Oceania
Quest articol chì l'è scrivud in lombard, con la Noeuva Ortografia Lombarda |
L'Oceania a l'è una region geografega e geopolitega che l'è fada d'un insema de isole de l'Ocean Pacifegh e che la gh'ha 'me part continentala l'Australia; de solet la se spartiss in quater region: Australasia, Melanesia, Micronesia, e Polinesia.[1] L'Oceania a l'è el pussee piscinin di continent cont una superfis de terra de circa 8,525,989 km², e 'l segond manch popolad, dopo de l'Antartid, con circa 41 milion de persone. I ses cità pussee popolade a inn Sydney, Melbourne, Brisbane, Perth, Auckland, e Adelaide.
Etimologia
[Modifega | modifica 'l sorgent]In del 1804, el geograf Conrad Malte-Brun (1775-1826), in del so tratad de Géographie mathématique, physique et politique publegad con l'Edme Mentelle, l'insubiss el termen "Oceanegh" («Océanique» in frances) per ciapà denter sia l'Australasia sia la Polinesia del Charles de Brosses. El Malte-Brun el drovarà poeu la fras «Terres océaniques» anca in del 1810 e in del 1812.
El termen "Oceania" («Océanie» in frances) el vegn inventad del cartograf Adrien-Hubert Brué per la mapa che el publega in del 1814, con titol complet «Océanie, ou cinquième partie du monde, comprenant l'archipel d'Asie, l'Australasie et la Polynésie (ou le continent de la Nouvelle-Hollande et les îles du Grand Océan)»[2].
Geografia
[Modifega | modifica 'l sorgent]La Micronesia, che la se troeuva a nord de l'equator, la ciapa denter i Isole Mariane a nord-ovest, i Isole Caroline in del center, i Isole Marshall a ovest e i isole de Kiribati in del sud-est.
La Melanesia, a sud-est, la ciapa denter la Noeuva Guinea, la seconda isola pussee granda del mond dopo de la Groenlandia e la prima de l'Oceania. I olter isole principiai a inn el rosc di isole Maluku, el rosc de Bismarck, el rosc di isole Salomon, i isole Santa Cruz, Vanuatu, Figi e Noeuva Caledonia.
La Polinesia, la se spantega di Hawaii in del nord a la Noeuva Zelanda in del sud, la ciapa denter Tuvalu, Tokelau, Samoa, Tonga e i isole Kermadec a ovest, i Isole Cook, Isole de la Società e Isole Austral in del center, e i Isole Marches, Tuamotu, Isole Mangareva, e Isola de Pasqua a est.
L'Australasia la ciapa denter l'Australia, la Noeuva Zelanda, la Noeuva Guinea, e di olter isole de l'Ocean Pacifegh. A ovest la gh'ha l'Ocean Indian a sud Ocean Antartegh.
Note
[Modifega | modifica 'l sorgent]- ↑ The Four Sub-regions Of Oceania. WorldAtlas (26 December 2017).
- ↑ Oceania o ben la quinta part del mond, che la ciapa denter el rosc de isole d'Asia, l'Australasia e la Polinesia (o el continent de la Noeuva Olanda e i isole del Grand Ocean).
Alter proget
[Modifega | modifica 'l sorgent]Wikinotizie el gh'ha dent notizzie in su Uceania
Wikimedia Commons el gh'ha dent imagin o alter archivi su Uceania