Mélanie Laurent
Mélanie Laurent (š. 21. kuovâmáánu 1983, Pariisi, Ranska) lii ranskalâš čaittâleijee, kietâčällee já stivrejeijee. Maailmvijđosávt sun lii tobdos eromâšávt elleekuuvijn Inglourious Basterds (2009), Now You See Me (2013), já 6 Underground (2019). Ranskaast suu láá tubdâm jo kuhebáá, já sun lii vuáittám kyehti César-palhâšume, kyehti Lumière-palhâšume já lamaš iävtukkâssân Cannes elleekovejuuhlijn.[1]
Eellim
Mélanie Laurent šoodâi ive 1983 Pariisist balleriin Annick já jienâčaittâleijee Pierre Laurentin, kii lii tobdos suu roolâst Ned Flandersin ranskakielâlijn Simpsonijn.[1]
Karrieer
Laurent karrieer aalgij, ko sun lâi kolliistâlmin elleekovekuvviimijn ive 1998, kost Gérard Depardieu huámmášij suu já koijâdij suu čaittâliđ Depardieu čuávuváá fiilmân.[2] Laurent lii tast maŋa čaittâlâm paijeel 40 elleekooveest, enâmustáá ranskalijn elleekuuvijn. Hollywood debyytas sun raahtij Quentin Tarantino elleekooveest Inglourious Basterds ive 2009,[3] já čaittâlij tast maŋa ovdâmerkkân Mike Mills elleekooveest Beginners (2010), Denis Villeneuve elleekooveest Enemy já Angelina Jolie elleekooveest By the Sea (2015). Sun stivriiškuođij siämmást jieš-uv já vuosmuš suu stivrim kuhes filmâ The Adopted almostui ive 2011. Nubbe filmâ Respire (2014), uážui vuošâehidis Cannes elleekovejuuhlijn,[4] já tast šoodâi kritiikkárij rämidem. Sun lii stivrim meid ovdâmerkkân dokumentelleekove Demain (2015), mast šoodâi Ranska ive 2015 stuárráámus dokument,[3] já elleekove Le bal des folles (2021), mast sun meid čaittâlij jieš.[5]
Käldeeh
- ↑ 1,0 1,1 Mélanie Laurent IMDb. Čujottum 10.4.2022.
- ↑ Mélanie Laurent | La Semaine de la Critique of Festival de Cannes Semaine de la Critique du Festival de Cannes. Čujottum 10.4.2022. (eŋgâlâskielân)
- ↑ 3,0 3,1 Mélanie LAURENT Festival de Cannes 2022. Čujottum 10.4.2022. (eŋgâlâskielân)
- ↑ Ariston Anderson, Ariston Anderson: Melanie Laurent on Working With Angelina Jolie and Brad Pitt: “It Was Two Dreamlike Months” The Hollywood Reporter. 15.12.2014. Čujottum 10.4.2022. (eŋgâlâskielân)
- ↑ Mélanie Laurent on The Mad Women’s Ball: ‘It was like the doctors were playing with dolls’ the Guardian. 16.9.2021. Čujottum 10.4.2022. (eŋgâlâskielân)