Žiwin
Žiwin Hochstein | ||
---|---|---|
wysokosć | 449 m | |
kraj | Sakska, Němska | |
masiw | Zapadołužiske hory | |
| ||
Žiwin[1] (serbsce tež Žiwiny, němsce Hochstein abo Sibyllenstein) je z nimale 449 metrami najwyši wjeršk Zapadołužiskeje pahórčiny juhozapadnje Kamjenca a Halštrowa. Lěsojta hora namaka so mjez Mohornom na zapadźe, Kamjentnej horu na sewjeru, Kinčom na wuchodźe a Ramnowom na juhu a je wo 200 metrow wyša hač na wuchodźe ležaca hornjołužiska krajina. Južnje jeje wjerška běži zwjazkowa awtodróha 4 (Drježdźany–Zhorjelc) přez tak mjenowanu Porchowsku horu.
Při skłoninach Žiwina so dwě wažnej rěce tutoho regiona wužórlitej, mjenujcy Čorny Halštrow na wuchodnym, Porchowskim boku a Rědora při juhozapadnym boku blisko sydlišća Rědorica (Röderbrunn). W lěsu njedaloko Rědoricy namaka so woblubowany wulětny hosćenc Luchsenburg.
Na wjeršku hory namaka so markantna šěsć do wósom metrow wysoka dwójna skalizna z łužiskeho granodiorita, hdźež běše prawdźepodobnje předstawizniske swjatnišćo. Jako najwyši dypk wokoliny je wjeršk Žiwina hižo wotdaloka widźeć a hodźeše so tuž za nabožne zaměry. Cyły rjećaz Žiwina funguje jako zapadna makroklimatiska mjeza Hornjeje Łužicy a zdobom jako wódny rozwod.
Žórła
- ↑ Filip Jakubaš: Hornjoserbsko-němski słownik. Domowina, Budyšin 1954, str. 539.