Svobodnii (Amuran agj)
Lidnanznam |
Flag |
Valdkund | Venäma |
Eläjiden lugu (2023) | 48,789 ristitud |
Pind | 225 km² |
Pämez' | Vladimir Konstantinov (eloku 2018—) |
Telefonkod | +7−41 643-xx-xxx |
Avtokod | 28 |
Aigvö | UTC+9 (MSK+6) |
Sil sanal voib olda toižid znamoičendoid; miše nähta niid, tulgat tänna.
Svobodnii (ven.: Свобо́дный) om Venäman lidn da lidnümbrik Amuran agjan keskuzpalan suves. Se om agjan koumanz' lidn eläjiden lugun mödhe, om Svobodnijan rajonan administrativižeks keskuseks mugažo, ei mülü rajonha.
Istorii
[vajehta | vajehtada lähtetekst]Eländpunktan aluz om pandud vl 1912 kuti Aleksejevsk (ven.: Алексе́евск) lidnan statusanke Aleksei-carinpoigan oiktastuseks. Vl 1917 sulakul nimitihe lidnad nügüdläižikš.
Svobodnii šingotase raudten, sauvondmaterialiden (raudbetontegesed, keramine savič) i sömtegimišton edheotandoil. Kaikiš järedamb om vagonoiden kohenduztegim, se om üks'jäine Baikalaspäi Edahaižes Päivnouzmpoles. Vspäi 2015 Amuran londuseližen gazan ümbriradai tegim om sauvomas 15 kilometras lidnaspäi.
Geografijan andmused
[vajehta | vajehtada lähtetekst]Lidn sijadase Zei-jogen (Amuran hura ližajogi) oiktal randal, 190 m ü.m.t. keskmäižel korktusel.
Matkad Blagoveščenskhasai om 146 km suvhe avtotedme. Lähembaižed lidnad oma Belogorsk 56 km suvhe orhal vai raudtedme, Šimanovsk 60 km lodeheze raudtedme, Ciolkovskii 45 km pohjoižhe.
Tobmuz
[vajehta | vajehtada lähtetekst]Svobodnii om lidnümbrikon üks'jäižeks eländpunktaks. Lidnfartaliden pind om 20..40 nellikkilometrad, kaiken lidnümbrikon — 225 km².
Edeline lidnan pämez' om Jurii Romanov (sulaku 2017 — eloku 2018).
Eläjad
[vajehta | vajehtada lähtetekst]Vn 2010 Venäman rahvahanlugemižen mödhe lidnan eläjiden lugu oli 58 778 ristitud, vn 2021 — 48 517 ristitud. Kaik 54 156 eläjad oli lidnas vl 2017. Kaikiš suremb lidnan ristitišt oli 81 300 eläjad vl 1992, se oli agjan kahtenz' lidn eläjiden lugun mödhe.
Ortodoksižen hristanuskondan koume pühäpertid[1] oma kaičenus i saudud lidnas: ph. Mikulai-čudonsädajan puine jumalanpert' (saudihe vll 1912−1914), ph. Aleksei-carinpoigan kivine jumalanpert' (letihe vll 2017−2019), časoun' hänen-žo oiktastuseks (om saudud vll 2005−2010 nevondkundaližes pertišpäi). Vanhuskolaižiden kundan pert' om saudud. Seičemenden päivän adventistoiden jumalankodikundan tulendpert' om avaitud.
Professionaližen opendusen aluzkundad: Amuran tehnine kolledž i Amuran raudtetransportan institut[2] — Edahaižen Päivnouzmpolen raudteühtenzoitusen valdkundaližen universitetan filial, medicinine škol i raudtetehnikum mülüdas institutha.
Galerei
[vajehta | vajehtada lähtetekst]-
Lidnümbrikon administracijan sauvuz (2012)
-
Amuran londuseližen gazan ümbriradajan tegimen sauvomine vl 2019
-
Amuran raudtetransportan institut vl 2012
-
«Zei»-adivpert' (2012)
-
Svobodnii-päraudtestancijan sauvuz vl 2012
Homaičendad
[vajehta | vajehtada lähtetekst]- ↑ Svobodnijan pühäpertid sobory.ru-saital. (ven.)
- ↑ Amuran raudtetransportan institutan sait (amijt.ru). (ven.)
Irdkosketused
[vajehta | vajehtada lähtetekst]- Municipaližen «Svobodnii-lidn»-ühtnikan tobmuden aluzkundoiden oficialine informacine sait (svob.amurobl.ru). (ven.) i sen vanh versii (svobnews.amur.ru).
Svobodnii (Amuran agj) Vikiaitas |
Amuran agjan lidnad | ||
Belogorsk | Blagoveščensk | Ciolkovskii | Raičihinsk | Skovorodino | Svobodnii | Šimanovsk | Zavitinsk | Zei | Tind | ||