Jakub Žur (1876)
Jakub Žur (nimski Jacob Sauer; roź. 14. apryla 1876 w Njebjelčicach, wum. 27. februara 1969 w Konjecach) jo był serbski katolski faraŕ, redaktor a kulturny procowaŕ.
Wón jo se naroźił ako syn njebjelčańskego kubłarja a jo woglědał na gymnazium w českem Chomutovje. Wót 1892 do 1895 jo był wuknik Serbskego seminara w Praze a jo woglědał w tom casu nimski Małostronski gymnazium. Jo był cłonk Praskeje Serbowki a jo zachopił w českej stolicy studij teologije, kótaryž jo pótom w Mainzu dokóńcył. Wót 1903 do 1908 jo był kapłan w Chrósćicach a Ralbicach a wót 1908 do 1910 pśi Serbskej cerkwi w Budyšynje. Tegdy jo był teke dwě lěśe redaktor Katolskego Posoła. Wót 1910 do 1922 jo statkował ako faraŕ w Kamjeńcu a wót 1922 až do wuměńka w lěśe 1962 w Ralbicach. W mjazycasu jo był wót 1940 do 1945 dla swójogo wopěranja pśeśiwo antiserbskim póstajenjam nacionalsocialistow bźez faraŕskego městna.
Jakub Žur jo był wót 1895 cłonk Maśice Serbskeje.
Žrědło
wobźěłaś- Jurij Młynk: Žur, Jakub. W: Jan Šołta, Pětr Kunze, Franc Šěn (wud.): Nowy biografiski słownik k stawiznam a kulturje Serbow. Ludowe nakładnistwo Domowina, Budyšin 1984, b. 653