Groothertog Michail Nikolajewitsj van Rusland
Hierdie naam is volgens die Oos-Slawiese gebruik; die patroniem is Nikolajewitsj en die van is Romanof.
Michail Nikolajewitsj | |
---|---|
Groothertog | |
Huis | Romanof |
Vader | Nikolaas I van Rusland |
Moeder | Prinses Charlotte van Pruise |
Gebore | 25 Oktober [O.S. 13 Oktober] 1832, Peterhof, Russiese Ryk |
Oorlede | 18 Desember [O.S. 5 Desember] 1909, Cannes, Frankryk |
Eggenote | Cecilia van Baden |
Kinders | Nikolaas, Anastasia, Michail, Georgi, Aleksander, Sergei, Aleksei |
Groothertog Michail Nikolajewitsj van Rusland (Russies: Михаи́л Никола́евич; 25 Oktober [O.S. 13 Oktober] 1832 – 18 Desember [O.S. 5 Desember] 1909) was die jongste kind van keiser Nikolaas I van Rusland en prinses Charlotte van Pruise (keiserin Aleksandra Fjodorowna), en een van die stamvaders van die takke van die Russiese keiserlike familie. Hy was ’n militêre leier, staatsman, veldmaarskalk[1] en voorsitter van die Russiese Staatsraad (1881-1905).
Biografie
wysigMichail is in Peterhof by Sint Petersburg gebore en na sy pa, Nikolaas I, se jonger broer Michail Pawlowitsj genoem.
Sy militêre loopbaan het in 1846 begin en in 1852 het hy ’n veldmaarskalk geword. Van November 1852 tot Mei 1855 was hy bevelvoerder van Wagartilleriebrigade. Hy was ook van die begin van die Krimoorlog daarby betrokke. Vir besondere diens by die Slag van Inkerman het hy die Orde van Sint Joris ontvang. Van 1855 af was hy die bevelvoerder van verskeie eenhede. Van 1862 tot 1882 was hy onderkoning van die Kaukasus, met Tbilisi as setel, en bevelvoerder van die Kaukasiese weermag.
Op 13 Maart 1881 was Michail vir tee in die Michailofski-paleis in Sint Petersburg saam met onder andere sy broer Aleksander II. Aleksander het op pad terug na die Winterpaleis in ’n sluipmoordaanval gesterf. Michael het kort ná die tweede, noodlottige ontploffing op die toneel aangekom.
Op 14 Julie 1881 is hy ook as voorsitter van die Staatsraad aangestel.
Familie
wysigIn 1857 het Michail op 25-jarige ouderdom in die huwelik getree met prinses Cecilia van Baden (later Olga Fjodorowna), die jongste dogter van groothertog Leopold van Baden. Hulle het ses seuns en ’n dogter gehad:[2]
- Nikolaas (1859-1919)
- Anastasia (1860-1922)
- Michail (1861-1929)
- Georgi (1863-1919)
- Aleksander (Sandro; 1866-1933)
- Sergei (1869-1918)
- Aleksei (1875-1895)
Van 1857 tot 1863 is ’n paleis vir die hertog en sy nuwe vrou aan die Paleisoewer in Peterhof gebou: die Nuwe Michailofski-paleis.
Dood
wysigMichael is op 18 Desember 1909 in Cannes, Frankryk, oorlede. Hy was die laaste oorlewende wettige kleinkind van Paul van Rusland.
Sien ook
wysigVerwysings
wysig- ↑ (ru) Шилов Д. Н. Государственные деятели Российской империи. — СПб., 2002. — С. 475.
- ↑ (ru) Родословная книга Всероссійскаго дворянства. // Составилъ В. Дурасов. — Ч. I. — Градъ Св. Петра, 1906.
Verdere leesstof
wysig- (ru) Струковъ, Д.П. Августѣйшій генералъ-фельдцейхмейстеръ великій князь Михаил Николаевичъ, Sint Petersburg, 1906
- (ru) Казовский, М.Г. Любить нельзя расстаться, Amarkord, 2011
Eksterne skakels
wysig- (ru) Биография на сайте «Русская императорская армия» Geargiveer 14 September 2016 op Wayback Machine
- (ru) Биография на Хроносе
- (ru) Багрянородный Великий Князь Михаил Николаевич Романов (к 173-летию со дня рождения Geargiveer 30 Desember 2011 op Wayback Machine
Wikimedia Commons het meer media in die kategorie Groothertog Michail Nikolajewitsj van Rusland.
Hierdie artikel is vertaal uit die Russiese Wikipedia