Red Canzian
Biografia | |
---|---|
Nasimènto | Eror Lua: callParserFunction: function "
[[Categoria" was not found. (72 ani)Cuinto (Itàlia) |
Atività | |
Laóro | Eror Lua: callParserFunction: function "
[[Categoria" was not found. |
Atività | 1968 - in atività |
Menbro de | Eror Lua: callParserFunction: function "
[[Categoria" was not found. |
Instrumento muxegałe | baso, voxe, chitara, viołonsèło, contrabaso, viołin, flauto, pianoforte, mandołin |
Targheta discogràfega | |
Àlbun | 3 |
Àlbun stùdio | 3 |
Repertòrio | |
Pop Rock, Pop, Rock progresivo, Rock sinfonico, Rock | |
Fameja | |
Spoxa | Eror Lua: callParserFunction: function " [[Categoria" was not found. |
Convivente | Eror Lua: callParserFunction: function " [[Categoria" was not found. |
Fiołi | |
| |
Sito web | redcanzian.it |
|
Red Canzian, (Cuinto de Trevixo, 30 novenbre del 1951), el ze un cantante, basista, ghitarista, połistrumentista e produtor discogràfego itałian.
Biografia
[canbia | canbia el còdaxe]El nase el 30 de novenbre 1951 a Cuinto de Trevizo (TV) in una viła nobiłiar in cui ła só fameja, economègamente non aziada, ła vivea in conpanjia de altre. El pasa ła só infansia a Cuinto e l'adołesensa a Trevizo. El taca sonar ła ghitara in piena epoca beat e inte ła segonda metà dei ani sesanta el partesipa ad alcuni concorsi in Veneto, co'l riva inte'l grupo muzegałe dei Prototipi, formà da alcuni amighi de infansia che i ło convinse a entrar inte'l grupo dopo averlo sentìo cantar. El grupo el se vadanja da viver, par na stajon estiva, inte i łocałi de ła Riviera; a'l ritorno a Trevizo el produtor Pino Massara el deside de canbiar el nome de'l grupo muzegałe in Capsicum Red.
Co'l grupo trevizan Red el pùblega un LP progressive intitołà Appunti par un'idea fissa, venjùo froa inte'l 1972 par l'eticheta Bla Bla (l'istesa de'l primo Franco Battiato sparimentałe). L'ano presedente i Capsicum Red i gaveva publegà do 45 giri (Ocean e Tarzan) e partesipà a'l Festivalbar 1971; una de łe só canson (Ocean) ła zera stà sernìa cofà sigla de'l programa tełevizivo de ła Rai ...e ti dirò chi sei, conduzesto da Enza Sampò. A ze pròpio durante el Festivalbar che avien el primo incontro intrà i Pooh e Red, che i sta ore a parlar de mùzega.
Drìoman, a cauza de'l servisio de łeva, alcuni conponenti de'l grupo i ze costreti a łasar el grupo dei Capsicum Red se desfa. Red miłita par un curto parìodo inte i Osage Tribe, può el partesipa a'l provin par entrar a far parte dei Pooh.
Nei Pooh
[canbia | canbia el còdaxe]Ani setanta
[canbia | canbia el còdaxe]El 15 de febraro 1973 el vien convocà dai Pooh, che xe drìo sercàr un basista par sostituir Riccardo Fogli e i ga za vizionà pì de trezento muzicisti. El provin el avien inte ła łisièra de un albergo de Roncobilaccio in cui ghe jera na parte co tantisimi ròdołi de carta izènega e pròpio par cuesto de bona acùstega. Red el se prezenta sensa baso, tutavia ghe xe un un Fender bianco łasà da Fogli: pur non avendo mai sonà el baso, Red mostra de aver sata, e da cuel dì el entra far parte dei Pooh. Tre setemane pì tardi avien el canbio con Riccardo e, daspò un poche de prove a Roncobilaccio e un paro de concerti al Sud, el debuta co na tournée inte i Stati Unii, co brani in scałeta inpararài dopo aver sentìo anca masa volte łe casete de'l grupo. Tornando dai USA, el vien ofisialmente ametesto inte'l grupo.
El ritorno in Itałia porta i Pooh da novo in sała de insizion par Parsifal. Al zòvane debutante Red vien afidàe łe parte vocałe de Come si fa, Solo cari ricordi, ła prima e l'ùltema strofa de L'anno, il posto, l'ora. Drìoman el interpreta Eleonora mia madre (co Roby) e Il tempo, una donna, la città (co Roby e Dodi) dal disco Un po' del nostro tempo migliore, mentre a cauza dei ràdeghi co Giancarlo Lucariello el se ritrova a no cantar njanca un brano de Forse oncora poesia.
