Ipotesi
«Une ipotesi e je une frase che, par chel che al inten la sô veretât, e je dome momentaniementri presunte, e il significât al è clâr al di là di ogni dubi.»
| |
Une ipotesi (dal grêc antîc ὑπόϑεσις hypothesis, composte di hypo, "sot" e thesis, "posizion", ven a stâi suposizion) e je la premesse di fonde par un resonament o par une dimostrazion.
Il significât de peraule in prin e jere une idee inteligjente o un metodi matematic bon par semplificâ i calcui, ma che nol jere necessariementri reâl. Cun chest significât il Cardinâl Bellarmine al doprâ la peraule cuant che al visâ Galileo Galilei di no tratâ il moviment de Tiere tant che reâl.
Intal ûs comun, une ipotesi e je une idee provisorie, la sô validitât e sarà di aciertâ. La ipotesi e domande di bande dai ricercjadôrs un sfuarç par confermâle o par confutâle. Intal metodi ipotetic-dedutîf, une ipotesi e varès di jessi falsificabile, ven a stâi e varès di jessi pussibil declarâle false, solitementri cuntune osservazion e conseguente formulazion di une altre ipotesi logjiche.
La peraule ipotesi e je stade in mût no coret doprade pe Ipotesi di Riemann, che e varès di jessi plui propriementri clamade congjeture.
Par esempli, une persone che e rive intun paîs e che e viôt une piore blancje, e podarès formulâ la ipotesi che dutis lis pioris di chel paîs a sedin blancjis.
Cheste e pues jessi considerade une ipotesi parcè che è je falsificabile, ven a stâi che si rive a provâ il contrari: al baste viodi une sole piore di colôr diferent.
Spes lis dimostrazions matematichis a vegnin enunciadis in trê parts: ipotesi, tesi e dimostrazion, dulà che l'enunciât di dimostrâ nol è la ipotesi ma la tesi, lis ipotesis a son invezit lis condizions validis cuant che si lavore e che adun ai assiomis de teorie a vegnin dopradis par gjavâ fûr la dimostrazion, par esempli:
- Ipotesi: che al sedi un triangul retangul
- Tesi: Teoreme di Pitagore
- Dimostrazion: viôt lis diviersis dimostrazions inte vôs Teoreme di Pitagore.
La tesi e je la proposizion che si à voie di aciertâ che sedi vere. Il resonament che si à di fâ par rivâ a chê veretât si clame dimostrazion.
Vôs leadis
cambie- Tesi
- Teoreme
- Teorie
- Philosophiae Naturalis Principia Mathematica pe posizion di Isaac Newton su lis ipotesi, "Hypotheses non fingo".