Ալեուտյան կղզիներ
Արտաքին տեսք
Ալեուտյան կղզիներ կամ Ալեության կղզիներ[1], կղզեխումբ Խաղաղ օվկիանոսի հուսիսում (ԱՄՆ, Ալյասկա նահանգ)։ Բաղկացած է 110 կղզուց ու բազմաթիվ ժայռերից, որոնք աղեղնաձև սահմանափակում են Բերինգի ծովը 1740 կմ ձգվածությամբ։ Բարձրությունը մինչև 2860 մ (Շիշալդինա հրաբուխը` Ունիմակ կղզում)։ Տարածքը` 37,8 հազար կմ քառակուսի։ Գլխավոր բնակավայրը` Ադակ (համանուն կղզում)։ Ունալաշկա կղզում է գտնվում ԱՄՆ-ի Դատչ Հարբոր ռազմածովային բազան։
Հայտնագործել են ռուս ծովագնացները (Միխայիլ Նևոդչիկով, Անդրեան Տոլստիխ, Ստեպան Գլոտով) 18-րդ դարի կեսերին. կոչվել են բնիկների` ալեուտների (ինքնանվանումը` ունանգան) անունով։ Մինչև 1867-ը պատկանել է Ռուսաստանին (վաճառել են ԱՄՆ-ին` Ալյասկայի հետ միասին)։[2]