Inte'l 1977 el produze, el sona el baso e scrive alcune canson par el doto Genova & Steffan, el grupo inte'l cuało miłita un só ex conpanjo dei Capsicum Red. Red no'l partesipa a ła łaorasion dei do sìngołi dei Mediterraneo System de Valerio Negrini. El só ròło de autor de łe mùzeghe el scominsia co Il suo tempo e noi del 1977, drìoman el porta a Facchinetti el zbòso so cui łaorar de Il ragazzo del cielo, na suite rock-progressive che parla de'l primo zvòło trans-oseànego de Lindbergh, includesta inte'l disco Boomerang del 1978.
Ani otanta
[canbia | canbia el còdaxe]Ghe va drìo un fiłon che porta a scrivar almanco un brano par album e nase cusì Susanna e basta (1979), cantada parò da Dodi e Roby, Gatto di strada (1980), Replay (1981), Colazione a New York (1983), Lettera da Berlino Est (1983), Stella del sud (1984), Amore e dintorni (1986). Inte el 1986 el inside el so primo LP da sołista, intitołà Io e Red e indove partesipa come autori grandi artisti cofà Paolo Conte, Enrico Ruggeri e Roberto Vecchioni.
In sto LP conparise come ospiti anca i altri Pooh, che i sona in alcuni brani o i scrive i testi de alcune canson: el baterista Stefano D'Orazio in Canzoni par mestiere e Valerio Negrini in Noi quelli veri, Frontiere. Inte el brano Con gli occhi chiusi se inverte i ròłi: Marco Tansini firma łe mùxiche e Red scrive el testo. No se pol desmentegar Capita a volte che poi ci si trovi soli, scrivesta insenbre ad Enrico Ruggeri e cantada come sołista da Red. Łe cantanti femenìne che dota co Red łe xe Loredana Bertè in Tu no, Betty Vittori in Con gli occhi chiusi e ła conpagna de Red inte ła vita, Delia Gualtiero, in Noi quelli veri. Inte el 1986 Red scrive anca el brano Rosso Natale inserìo in t'una racolta de artisti vari publegà a fin benefico. El sìngoło Sogno messicano vien sernìo da ła RAI come sigla dei Mondiałi de calcio del 1986. So'l fenir dei ani otanta el conpone alcune de łe hit pì sensuałi del grupo: Città di donne (1987), Ti dirò e Linea calda, entrambe del 1988.
Ani novanta
[canbia | canbia el còdaxe]El ròło de Red inte i Pooh el ciapa senpre pì spasio e ło mena a firmar inte i ani nonata alcuni dei brani piasè inportanti de ła discografia de'l grupo, scrivesti in cubia col fedełe D'Orazio. E nase el fiłon denomenà "Canzian-songs" dedicà a ła conpanja Bea, che inte'l fratenpo ła ga ciapà el posto de Delia Gualtiero inte'l cuor de Red: Stare senza di te (1992), Tu dove sei (1994), Cercando di te (1996), Io ti aspetterò (1999).
Ani 2000
[canbia | canbia el còdaxe]Inte'l 2000 co'l brano Stai con me par ła prima volta un sìngoło destinà a'l comersio el ze scrivesto da Red; in presedensa, escludesta Canterò par te de Dodi Battaglia insidesta inte'l 1980, i sìngołi i jera senpre stà sernìi intrà i brani de Roby Facchinetti. A Stai con me seguono Portami via (2001), Capita quando capita (2004) e Il cielo non finisce mai (2006).
Ani 2010
[canbia | canbia el còdaxe]Inte el 2010 Red ga prexentà ła Fondazione Q, che ła se ocupa de xovani muxicisti, produxendo sensa fini de łucro el so primo projeto discografego. De sta fondasion, de cui Red xe el diretor, fa parte Elvio Chiatellino e Marina Quadro e ła ga cofà obietivo de "dare un vestito a un cantante che entra nuo" grasie a un team de esperti che juta i xovani artisti presielti a reałixar el pròpio łaoro a 360 grai, da l'aspeto pretamente muxegałe a cueło psicołoxego del star sol palco. Ła Fondasion, par xonta, ga precixà Canzian "no ła ze contro i talent show, ma ghe va a łori in ajuto, ocupandose de serti aspeti che vien a volte łasai fora".
El 24 de avril 2012 vien fora inte łe łibrarìe Go vedesto sesanta volte fiorir el całicanto, autobiografia inte ła cuała Red se conta par ła prima volta parlando di sé, de ła so infansia tra Cuìnto de Trevixo e Trevixo, del so mistier de muxicista, de ła so famegia, de łe so pasion, de ła so sielta vegana e dei so sogni.
El 30 de setenbre 2014 ese sol marcà el so segondo album da sołista, dal titoło L'istinto e le stelle. El progeto conprende un cd co 12 brani inediti (mai publegai), un DVD contegnente un docufilm so ła łaorasion de l'album xirà intra Miłan, ła Val Badia e Villa Corner della Regina, visin Treviso, e un łibràtoło de ben 72 pàjine. L'album xe antisipà dai sìngołi Corro verso te e Ogni dì ze un altro dì che ti amo.
