婉曲
閱讀設定
婉曲(粵拼:jyun2 kuk1;英文:euphemism),又叫委婉、婉轉,即係指唔直接噉用啲準確嘅詞句表達原意,而係用啲相關嘅詞句,間接噉烘托、流露或者暗示原意嘅一種表達手法。婉曲通常係用啲冇攻擊性嘅字詞,嚟代替有冒犯性或者會令人反感嘅字詞。
婉曲亦係種修辭手法,可以分四類:曲折、微辭、吞吐、含蓄。
類別
曲折
曲折即係,用表面上意思同原意唔一樣嘅詞句,刁鑽噉講出簡單啲嘅原意。讀者可以自己歸納出最簡單嘅原意而不失原意。
例子:
- 「假如醫藥廣告所說的話,完全可以兌現,現有的疾病,實不足以危害人類。」孫如陵《墨趣集》
- 粵化:「假如醫藥廣告所講嘅嘢,完全可以兌現,現有嘅疾病,實在唔足以危害人類。」
- ── 刁鑽噉講醫藥廣告信唔過。
微辭
微辭即係,將苛刻嘅話,用啲相關嘅詞句表達出嚟,當中有諷刺同埋不滿嘅意味,要靠讀者自己靠前文後理意會。
例子:
- 「炸死了你,我的故事就該完了。炸死了我,你的故事還長著呢。」張愛玲《傾城之戀》
- 粵化:「炸死咗你,我嘅故事就應該完喇。炸死咗我,你嘅故事仲有好長呀。」
- ── 諷刺男主角用情不專,攻擊男主角嘅人格。
吞吐
吞吐即係,講到重點嗰陣,講又唔講,要靠讀者自己靠前文後理,想像再填充冇講到嘅重點。
例子:
- 「陽光從褐色雲裏斜著過來,幻成一種異樣的紫色,透明似的,不可逼視,剎那間在我迷眩了的視覺中,這草田變成了……,不說也罷,說來你們也是不信的!」徐志摩《我所知道的康橋》
- 粵化:「陽光由啡雲裏斜住過嚟,幻化成一種異樣嘅紫色,好似透明噉,唔可以逼視,剎那間喺我迷眩咗嘅視覺當中,呢塊草田變咗……,唔講都罷,講咗你哋都唔會信嘅!」
- 「胡琴咿咿呀呀的拉着,在萬盞燈火的夜晚,拉過來又拉過去,說不盡的蒼涼的故事──不問也罷!」張愛玲《傾城之戀》
- 粵化:「胡琴咿咿呀呀噉拉住,喺萬盞燈火嘅夜晚,拉過嚟又拉過去,講唔盡嘅蒼涼故事──唔問都罷!」
含蓄
含蓄即係,用同原意差唔多,但係比原意具體啲、仔細啲、形象化啲嘅詞句,講出原意。讀者可以自己歸納出最簡單直接嘅意思,但係噉做會損失原意嘅細節。
例子:
- 「賽因河的柔波裏掩映着羅浮宮的倩影,它也收藏着不少失意人最後的呼吸。」徐志摩《巴黎的鱗爪》
- 「我並沒有失去我的故鄉,當年離家時,我把那塊根生土長的地方藏在瞳孔裏,走到天涯,帶來天涯。」王鼎鈞《瞳孔裏的古城》
- 粵化:「我並冇失去我嘅故鄉,當年離家嗰時,我將嗰塊根生土長嘅地方收埋喺瞳孔裏邊,走到天涯,帶嚟天涯。」
- ── 收埋喺瞳孔裏邊即係記住。