Catharina Parr
Catharina Parr | |
---|---|
Koningin-gemaal van Engeland en Ierland | |
Eggenoot | Hendrik VIII van Engeland |
Tydperk | 12 Julie 1543 – 28 Januarie 1547 |
Voorganger | Catharina Howard |
Huis | Huis van Tudor |
Kinders | Lady Mary Seymour |
Gebore | 1512 |
Oorlede | 5 September 1548 |
Handtekening |
Catharina Parr (1512 – 5 September 1548) was die sesde en laaste vrou van Hendrik VIII van Engeland. Sy is op 12 Julie 1543 met hom getroud. Sy was die vierde burgerlike met wie Hendrik getrou het en het hom oorleef. Sy was ook die Engelse koningin wat die meeste kere getroud was: altesaam vier keer. Haar naam word soms Katherine, Kateryn, Katheryne of Kathrine gespel.
Catharina het goed oor die weg gekom met Hendrik se drie kinders en was persoonlik betrokke by die opvoeding van Elizabeth en Edward, wat albei Engelse monarge geword het. Sy het ook ’n groot aandeel daarin gehad dat Elizabeth en haar ouer suster, Maria, hul aanspraak op die Engelse kroon teruggekry het.[1]
Catharina was van Julie tot September 1544 die regent terwyl Hendrik op ’n militêre veldtog in Frankryk was en as hy sou sterf, sou sy die regent bly totdat Edward mondig geword het. Hy het egter nie in sy testament vir haar ’n amp in die regering gelaat nie. Haar boek Gebede of Meditasies was die eerste boek wat deur ’n Engelse koningin onder haar eie naam gepubliseer is. Nog ’n boek, Die Klaagliedere van ’n Sondaar, het later verskyn.
Ses maande ná Hendrik se dood is sy met haar vierde en laaste man, sir Thomas Seymour, getroud. Sy is egter kort daarna, in September 1548, oorlede, waarskynlik weens komplikasies ná haar kind se geboorte.
Vroeë lewe
[wysig | wysig bron]Catharina was die oudste oorlewende kind van sir Thomas Parr en sy vrou, Maud Green. Die Parrs was ’n gesiene familie. Haar pa was na aan koning Hendrik en haar ma was ’n goeie vriendin van Hendrik se eerste vrou, Catharina van Aragon. Catharina is waarskynlik genoem na die koningin, wat haar peetma was.[2]
Catharina se aanvanklike opvoeding was baie soos dié van ander aanstaande vroue, maar sy het ’n passie vir studeer ontwikkel wat deur haar lewe sou voortduur. Sy kon Frans, Latyn en Italiaans vlot praat en het Spaans geleer terwyl sy koningin was. Sy het niks van handwerk gehou nie.
In 1529 is Catharina getroud met Edward Borough, die kleinseun van die 2de baron Borough. Edward was in sy twintigs en moontlik nie gesond nie. Hy is in die lente van 1533 oorlede.[2][3] In die somer van 1534 is sy getroud met John Neville, 3de baron Latymer. Op 40 was hy twee keer sou oud soos sy. Sy het egter nou ’n huis van haar eie gehad, asook ’n man met invloed en ’n titel. Sy het probeer om ’n goeie vrou vir hom te wees en het ’n deernis vir hom gehad wat tot met haar dood voortgeduur het.
Latimer het die Katolieke Kerk ondersteun en was teen die koning se egskeiding van Catharina van Aragon en sy huwelik met Anna Boleyn. In 1536 tydens ’n opstand het ’n skare by sy huis opgedaag en geëis dat hy van kant verander. Catharina het toegekyk hoe hulle haar man wegsleep. In Januarie 1537 is Catharina en haar stiefkinders self aangehou.
Teen die winter van 1542 het lord Latimer se gesondheid agteruitgegaan en op 2 Maart 1543 is hy oorlede. Catharina het haar ma se vriendskap met Catharina van Aragon gebruik om haar vriendskap met koning Hendrik se dogter Maria te hernu. Teen 16 Februarie 1543 was Catharina deel van Maria se huishouding. Dit is hier waar die koning haar gesien en gevra het om met hom te trou. Sy het sy huweliksaanbod aanvaar.
Koningin
[wysig | wysig bron]Die vroue van Hendrik VIII |
---|
Catharina is op 12 Julie 1543 met koning Hendrik getroud. Sy was die eerste Engelse koningin wat ook koningin van Ierland was nadat Hendrik die titel koning van Ierland aangeneem het. As koningin was Catharina deels verantwoordelik daarvoor dat Hendrik versoen geraak het met die dogters uit sy eerste twee huwelike, Maria en Elizabeth. Sy het ook ’n goeie verhouding met sy seun, Edward, gehad.
Hendrik is op 28 Januarie 1547 oorlede te midde van ’n godsdienstige storm om Catharina se kop. Nadat Hendrik se seun op 31 Januarie 1547 as Edward VI gekroon is, het Catharina haar uit die openbare lewe onttrek.
’n Ou liefde van haar, Thomas Seymour, 1ste baron Seymour van Sudeley, het in dié tyd weer sy verskyning in haar lewe gemaak. Hy het haar gevra om te trou en einde Mei 1547 is hulle in die geheim getroud. Koning Edward is nie van die huwelik in kennis gestel voor die somer van 1547 nie, en toe het dit ’n klein skandaal veroorsaak. Die koning en Maria was albei bitter ongelukkig oor die nuus.
In Maart 1548 het Catharina op 35-jarige ouderdom vir die eerste keer verwag. Sy het op 30 Augustus 1548 die lewe geskenk aan haar enigste kind, Maria, en is ses dae later oorlede weens komplikasies.
Verwysings
[wysig | wysig bron]Hierdie artikel is vertaal uit die Engelse Wikipedia
- ↑ Jones, Phillipa (2010). Elizabeth: Virgin Queen. New Holland Publishers Ltd. ISBN 1-84773-515-0.
- ↑ 2,0 2,1 Linda Porter. Katherine, the Queen. Macmillan. 2010.
- ↑ James, Susan E. Catherine Parr: Henry VIII's Last Love. Gloucestershire, England: The History Press, 2009. pg. 60–63.
- ↑ Boutell, Charles (1863). "A Manual of Heraldry, Historical and Popular". Londen: Winsor & Newton: 279.
{{cite journal}}
: Cite journal requires|journal=
(hulp)