Dapò i Pooh
[canbia | canbia el còdaxe]Dal 2018 ai dì nostri
[canbia | canbia el còdaxe]Red Canzian partesipa al Festival de Sanremo 2018 col brano Ognuno ha il suo racconto, piasandose in finałe al 15º posto, el brano antisipa el novo album intitołà Testimone del tempo, che xe usìo el 16 de febraro 2018, a l’album seguirà un tour omonemo che ga avuo inìsio el 2 de magio 2018 a Cascina.
Da l'8 de zugno 2018 el xe zurà e coach inte'l programa Ora o mai più so Rai 1, conduzesto da Amadeus. Inte ła prima edision ga come arlevo el cantante Marco Armani, mentre inte ła seconda l'ex conponente dei Gazosa Jessica Morlacchi.
El 31 de łujo el debuta co Red in Blue, un spetacoło inte'l cuało el conta ła so vita traverso łe canson, conpagnà da l'Istituzione Sinfonica Abruzzese direta dal M° Stefano Fonzi e dal trio ritmico conponesto da Phil Mer a ła bateria, Andrea Lombardini al baso, Daniel Bestonzo al pianoforte.
El partesipa a ła rejistrasion del concept album Hotel Disamore, de Miki Porru, publegà el 1º de febraro 2019 insieme a Isbella D'emery, Delia Gualtiero, Arianna Cleri, Monia Russo, Paul Manners, Tony Suriano, Paolo Schianchi, Giancarlo Gianise, Alvaro D'apollonio, par el cuało el dezegna ła piantina a l'interno del booklet, el interpreta łe canson Prima o poi (insenbre al steso Miki Porru e ai altri ospiti), e Due parole (par intièro, co Miki Porru che fa do brevi cori)
El 31 de łujo 2019 el se ezibise in un gran concerto a Marzano di Nola seguio da miàre de persone.
Inte'l 2021 andarà in sena el spetacoło Casanova Operapop, dedicà a ła Venesia del '700, traesto dal romanzo Giacomo Casanova - La sonata dei cuori infranti de Matteo Strukul.
El vinse ła seconda edizione del programa tełevizivo Il cantante mascherato del 2021, come personajo del Papagało.[1]
Vita privà
[canbia | canbia el còdaxe]In pasà el ga avùo storie d'amor co Marcella Bella inte'l 1973 "A so stà fidansà co Marcella Bella... ła jera na storia tanto beła, insenbre gavemo fato de łe fughe a Parize un paro de volte, senpre in tren parchè èła no ła vołeva zvołar, co i somejari che ne seguiva sercando de becarne, e nialtri che scanpavimo dadrio dei alberghi... ze stà un grando amor. Mi jero 'pena entrà inte i Pooh, èła ła jera za famoza, a l'epoca ła zera na piavołina, el ze un bełisimo recordo che cato inte łe someje so ła tore Eiffel scatae da altri foresti co ła nostra Polaroid", Pooh (a cura de Franco Dassisti), Quello che non sai, Mondadori, 1997; pag. 253</ref>, co Patty Pravo inte'l 1976[2], co Loredana Bertè inte'l 1977[3], co Mia Martini[4] e co Serena Grandi[5].
Red Canzian xe spozà dal 9 de łujo 2000 co Beatrice "Bea" Niederwieser e'l avùo na fia, Chiara, mentre Bea ga un fio, Philipp Mersa, el cuało po', cuando che'l debutarà inte'l mondo de ła mùzega cofà baterista, se farà ciamar senplisemente Phil Mer.
Chiara, nasùa inte'l 1989 dal primo matrimonio de Red co Delia Gualtiero (conpagna del muxicista dal 1980 e spozada el 29 de zugno 1986; separai dal 1992), oltre ad èsar ła toza imortałada so ła coertina del cd "Ascolta", inte'l 2008 ła ga ezordìo inte'l mondo de ła mùzega co'l sìngoło "Novembre '96".
Co ła prima mujer Delia, Red ga cołaborà anca muzicalmente, cofà produtor dei so dischi.[6]
Phil, nasùo inte'l 1982 e fiòło de Beatrice, xe baterista de on grupo rock (Capsicum Tree, che xe stai produzesti da Canzian par el so album d'ezordio Eternal Life) e turnista: el ga sonà, infati, inte łe toruneè de diversi artisti, tra cui Pino Daniele, Patty Pravo, Malika Ayane, Francesco Renga e Pooh.
Red ga acuistà i studi de rejistrasion de Carimate inte i cuałi i Pooh insideva i dischi, trasformandołi inte i Morning Studios.
