Artemisia Gentileschi
Artemisia Gentileschi (Roma, 8 di giugnettu 1593 – Napuli, 1653) fu na pittrici italiana di la scola caravaggesca.
Biografìa
canciaFigghia dû pitturi Orazziu Gentileschi, accuminzau ntâ putìa di sò patri. Già picciotta sò patri la mannau nti la putìa di Austinu Tassi, n'àutru pitturi amicu di Orazziu, ca versu li 18 anni la viulintau. Orazziu Gentileschi ci fici na causa, e Artemisia si n'appi a gghiri. Viaggiau nti diversi cità italiani e pi nu certu piriudu si stabbiliu a Firenzi maritata a Pierantoniu Stiattesi, nu pitturi comu a idda, e di cui duranti stu pirìudu appi quattru figghi. A Firenzi, unni stesi nzinu ô 1620, appi la prutizzioni di Cosimu II dî Mèdici e dâ sò curti; canuscìu Galileu e lu niputi di Michilàncilu Buonarroti ca ci cummissiunau nu travagghiu. Lu piriudu fiorintinu marcau na fasi n cui Artemisia Gentileschi agghicau a fàrisi arricanusciri comu artista affrimata, tantu ca fu la prima fìmmina a essiri ammittuta â Accademia. Doppu siri turnata a Roma, unni la sò fama era assai nigativa a causa dû prucessu contra Tassi, Artemisia Gentileschi si ni jìu pi nu pezzu a Venezzia e appoi a pàrtiri dû 1630 a Napuli. Doppu na parentisi a Londra â fini di l'anni '30, Artemisia Gentileschi si stabbiliu difinitivamenti a Napuli.
La pittura
canciaLu sò stili è nfluizatu assai di chiddu di Caravaggiu, e n particulari pi l'usu dâ luci e dî chiaru-scuri. Li suggetti ripìgghianu spissu suggetti fimminini nti na pusizzioni cuntraria a chidda abbitarmenti nfiriuri ca ê sò tempi la fimmina avìa a tèniri. Singificativa di stu puntu di vista è la tila Giuditta ca dicapita Oloferni ca arraprisenta na scena di straordinaria viulenza di la parti di dû fìmmini contra Oloferni, tila ca fu pittiata picca tempu doppu ca fu viulintata.
La rivalutazzioni
canciaPi sèculi l'òpira di Artimisia Gentileschi fu suttavalutata e li quatri spissu ammucciati ntê suttirrania dî musei, pi du' mutivi. Gentileschi era na fìmmina, e macari pirchì duranti lu piriudu fiurintinu si firmava spissu cô cugnomu di sò maritu. Sulu ntô XX sèculu la fjiura di Artimisia Gentileschi fu riscupruta, e n particulari diversi tili senza attribbuzzioni ma di chiara uriggini dâ scola caravaggesca foru attribbuiti a idda. Li vicenni dâ sò vita ni ficiru puru ntâ secunna mità dû XX sèculu nu sìmmulu dû muvumentu fimminista.