კოპენჰაგენიშ უნივერსიტეტი
კოპენჰაგენიშ უნივერსიტეტი დან. Københavns Universitet | |
ლათ.: Universitas Hafniensis | |
დევიზი | Coelestem adspicit lucem (ლათ.) |
---|---|
დირსხუ | 1479 |
ტიპი | ოჯარალე |
ფონდეფი | $ 1.338 მლრდ. (2018) |
წორომახანდე | 5,286 (აკადემიური) |
რექტორი | ჰენრიკ ვეგენერი |
სტუდენტი | 37,493 (2019) |
ორენი | |
კამპუსი | ურბანული (94.2 ჰა) |
საიტი | www.ku.dk |
კოპენჰაგენიშ უნივერსიტეტი (დან. Københavns Universitet, აბრ. KU) — ოჯარალე უნივერსიტეტი დანიას, ნოღა კოპენჰაგენს. უნივერსიტეტიქ დირსხუ 1479 წანას დანიაშ მაფა კრისტიან I-შ ინიციატივათ. კოპენჰაგენიშ უნივერსიტეტი სიჯვეშათ მაჟია რე სკანდინავიას უფსალაშ უნივერსიტეტიშ უკული დო თინა ევროპაშ ართ-ართი რეიტინგული დო პრესტიჟული უნივერსიტეტი რე.
დორსხუაფაშ უკულ მავითობრუო ოშწანურაშახ, კოპენჰაგენიშ უნივერსიტეტი უმოსო რდჷ თეოლოგიური ინსტიტუცია. მავითობრუო დო მავითოჩხორო ოშწანურეფს უნივერსიტიქ სეკულარულო გინირთჷ, მენცარობაქ თეოლოგია დოთირუ დო თარი დისციპლინეფო მენცარობაშ შხვადოშხვა დარგეფქ გინირთჷ.
კოპენჰაგენიშ უნივერსიტეტი იკათუანს 6 ფაკულტეტის დო 4 კამპუსის. უნივერსიტეტი ადმინისტრირენს 36 შხვადოშხვა დეპარტამენტის დო 122 რკვიებეფიშ ცენტრის. უნივერსიტეტის უღჷ მუში მუზეუმი დო ბოტანიკური ბაღი. ომენცარე ინსტიტუტეფი, ნამუეფსით უნივერსიტეტი ადმინისტრირენს, იდვალუაფჷ კოპენჰაგენს, ჟირი რკვიებეფიშ ცენტრი გრენლანდიას იდვალუაფჷ.
კოპენჰაგენიშ უნივერსიტეტიშ ჯოხონობაშ რე შხვადოშხვა ომენცარე თეორიეფი დო ტრადიციეფი. კვანტური მექანიკაშ კოპენჰაგენიშ ინტერპრეტაციაქ დირსხუ უნივერსიტეტიშ ნილს ბორიშ ინსტიტუტის. კოპენჰაგენიშ უნივერსიტეტიშ პოლიტილოგიაშ ფაკულტეტის აკიქიმინჷ უშქურანჯობაშ რკვიებეფიშ კოპენჰაგენიშ სკოლაქ. შხვა ჸარაფეფი ნამუეფქჷთ უნივერსიტეტის დირსხუ რე: კოპენჰაგენიშ თეოლოგიაშ სკოლა დო კოპენჰაგენს ლინგვისტიკაშ სკოლა.
2022 წანაშ ღურთუთაშ მუნაჩემეფით კოპენჰაგენიშ უნივერსიტეტიშ კურსნათებუეფი დო უნივერსიტეტიწკჷმა აფილირებულეფი რდეს: ნობელიშ პრემიაშ 9 ლაურეატი, ტიურინგიშ პრემიაშ 1 ლაურეატი, გოართოიანაფილი ერეფიშ გენერალური ანსამბლეაშ 1 პრეზიდენტი დო დანიაშ 24 პრემიერ-მინისტრი.
2019 წანაშ მუნაჩემეფით უნივერსიტეტის ჸუნს 37,493 სტუდენტი, 5,286 აკადემიური დო 4,119 ადმინისტრაციული პერსონალი.
კოპენჰაგენიშ უნივერსიტეტი დანიაშ დო ევროპაშ ართ-ართი რეიტინგული უნივერსიტეტი რე. 2021 წანაშ "CWTS Leiden Ranking"-იშ რეიტინგეფს, კოპენჰაგენიშ უნივერსიტეტის უკინებჷ მაართა აბანი დანიას, მაართა პოზიცია კონტინენტურ ევროპას დო მაანთხა პოზიცია ევროპაშ კონტინენტის დო 27-ა პოზიცია მოსოფელიშ მასშტაბით. 2021 წანაშ "Academic Ranking of World Universities"-იშ რეიტინგეფს კოპენჰაგენიშ უნივერსიტეტის უკინებჷ მაართა პოზიცია სკანდინავიას, მაშკვითა ევროპას დო ეჩდომავითა მოსოფელს. "QS World University Rankings"-იშ 2021 წანაშ რეიტინგეფს კოპენჰაგენიშ უნივერსიტეტი 76-ა რე მოსოფელიშ მასშტაბით.