Robert II van Normandië
Robert II van Normandië, bynoame Robert Curthose (tusschn 1051 en 1054 - Cardiff (Wales), februoari 1134) was den oudste zeune van Willem de Veroveroare en Mathilda van Vloandern.
Je krêeg zyn bynoame deurdat ‘n zo kortgestuukt was. Courtheuse in ‘t Normandisch wilde zeggn: korte kousebroek of collant (court [kort] en heuse [kousn]).
Je was hertog van Normandië van 1087 tout 1106, mo je kost den titel van keunienk van Iengeland nie ipeisn. Zyn joungere broere Willem Rufus en loater zyn joungste broere Hendrik Beauclerc wel.
Je wordt anzien as e zwakke, incompetente figeure zounder gezag. Je rebelleerde twi kis teegn zyn voader (1077/78 en ca. 1082–83) en je zat verbann in Italië tout dat ’n in 1087, 't joar van den dôod van zyn voader, were kêerde.
In 1091 viel zyn broere, keunienk Willem II van Iengeland, Normandië binn en Robert most twi groafschappn ofstoan. In 1094 dêe Willem da nog e ki, mor uutendelik kostn z’overêen kommn. Robert gaf Normandië in lêen an zyn broere vor e somme geld. Da geld kost 'n goed gebruukn vo mee goan mè den êeste kruustocht (1096–99).
In 1100 stierf zyn broere Willem in e jachtaccident en binst da Robert nog weg was, wierd hunder joungste broere in Westminster Abbey gekrôond tout Hendrik I van Iengeland.
O Robert dat hôorde vielt ’n zo zêre of telln Iengeland binn vo te vechtn vo zyn erfrecht, mo Hendrik kost weerstoan an zyn invoasie. Robert most ipgeevn en werekêern no Normandië.
Ze têekndn ‘t verdrag van Alton, mo die overêenkomste deurde nie lange want in 1105 viel Hendrik Normandië binn, en ’t joar der ip in 1106 versloegt ie ’t leger van Robert in de Slag by Tinchebray (nu geleegn in ‘t Frans departement Orne, Lêeg-Normandië).
Robert wierd overmêesterd en zyn broere hield hem de reste van zyn leevn (28 joar) gevangn. Je zat êest 20 joar ipgeslootn in Iengeland en loater wierd ’n overgebrocht no Cardiff. In 1134 ist ’n doa gestorvn in Cardiff Castle.
Zyn zeune Willem Clito, geboorn in 1101, vocht teegn zyn nounkel Hendrik vo de macht over Normandië, mo zounder succes.
Normandië blêef nog bykan ’n êeuwe (tout 1204) in ‘t bezit van Iengeland.
Vrouwe en jounges
[bewerkn | brontekst bewerken]Robert trouwde mè Sibylle van Conversano ol werekêern van de kruustocht. Under jounges:
- Willem Clito, groaf van Vloandern (1127-1128)
- Hendrik van Normandië
Robert is begroavn in d’abdykerke van Sinte-Pieter in Gloucester (loater Gloucester Cathedral).