Üetlibergbaan
| Dialäkt: Glarnertüütsch |
D Üetlibergbaan isch e normalschpurigi Isebahn, wo vu de Stadt Züri uf de Üetliberg faart. Si isch siinerziit under dr Läitig vum Äschiniör Tobler buut wordä. Wäg dr ussergwöndliche Schtiigig vu 70 Promillä uhni Zaarad isch em gliiche Äschiniör au d Buuläitig für d Wädischwil-Äisidle-Baan überträit wordä. De Chaschper Wetli hät diä Buuläitig us verschidne Gründ müese-n-abgii.
D Üetlibergbaan isch am 12. Mai 1875 eröffnet wordä. Am Aafang sind chlini Dampfloggene vu dr Firma Krauss iigsetzt wordä. Äini drvoo isch a d Wädischwil-Äisidle-Baan vermiätät wordä. Ufgrund vu finanziellä Problem het mer d Sihltalbaan und d Üetlibergbaan nüd in Hauptbaanhof gfüehrt. Si händ z Züri i dr Selnau iri Ändstaziuu gchaa. Erscht mit dr Iifüehrig vu dr Zürcher S-Bahn isch das gänderet wordä.
D Üetlibergbaan het es äiges Schtromsyschtem vu 1200 Volt und bezieht ihrä Schtrom vum EW Züri. Will d Sihltalbaan, wo es Stugg wiit uf de gliiche Gläis faart, irä Schtrom mit dr Bundesbaan täilt, sind d Faarläitig und d Schtromabnämer vu dr Üetlibergbaan um 30 Santimeter uf d Siite gruggt.
Hüt isch d Üetlibergbaan ä Täil vu dr Siiltaal-Züri-Üetlibergbaan (SZU) und träit als S-Baan-Linie d Nummere Zäche.
Weblink
ändere- di offizielli Internetpräsenz vu dr SZU
- Uetlibergbahn: Mit der Bahn zum Pluto uf schweizwochen.de
- d Gschicht vu dr Üetlibergbaan uf dr Website vum Üetliberg-Verein