Stefan Louw: Verskil tussen weergawes

Ds. Gerrit Stefanus (Stefan) Louw (Pretoria 4 Maart 1972 tot Johannesburg 15 September 2006) was predikant in die Nederduitse Gereformeerde Kerk tot hy in sy huis in die Johannesburgse voorstad Melville vermoor is terwyl hy leraar van die plaaslike NG gemeente was.

Louw was die tweede van vyf kinders en word in 'n baie Christelike huis groot. Sy pa was as sendeling by die Dorothea-sending betrokke. Vroeg in sy lewe het sy ouers na die destydse Suidwes-Afrika verhuis en gaan hy skool op Walvisbaai en matrikuleer in 1990 aan die Hoërskool Academia in Windhoek. Hy gaan aan die Kweekskool op Stellenbosch studeer waar hy uitblink in sy studies en hy word in 1999 gelegitimeer. Vanweë 'n tekort aan beroepe dien hy eers as jeugwerker in die gemeente Sonstraal in die Wes-Kaap.

In 2004 word hy uiteindelik in Sonstraal as leraar bevestig. Die gemeente sien sy besondere gawes reeds raak terwyl hy hoofsaaklik met die jeug besig bly. Ook in 2004 beroep Melville (ná die insluiting van Aucklandpark) hom. Hier het hy gou gelief geword. Sy huldeblyk in die NG Jaarboek 2007 lui: "Mense van daardie omgewing (ook dié wat by die kunste betrokke was) het groot waardering vir die aard van sy spiritualiteit gehad. Hy het inderdaad goed by hierdie gemeente ingepas. Stefan was lief vir taal en woorde."

Hy het verder in die Wysbegeerte studeer, wat, saam met sy liefde vir taal, meegebring het dat hy baie skerp kon redeneer en sy sieninge met groot welsprekendheid kon formuleer. Hy was ongetwyfeld besig om te ontwikkel tot 'n toekomstige leier in die breë NG Kerk.

Op 15 September 2006 breek rowers by sy huis in Melville in en hulle skiet hom koelbloedig in sy bors. Voor sy dood kon hy nog sy vrou bel en vertel wat gebeur het. Die huldeblyk lui verder: "Dit is tragies dat die NG Kerk iemand soos Stefan Louw op so 'n vroeë ouderdom en op so 'n sinnelose manier moes verloor. Die hoë misdaadsyfer in ons land het ongelukkig ook in hierdie geval, sy tol geëis. Die gemeente het egter groot meegevoel met sy vrou (Brenda – met wie hy baie gelukkig getroud was) betoon en haar mooi bygestaan." Die egpaar het nie kinders gehad nie.

Bronne

• Agenda van Hoëveldse Sinodesitting, 2007 Geargiveer 6 Maart 2016 op Wayback Machine.

Eksterne skakels

• Louw neem standpunt in oor homoseksualiteit.
• News24 se berig oor sy dood, van Sapa Geargiveer 3 Oktober 2018 op Wayback Machine.
• Rapport oor begrafnis.
• Berig in Rapport^{[dooie skakel]}.
• Kletskerk-bespreking met foto van Louw.