Հայկազն Գ. Ղազարեան
Հայկազն Գ. Ղազարեան | |
---|---|
| |
Ծնած է | 20 Մայիս 1892 |
Ծննդավայր | Սեբաստիա |
Մահացած է | 21 Սեպտեմբեր 1972 |
Կրօնք | Քրիստոնեայ |
Հայկազն Գ. Ղազարեան (20 Մայիս 1892, Սեբաստիա - 21 Սեպտեմբեր 1972), իրաւաբան, խմբագիր եւ թարգմանիչ։
Կենսագրութիւն
Հայկազն Գ. Ղազարեան ծնած է Սեբաստիա։ Տեղւոյն ազգային Արամեան վարժարանը աւարտելէ ետք, կը հետեւի ֆրանսական Գոլէժ տէ Քառանթ Մարթիրի դասընթացքներուն։ Ապա կը հետեւի Կ. Պոլսոյ պետական համալսարանի իրաւաբանական եւ օտար լեզուներու ճիւղերուն, զորս կ՚աւարտէ 1914 թուականին, ու կը մտնէ Պահեստի Սպայից Վարժարանը։ Որպէս մարզիչ կը պաշտօնավարէ Էտիրնէի մէջ։ Զինադադարէն ետք, երեք տարի կը ծառայէ անգլիական ծովային հրամանատարութեան կեդրոնին մէջ, որ այդ ատեն կը գտնուէր թրքական ծովային նախարարութեան շէնքին մէջ։ Այստեղ Ղազարեան առիթը կ՚ունենայ ծանօթանալու թրքական շարք մը փաստաթուղթերու, որոնք կը վերաբերէին հայերու հալածանքին, հայ սպաներու եւ զինուորներու տարագրութեան եւ սպանութեան, անոնց ընտանիքներուն տարագրութեան, թուրք զինուորականերու կողմէ հայոց տուներու գրաւման, եւլն., ինչպէս նաեւ միջ֊նախարարական շրջաբերականներու։
Անցնելով Ամերիկայի Միացեալ Նահանգներ, քանի մը տարի Նիւ Եորքի մէջ աշխատելէ ետք կը փոխադրուի Պոսթըն, ուր մօտաւորապէս 30 տարի կ'աշխատի «Հայրենիք»ի մէջ, նախ՝ որպէս խմբագրական մարմնի անդամ, ապա՝ վարչական ժողովի։ Երիտասարդ թուրքերու քաղաքական գործունէութեան մասին ունեցած խոր ծանօթութիւնը, ինչպէս նաեւ իր տրամադրութեան տակ գտնուող բազմաթիւ փաստաթուղթերը մեծապէս նպաստած են Հայկազն Գ. Ղազարեանի՝ զինուած իրաւաբանական ուսումով եւ բազմաթիւ լեզուներու ծանօթութեամբ, ձեռնարկելու Երիտասարդ Թուրքերու հայասպան քաղաքականութիւնը փաստերու լոյսին տակ քօղազերծելու աշխատանքին։ Տարիներու ընթացքին այս ուղղութեամբ գրած անոր ուսումնասիրութիւնները ամփոփուսօ են «Ցեղասպան թուրքը» (Պէյրութ, 1968) խորագրով հատորին մէջ։
Հայկազն Գ. Ղազարեան մահացած է Սեպտեմբեր 21, 1972ին։
Աղբիւրներ
- Հայկազեան Հայագիտական Հանդէս , Հատոր Գ., Պէյրութ, 1972, էջ 315-316։