Ene grande anvanceye pou Bive [Bièvre] !
Il årè falu 7 ans pou vey, fin may 2010, e Pont Mack, al viye voye du Bive, 7 olyinnes[1].
Ça rapinse cwand on tume sul foye du lårî dins ene cujhnêye, et dire k' on nd a co pou 7 ans duvant du s' maryî.
Dju m' rafeye dedja d' les vey tourner et catourner e plin vint sul duzeu du viyaedje.
L' electricité ki rexhrè n' irè nén dins les måjhons, mins å Moncea [Monceau-en-Ardenne], al grosse cabene.
Pou moenner l' courant bén påjhirmint, il a falu ène trintchêye, ût kilometes longue et ene cabene-rilai, pou renonder l' wachla electrike, sapinse k' i djhèt.
O ! dju sans schapés… pou l' reschandixhaedje del Tere [réchauffement climatique].
Tous les Bivîs (et les Bivresses) ont stî d' acoird, såf ene vwès, ene djin k' est alerdjike. Pourtant, gn årè nule poûssire ki rexhrè foû du zonigne ås olyinnes.[2]
Pou l' moumint, vous n' voeyoz k' des trôs, 2 metes céncwante fond et 17 m. et dmey lådje.
Les pales seront co pus grandes ku des aiyes d' avion. On cåze du 45 metes.
Ça fwait qu' tout l' monde est contin, copuvite les prôpietaires des bokets k' on-z î a astalé les indjéns, ki rascodront on gros louwaedje, 20 ans å long.
Vou nous la bin wårdés pa ces grands oujheas la, plantés coume des sintineles k' on n' ôt nén.
Madi d' Orcîmont, li 15 d' octôbe 2009