Moritz Bleibtreu

Moritz J. Bleibtreu (* 13. August 1971 in München) is en düütschen Schauspeler. He is de Söhn vun de öösterriekschen Schauspelersche Monica Bleibtreu un den Schauspeler Hans Brenner, de ok ut Öösterriek stammt. Sien Oorgroottante is de Schauspelersche Hedwig Bleibtreu.

Moritz Bleibtreu (2014)

Levensloop un Wark

Bleibtreu is in Hamborg opwassen. He hett al in de Kinnertiet vör de Kamera stahn, vör allem in de Kinnerreeg Neues aus Uhlenbusch mit Hans-Peter Korff, de vun sien Mudder un Rainer Boldt schreven worrn is. En wietere Rull speel he in Ich hatte einen Traum, de ok vun Boldt schreven worrn is un ok wedder mit Korrf besett weer. An de Siet vun sien Mudder speel he 1986 sien drüdde Rull in de Minireeg Mit meinen heißen Tränen.

In de ölvten Klass is Bleibtreu vun de School afgahn. Över Paris, woneem he as Au-Pair arbeidt hett, keem he na New York City. Dor hett he denn Schauspeelünnerricht nahmen. In’t Öller vun 21 Johren hett he denn sien Loopbahn an’t Schauspeelhuus Hamborg wedder opnahmen. He kreeg denn ok en poor Rullen in lüttere Feernsehprodukschonen.

Dör eenige Feernseh-Speelfilmen is he bekannt worrn, vör allen aver dör sien Rullen in Kinofilmen as Lola rennt, Knockin' on Heaven’s Door oder Das Experiment. Mit den düütsch-töörkschen Filmmaker Fatih Akın hett he de Filmen Im Juli. un Solino maakt. Ok in Kinnerfilmen speelt he af un to noch, as 2004 in den däänschen Film Fakiren fra Bilbao.

In’t Johr 2007 geev Bleibtreu to verstahn, dat he sik 1998 seggt hett, keen Feernsehfilmen mehr maken to wullen, as Kino de aktive Form vun’t Tokieken is, Feernsehn dorgegen en passive.

In’n November 2008 is de Schauspeler Vadder worrn.

Filmografie (Utwahl)

Johr	Titel
1977	Neues aus Uhlenbusch, Feernsehreeg
1980	Ich hatte einen Traum
1986	Mit meinen heißen Tränen int.: Notturno, Feernseh-Minireeg
1995	Stadtgespräch int.: Talk of the Town
1997	Knockin’ on Heaven’s Door
1997	Die Gang, Feernsehreeg
1998	Lola rennt int.: Run. Lola, Run
1998	Liebe Deine Nächste int.: Love Your Female Neighbor!
2000	Im Juli. int.: In July
2000	Fandango dt.: Fandango – Members Only
2001	Das Experiment int.: The Experiment
2001	Lammbock
2002	Solino
2004	C(r)ook
2004	Agnes und seine Brüder int.: Agnes and His Brothers
2004	Fakiren fra Bilbao dt.: Der Fakir
2005	Vom Suchen und Finden der Liebe
2006	Elementarteilchen int: The Elementary Particels
2006	Le concile de pierre dt.: Liu San – Wächter des Lebens
2007	Free Rainer
2008	Chiko
2008	Les femmes de l’ombre dt.: Female Agents – Geheimkommando Phoenix
2008	Der Baader Meinhof Komplex
2009	Soul Kitchen
2010	Jud Süss – Film ohne Gewissen
2010	Goethe!
2010	Vallanzasca – Gli angeli del male dt.: Engel des Bösen – Die Geschichte eines Staatsfeindes
2011	Mein bester Feind
2011	360
2012	Die vierte Macht
2013	Die schwarzen Brüder
2014	Nicht mein Tag
2015	Die dunkle Seite des Mondes
2016	Das kalte Herz
2017	Lommbock
2017	Schuld, Feernsehminireeg

Utteken

Moritz Bleibtreu is för sien Filmrullen eenige mol för internatschonal bekannte Filmpriesen vörslahn worrn, vun de he teihn wunnen hett:

• 1997: den Düütschen Filmpries in Gold in de Kategorie Sünnere Leistung vun en Nevendorsteller för Knockin’ on Heaven’s Door.
• 1998: den Ernst-Lubitsch-Pries för Knockin’ on Heaven’s Door.
• 1999: den Jupiter in de Kategorie Beste düütsche Schauspeler för Lola rennt.
• 2001: den Düütschen Filmpries in Gold in de Kategorie Sünnere Leistung vun en Hööftdorsteller för Das Experiment.
• 2001: den Publikumspries vun’n Düütschen Filmpries as Schauspeler vun’t Johr.
• 2002: den Golden Space Needle Award in de Kategorie Beste Dorsteller för Das Experiment.
• 2002: den Jupiter in de Kategorie Beste düütsche Schauspeler för Das Experiment.
• 2005: den Romy in de Kategorie Leefsten Schauspeler.
• 2006: den Romy in de Kategorie Leefsten Schauspeler.
• 2006: den Sülvern Boor vun de Berlinale in de Kategorie Beste Dorsteller för Elementarteilchen.

Weblenken

• Moritz Bleibtreu in de Internet Movie Database (engelsch)
• Literatur vun un över Moritz Bleibtreu in de Düütschen Natschonalbökeree