Germanwings
| |||||||
Gestig | 2002 | ||||||
---|---|---|---|---|---|---|---|
Laaste vlug | 2020 | ||||||
Bedryfsbasisse | Lughawe Keulen-Bonn | ||||||
Lojaliteitsprogram | Boomerang Club Miles&More | ||||||
Vlootgrootte | 81 | ||||||
Bestemmings | Omtrent 100 in Duitsland, Europa en Noord-Afrika | ||||||
Houermaatskappy | Lufthansa Groep | ||||||
Hoofkantoor | Keulen, Duitsland | ||||||
Sleutelpersone | Jörg Beißel Michael Knitter Oliver Wagner | ||||||
Omset | 1,8 miljard € (2013) | ||||||
Werknemers | 2 073 | ||||||
Webwerf | eurowings.com |
Germanwings is 'n Duitse laekostelugredery en dogtermaatskappy van Lufthansa wat in 2002 gestig is. Die lugredery, met sy hoofkwartier in Keulen, het volgens Lufthansa se nuwe sakekonsep sedert 2012 gaandeweg alle nasionale en Europese roetes, wat nie vanaf Lufthansa se spilpunte in Frankfurt am Main en München bedien word nie, van sy moedermaatskappy oorgeneem. In 2013 het Germanwings sowat 16 miljoen passasiers vervoer. Dit was in 2015 die derde grootste Duitse lugredery volgens vlootgrootte en passasiersgetalle.
Germanwings staan sentraal in Lufthansa se pogings om in die snelgroeiende Europese laekostemark te kan meeding wat deur die Ierse lugredery Ryanair en die Britse EasyJet oorheers word. Germanwings, wat oorspronklik in 2002 as 'n dogteronderneming van Eurowings gestig is en huurvlugte aangebied het, is in 2009 deur Lufthansa oorgeneem. Aanvanklik is Germanwings se bedrywighede met opset beperk om mededinging met die moedermaatskappy te vermy. Dié beleid is later heroorweeg nadat Lufthansa deur mededinging met laekoste-lugrederye soos EasyJet, AirBerlin en TUIfly in die gesig gestaar is, en grootskaalse beleggings is in Germanwings gedoen.
Vroeg in 2013 het Germanwings steeds meer Europese kortafstandroetes namens Lufthansa bedien. In Januarie 2015 is die herstruktureringsproses, waarvolgens Germanwings die meeste van Lufthansa se verliesgewende Europese roetes oorgeneem het, afgesluit – met die uitsondering van internasionale dienste wat vanaf die lughawens in Frankfurt am Main en München aangebied word. Met sy vloot van meer as sewentig vliegtuie en 2 000 werknemers, het Germanwings in 2014 sowat 16 miljoen passasiers vervoer deur 130 Europese bestemmings te bedien.
Vakbonde het kritiek op Lufthansa se beleid gelewer en Germanwings as 'n instrument beskou waarmee die bestuur bestaande ooreenkomste oor salarisse en diensvoorwaardes vir vlieëniers en kajuitpersoneel probeer ondermyn. Die geskille het vanaf 2014 maande lank tot stakings gelei. Lufthansa het in die najaar van 2015 begin om Germanwings as handelsmerk uit te faseer en dit met Eurowings in 'n gemeenskaplike houermaatskappy saam te smelt.[1] Sedert 25 Oktober 2015 word dié maatskappy deur Eurowings GmbH bestuur wat alle kort- en langafstandvlugte onder die handelsmerk Eurowings bedryf. Germanwings is sedert 1 November 2015 'n sogenaamde Wetlease-lugredery, dit wil sê dat alle Germanwings-vliegtuie in opdrag van Eurowings deur Germanwings-personeel bedryf word.[2]
Germanwings, wat net drie prysmodelle en dienspakkette vir sy vliegkaartjies aanbied – Basic (sonder versnaperings en drankies), Smart en Best, is as een van die veiligste lugrederye beskou voordat 'n Airbus A320 op 24 Maart 2015 op pad van Barcelona in Katalonië, Spanje na Düsseldorf, Noordryn-Wesfale in die Franse Alpe teen 'n berghelling vasgevlieg het. 150 passasiers en bemanningslede is in die ramp dood.
