Sipayisse : Diferince etur modêyes

Les Spayisses (sipahi e turk, li no vént do farsi سپاهی, sepâhi, sôdård), c' esteut des sôdårds d' elite a tchvå dins l' Impire Otoman.

Pus tård, cwand les Francès ont-st abroké so l' Aldjereye et l' Marok, il ont-st amonté des unités d' cavalreye des tropes coloniåles, eyet les lomer eto Spayisses.

Sipayisses do tins des Otomans

On spayisse do tins des Otomans; graveure so bwès di 1576.

Les Spayisses, c' esteut des sôdårds a tchvå di l' Impire Otoman, avou on statut ene miete come li ci des tchvalîs e l' Urope del moyinådje.

Il avént des fîs (lomés timar), dinés direk på Zultan. Po redîmer, i dvént aler sôdårds tchaeke côp k' el Zultan elzî dmandéve.

Les Spayisses ont stî dandjreus metous so pîs do tins da Mehmed II.

C' esteut l' pus grande des shijh divizions di cavalreye; eyet li corespondant a tchvå des Djanissåres (ki, zels, si batént-st a pî). I siervént ossu di wåde a tchvå do Sultan, eyet, e tins d' påye, i rascodént les taeyes.

Li boket d' tere li pus ptit d' on Spayisse, c' esteut l' timar, ki lyi dneut on rivnou so èn an di 10.000 akçe (prononcîz aktché), çou k' esteut adon di deus a cwate côps dpus ki çou k' on professeur wangnive.

On ziamet, lu, dinéve disk' a 100.000 akçe, et c' esteut po les Spayisses k' estént des oficîs.

On hass dinéve des rivnous di pus d' 100.000 akçe, et c' esteut seulmint po les pus hôts gradés.

On Spayisse avou on timar diveut ahessî l' årmêye di onk a cénk sôdårds. Li ci k' aveut-st on ziamet disk' a vint sôdårds, eyet l' ci avou on hass bén pus d' vint sôdårds.

Po dire li vraiy, mågré leus priviledjes, bråmint des Spayisses estént des esclåves ki l' Sultan end esteut l' mwaisse. Il estént prins sorlon li sistinme do devşirme (prins tot djonnes, po-z esse etrinnés po divni sôdårds ou hôt fonccionaires di l' Impire); di cisse manire li Sultant esteut seur k' i n' si revintrént nén.

A pårti del mitan do 16inme sieke, les Djanissåres ont cmincî a-z esse les pus impôrtants dins l' årmêye, mins les Spayisses ont tot l' minme wårdé ene fele plaece dins l' economeye eyet l' politike di l' Impire. Viè l' 17inme sieke, les Spayisses estént, avou leus frés innmis les Djanissåres, les vraiys mwaisses moenneus d' l' Impire Otoman.

Cwand, å 19inme sieke, les sultans ont vlou modiernijhî l' årmêye, c' est co les Spayisses k' ont språtchî l' dierin riventaedje des Djanissåres, e 1826.

Mins mågré ça, deus anêyes après, li sultan Mahmud II fijheut avou les Spayisses çou k' il aveut fwait avou Djanissåres deus ans pus timpe. I les dismobilijha et anixhiler leus droets.

Sipayisses dins l' årmêye francesse

Dins l' årmêye coloniåle francesse, les Spayisses (Spahi e francès, sbâhi en arabe), c' esteut des unités di cavalreye avou tos marokins, aldjeryins ou tunizyins, egadjîs eyet scolés låvå.

Les Spayisses poirtént ene sipêye ataetcheye al sele di leus tchvås.

Il ont stî metous so pîs pol prumî côp e 1840, å moumint di l' abrocaedje del France so l' Aldjereye. Dabôrd, motoit bén ki les prumîs, c' esteut des Spayisses di l' impire otoman k' ont candjî d' mwaisse, et wårder l' no.

Il ont combatou so tote li concwesse di l' Aldjereye, li guere Franco-Prûssyinne, l' abrocaedje sol Marok, li prumire eyet l' deujhinme gueres daegnreces.

Do tins del deujhinme guere daegnrece, bråmint des redjimints di Spayisses estént motorijhîs, mins sacwants estént co a tchvå, el Nôr di l' Afrike.

Al fén del guere d' indepindince aldjeryinne (1962) tos les redjimints di Spayisses såf onk ont stî disbindés.

Li prumî redjimint modiene di Spayisses ki dmeure co, c' est ene unité blindêye k' a prins pårt al guere siconte di l' Irak e 1990-1991.

Foirt lontins, les Spayisses aldjeryins et tunizyins ont poirté des unifômes avou ene rodje djakete avou deus noers brozdaedjes, on turban, des bleuwès marnes eyet on blanc burnousse, rodje sol dizeu, dismetant k' les Marokins avént on blanc burnousse, bleu foncé sol dizeu.

Les Spayisses el Walonreye et a Sdan

Li 10 di may 1940, on vénrdi, les Almands moussént el Beldjike. Do côp, les Francès ont fwait avancî leus tropes k' estént rashonnêyes åd dilong del frontire.

Etur Sidan et Charleville, li frontire ere tinowe pa deus redjimints di Spayisses marokins, montés so leus ptits tchvås. Li vénrdi tote li vesprêye, on-z a veu passer ces sôdårds la ki ndalént a l' Ess, so Sint-Houbert, po rascontrer les Almands. Mins cwè årént i polou fé avou des ptits tchvås conte des tanks?

Li semdi 11 di may, il avént l' ôre di rintrer e France. On ls a don veu rpasser, å mitan des civils ki s' såvént, zels, peu d' esse martirijhîs come e 1914, tins del guere 1914-1918.

I passéve a tot bout d' tchamp des ptits avions almands ki mitrayént les sôdårds on pô pattavå.

Li prumî a-z esse touwé, ç' a stî dins li dischinte di Pwès e vnant des Libins. On monumint Li Marokin est todi la, li long del voye.

Li semdi al nute il estént tos rvoyes. I n' è dmoréve pus onk sol payis cwand les Almands ont arivé l' dimegne å matén.

Çou k' on n' sepa k' bén pus tård, c' est kel mierkidi 15 di may, i n' dimoréve pus rén d' tos ces sôdårds la. Il avént rpassé Mouze li dimegne et li mårdi, i tnént on ptit viyaedje dirî Sdan, k' on lome: "La Horgne".

On lzî aveut dné l' ôre di s' baricåder dins l' viyaedje et ås alintoûs et di tot fé po-z arester les tanks ki les porshuvént. Il ont si bén fwait leu dvwer, k' i s' ont fwait touwer tertos, minme les deus colonels ki comandént les redjimints.

Li viyaedje del Horgne a divnou on muzêye al glwere des Spayisses. Po-z onorer leu memwere, tos les ans, å moes d' may, ene toitche est aloumêye å Bork et des djonnes coreus a pî si passèt l' blame d' onk a l' ôte djusk' al Horgne, e rfijhant li voye ki les Spayisse avént fwait e 1940.