Varðin (tíðarrit)

Varðin er eitt føroyskt tíðarrit, serliga við bókmentaligum og siðsøguligum innihaldi, sum er komið nøkulunda regluliga út síðan 1921.

Varðin byrjaði sum mentanarligur felagsskapur í 1912. Í 1919 gjørdist Varðin eitt bókmentaligt felag, sum síðani 1921 hevur givið út tíðarritið Varðin. Flest allir føroyskir rithøvundar hava millum ár og dag prentað sínar tekstir í Varðanum. Mads Andreas Jacobsen var formaður í felagnum Varðin frá 1918 til 1934.

Í 2023 hevur verið útskifting í ritstjórnini á mentanarritinum. Sanna Klein og Sanna Andrassdóttir Dahl, sum hava myndað Varðan seinastu trý árini saman við Rakel Helmsdal, eru farnar úr ritstjórnini, meðan Nansý Sunadóttir og Sámal Soll eru komin í ritstjórnina.

Ritstjórar Varðans

• 1921 - 1931 Rikard Long
• 1931 - 1935 Christian Matras
• 1935 - 1943 Rikard Long
• 1944 - 1949 Hans Andrias Djurhuus
• 1949 - 1951 Hans Andrias Djurhuus og Tórarinn Evensen
• 1957 - bind 32 og 33 Tórarinn Evensen
• 1961-70 - 34. til 39. bind - Heðin Brú, William Heinesen og Karsten Hoydal
• 1971 -72 bind 40 - Karsten Hoydal
• 1973 - bind 41 Christian Matras
• 1977 - 1981 Gunnar Hoydal og Steinbjørn B. Jacobsen
• 1987 - Poul Andreasen
• 2013 - Agnar Artúvertin
• 2015 - Dorit Hansen