Vlugramp van 2015
[wysig | wysig bron]Die straler het 'n misterieuse daalvlug begin kort nadat dit sy beplande kruishoogte van 38 000 voet bereik het. Die omstandighede van die ramp – daar is hoegenaamd geen noodseine ontvang nie – het volgens deskundiges aanvanklik daarop gedui dat die twee vlieëniers weens 'n drukverlies in die kajuit reeds bewusteloos was òf tevergeefs probeer het om 'n foutiewe program van die outovlieënier om te keer toe die straler met 'n snelheid van tot 740 km per uur teen 'n bergpiek gebots het. Die vliegtuig het met impak in duisende dele gebreek.[3]
Nadat kajuitopnames ontleed is, het dit aan die lig gekom dat een van die twee vlieëniers voor die ongeluk uit die kajuit gesluit was. Dié opnames toon dat een van die sitplekke teruggestoot is en die kajuit se deur oop- en toegemaak is. Daar is later 'n ligte klop aan die deur gehoor, maar daar was geen verdere gesprekke van daardie punt af tot en met die ongeluk nie. Net voor die ongeluk het dit geklink of iemand die deur probeer oopbreek.[4]
Volgens die staatsaanklaer van Marseille, Brice Robin, word die 27-jarige medevlieënier daarvan verdink dat hy die straler opsetlik en doelbewus in 'n beheerde dalingspatroon geplaas het totdat dit teen 'n bergpiek vasgevlieg het. Die motief daarvoor bly egter raaiselagtig.[5] Die passasiers was blykbaar tot die laaste oomblikke onbewus van wat in die kajuit aan die gang was.
Die polisie het die medevlieënier se woonstel in Düsseldorf vir moontlike leidrade deursoek. Eerste ondersoeke staaf die teorie van 'n ernstige sielkundige probleem.[6] Die medevlieënier was nog in Maart 2015 vir behandeling in 'n Düsseldorfse hospitaal. Hospitaalwerknemers ontken egter dat hy vir depressie behandel is, soos deur sommige van die Duitse media beweer is.[7]
Vloot
[wysig | wysig bron]In Januarie 2016 het Germanwings se vloot uit 62 vliegtuie bestaan,[8] met 'n gemiddelde ouderdom van 14 jaar:[9]
Tipe | aktief | bestel[10] | Notas | Sitplekke[11] |
---|---|---|---|---|
Airbus A319-100 | 43 | 144 / 150 | ||
Airbus A320-200 | 19 | 174 | ||
Totaal | 62 |
Verwysings
[wysig | wysig bron]- ↑ BBC News, 25 Maart 2015: Germanwings: Lufthansa's budget hope. Besoek op 25 Maart 2015
- ↑ aero.de: Eurowings se nuwe bedryfsmodel
- ↑ BBC News, 25 Maart 2015: Germanwings plane crash: Black box 'has usable data'. Besoek op 25 Maart 2015
- ↑ Vlieënier van Alpe-rampvlug ‘uitgesluit’ Geargiveer 28 Junie 2015 op Wayback Machine, PRAAG, 26 Maart 2015
- ↑ "www.netwerk24.com, 26 Maart 2015: Germanwings: Vlieënier het vliegtuig glo doelbewus laat val". Geargiveer vanaf die oorspronklike op 28 Maart 2015. Besoek op 27 Maart 2015.
- ↑ www.spiegel.de, 26 Maart 2015: Hausdurchsuchung bei Co-Pilot: Ermittler finden Hinweise auf psychische Erkrankung. Besoek op 27 Maart 2015
- ↑ www.spiegel.de: Co-Pilot des Unglücksfliegers: Heimliches Leid
- ↑ ch-aviation.com – Germanwings
- ↑ airfleets.net – Fleet age Germanwings
- ↑ "lh-taufnamen.de – Lufthansa". Geargiveer vanaf die oorspronklike op 10 April 2015. Besoek op 26 Augustus 2014.
- ↑ "germanwings.com – Technik & Flotte". Geargiveer vanaf die oorspronklike op 19 Augustus 2014. Besoek op 26 Augustus 2014.
Eksterne skakels
[wysig | wysig bron]Wikimedia Commons het meer media in die kategorie Germanwings.