìtołi dei iscriti inte el Libro d'Oro, daspò i ga levà ła posibiłità de sèłier nóvi partesipanti del Consejo, stabiłéndo che l'automàtega intrada al Major Consejo par tuti i patrisi mas-ci co i faxeva vintisincue ani, col'ecesion par trénta de łóri, sortexai ogni ano inte el xórno de Santa Bàrbara, de intrarghe già co i faxeva péna vinti ani: el Major Consejo el deventava a ła fin n'asenblea serada e ereditaria.
Inte el 1423 el Major Consejo el ełiminava anca el rengo popołar, che no'l serviva più a gnénte.
Dal Sincuexento a ła caxesta de ła Repùblica
canbiaInte el 1498 i xe stai tegnudi fora dal Major Consejo i cèreghi e infrà el 1506 e el 1526 i xe stai istituidi i registri di nasùe e nose par fasiłitar l'asertar del derito de intrada al corpo de ła nobiltà.
L'efeto de łe dispoxision de ła Serada el gaveva fato créser tanto el nùmero dei partesipanti, cusì da rivar a contare inte el Cincuexento fin a 2095 patrisi co derito a sentar inte el Pałaso Dogal: łe segure dificoltà de gestion de un sìmiłe òrgano e ła mancansa de sełesion su łe vere capasità de cuanti che i ghe intrava par derito, i ga portà a demandar łe più midiate funsion de governo a òrgani menóri, più snełi e sełesionai, in particołar al Consejo dei Pregadi, anca se ła sovranità del Major Consejo e el só derito de ùltima paroła su cualsevoja materia i restava cuełi.
In alguni rari caxi, vanti a gravi ris-ci o dificoltà econòmeghe, l'intrada inte el Major Consejo ła gera permésa a nóve fameje, a che łe gaveva parò da far grande donasion al Stato: el xe stà el caxo de ła guera de Cióxa e de ła guera de Candia, có, par sostegnir łe grande spexe de guera, łe xe stae amése łe fameje che più łe gaveva sostegnuo economegamente el sforso de łe batage.
Altra particołarità el xe el crearse, inte el ténpo, de na divixion drénto a ła nobiltà infrà cueła rica, overosia łe fameje che łe gera stae bone inte el ténpo a mantegnir guałivo o a far créser łe só capasità econòmeghe, e cue ła pòvara (cuełi che i vegniva ciamai Barnaboti), de cuanti che i gaveva, inte un ténpo łóngo o curto, exaurìo łe só richese, ma i ndava vanti a mantegnir el derito ereditario a sentar inte el Major Consejo. Sta roba ła portava spéso łe dó parte de ła nobiltà a scontrarse in consejo e ła verxeva ła posibiłità a fenòmeni de tràfego dei voti.
El xe stà el Major Consejo, el 12 de majo 1797, a decretar ła fin de ła Repùblica de Venesia, sełiéndo - vanti al'invaxion de Napoleon - di asetar l'adicasion del'ùltimo doxe Lodovico Manin e de desfar l'asenblea aristocràtega: seben ghe fuse ła mancansa del domandà nùmero legal de 600 partesipanti, el consejo el ga votà a grandìsima majoransa (512 voti a favor, 30 contrari, 5 astegnui) ła fin de ła Serenìsima e el trasferimento dei poderi a un indefinìo goerno provixorio.
Notasion
canbia- ↑ Frederic C. Lane, Storia di Venexia, Edixioni Einaudi, 1978, Torino, pag.133: "stabiłéndo che tuti cuełi che i ghe partesipava, o eło gaveva fato inte i ùltimi cuatro ani, i saria ndai vanti da łora in pò a farghe parte se laudai co almanco dódexe voti dal Consejo de ła Cuarantia."
- ↑ Frederic C. Lane, Storia di Venexia, Edixioni Einaudi, 1978, Torino, pag.133: "Ła reforma [...] ła ga provedesto cavando ogni lìmite a łe dimension del conséjo stéso."
Altri projeti
canbiaWikimedia Commons el detien imàjini o altri file so Mazor Consegio
Linganbi foresti
canbia- maggior consiglio, in Disionàrio de istòria, Istituto de ła Ençiclopedia Italiana, 2010.
- (EN) Great CouncilEnçiclopedia Britannica, Encyclopædia Britannica, Inc.