Inte'l 1992, conplise un łibro so i bonsai conprà in autogrill, deventa un pasionà de sto setor e 'l deside de publegar un manuałe so ła coltivasion dei bonsai. Inte'l 1997 invese el racolie łe so esperiense personałi e łe so conosense so i fiori spontanei in un altro łibro.
Co so fia Chiara e 'l fiàstro Philipp inside el sìngolo Il calcio del sorriso, ino de ła scuadra de calcio del Treviso.
El vive dal 1986 in una viła so łe rive del fiume Siłe a Sant'Elena di Silea (TV), so łe cui rive Canzian xe nasùo e cresùo. Dopo èsar stà vezetarian par 15 anni, dal 2009 el xe deventà vegano[7] par motivi etici.
Discografia
[canbia | canbia el còdaxe]- Io e Red (1986) (CGD 20498)
- L'istinto e le stelle (2014) (Blu Notte)
- Testimone del tempo (2018) (BMG)
In pì se recorda i brani drio:
- Rosso Natale (1986). Brano conponesto da Red Canzian, includesto inte ła raccolta E le stelle stanno a cantare (CGD COM 20561).
- Il calcio del sorriso (1998). (cd sìngoło Blunotte BSCD 1020). Brano conponesto da Red Canzian e Miki Porru. Registrà co i fiòłi Philipp e Chiara Canzian, ino de ła scuadra de calcio del Modeło:Calcio Treviso. L'ino el ze stà prezentà ofisialmente doménega 22 de novenbre 1998 al stadio Omobono Tenni, in ocazion de ła partìa Treviso-Lucchese, undezèzema zornada de'l canpionato de Serie B.
- Anima Bianco Verde (2007) (cd sìngoło Blunotte 009) el ze l'ino ofisiałe de ła Benetton Rugby Treviso, conponesto da Red par łe mùzeghe e Stefano D'Orazio par el testo.
Filmografia
[canbia | canbia el còdaxe]- Si muore solo da vivi, regia de Alberto Rizzi (2020)
- Fratelli Caputo, regia di Alessio Inturri - miniserie TV (2020-2021)
- Il cantante mascherato - (2021) cofà concorente e vinsidor
Notasion
[canbia | canbia el còdaxe]- ↑ Il Cantante Mascherato, vince Pappagallo: è Red Canzian. Farfalla seconda: ecco di chi si trattailmessaggero.it. entrada il 27/02/21.
- ↑ "Riccardo Fogli par Patty Pravo ga łasà i Pooh: mi go visùo cuatro mezi a caza de Nicoletta, ła ze stà ła me dona, semo stà insenbre e no gavemo fato nisun cazin...anca co èła ła ze stà na storia beła, divertente, stranba", Pooh (a cura de Franco Dassisti), Quello che non sai, Mondadori, 1997; pag. 254
- ↑ "Suito drioman A go avùo na storia co Loredana Bertè. Loredana ła jera inzesitibiłe, un cavało mato, ma mi ghe vołevo tanto ben", Pooh (a cura de Franco Dassisti), Quello che non sai, Mondadori, 1997; pag. 254
- ↑ "Po go tacà frecuentar so soreła Mimì. Do storie conpletamente desconpanje, una fazesta de seso, suor e łàgreme, l'altra fazesta de grandi problemi...Mimì no ła riusiva a vivar ben łe so storie d'amor parchè 'pena che ła ne insiava una ła tacava pensar che ła sarìa finìa....mi ghe so stà insenbre par un bel tòco'", Pooh (a cura de Franco Dassisti), Quello che non sai, Mondadori, 1997; pag. 254
- ↑ Pooh (a cura de Franco Dassisti), Quello che non sai, Mondadori, 1997; pag. 255
- ↑ Mauro Sartori, «Un turbine di emozioni. Ora sono albergatrice»IL GIORNALE DI VICENZA, 19 gennaio 2017. entrada il 18 marzo 2020 (archivià dal URL orizenałe il 30 gennaio 2017 ).
- ↑ Intervista di Lorella Cuccarini ai Pooh durante la puntata di Domenica In del 12/12/2010.
Altri projeti
[canbia | canbia el còdaxe]Wikimedia Commons el detien imàjini o altri file so Red Canzian
Linganbi foresti
[canbia | canbia el còdaxe]- Sito ufisałeredcanzian.it.
- (EN) Red CanzianAllMusic, All Media Network.
- (EN) Red CanzianDiscogs, Zink Media.
- (EN) Red CanzianMusicBrainz, MetaBrainz Foundation.
- (EN) Red Canziangenius.com.
- (EN) Red CanzianInternet Movie Database, IMDb.com.
Controło de autorità | VIAF (EN) 78105428 · ISNI (EN) 0000 0000 3454 9465 · LCCN (EN) n99008657 · WorldCat Identities (EN) n99-008657 |
---|