許浚
許浚 | |
---|---|
許浚嘅畫像 | |
字 | 淸源 |
號 | 龜巖 |
出世 | 1539年(?) 朝鮮京畿道長湍都護府臨江面(임강면)禹勤里(우근리)[1] |
死 | 1615年10月9號(陰曆八月十七) |
墓地 | 大韓民國京畿道坡州市津東面下浦里 |
國籍 | 朝鮮 |
籍貫 | 陽川許氏 |
職業 | 醫官、韓醫師 |
宗教信仰 | 儒教(性理學) |
配偶 | 貞敬夫人安東金氏 |
仔女 | 巴陵君許謙 |
父母 | 許碖、一直孫氏(嫡母)、靈光金氏(生母) |
親屬 | 許沃(異母兄)、許澂(同母弟) |
許浚(粵拼:heoi2 zeon3;韓文:허준/許浚 Heo Jun;1537年/1539年/1546年—1615年10月9號),字淸源(cing1 jyun4;청원/淸源Cheongwon),號龜巖(龜讀鳩,gau1 ngaam4[註 1];구암/龜巖Guam),係朝鮮中期宣祖同光海君時期(16世紀~17世紀)嘅醫官、醫學者,係出名嘅名醫,本貫陽川。佢係慶尚右道水軍節度使許琨嘅孫仔、龍川都護府使許碖嘅二仔。
佢有名在於佢係《東醫寶鑑》嘅著者,係朝鮮史上最傳奇嘅醫師,有「朝鮮醫聖」嘅稱號,對朝鮮醫學嘅事業發展有幾多重大貢獻。喺壬辰倭亂當時佢扈從宣祖,所以冊錄爲扈聖功臣。佢生前嘅官職去到從一品嘅崇祿大夫,封做陽平君,死後追贈爲正一品嘅輔國崇祿大夫,追封做陽平府院君。喺現代文化,佢嘅一世拍成劇集《醫道》。
生平
[編輯]幼年時節
[編輯]許浚係陽川許氏始祖許宣文嘅20世孫,佢阿爺係許琨,做武官,擔任慶尚右水使,老豆許碖亦係武官,做龍川府使。佢出世喺長湍都護府臨江面禹勤里[1],係老豆許碖同阿媽靈光金氏一齊生嘅庶子。佢好早就識字讀書,通達咗多方面嘅學問,當中特別係儒家、道家、佛家,佢心醉於呢啲綜合嘅東方思想。噉就爲許浚帶來擴大學問領域嘅結果,對日後執筆《東醫寶鑑》有至大影響。
出仕醫官
[編輯]宣祖時,1569年6月,許浚呢年約30歲,佢爲咗治療副提學柳希春嘅夫人去到漢城府,醫好咗柳希春夫人嘅病。就喺1569年當年,佢受吏曹判書洪曇同柳希春嘅推薦,入咗內醫院,無受試雜科就成爲宮中醫師,於是出仕做醫官,喺1570年,佢治療好柳希春嘅病,喺漢城府長安嘅高官大爵當中變到好出名,名聲好高。小說同啲戲描寫許浚喺1574年醫科受試及第後入咗內醫院,實際上喺醫科及第者記錄中無許浚嘅名。相反關於許浚嘅最初記錄係喺1571年佢做過從四品嘅內醫院僉正,喺1573年昇做正三品嘅通訓大夫同內醫院正。雖然佢無應試醫科,但啲事例證明佢有叻過同僚醫官嘅醫術。1578年9月,許浚做緊內醫院僉正,當時有新出版嘅《新刊補註銅人腧穴鍼灸圖經》,作爲國王嘅膳物下賜畀佢。
之後佢憑住內科醫術爲王室治療啲病立咗幾多大功。1587年,忽然心身虛弱嘅宣祖回復健康,於是內醫院嘅負責人同啲御醫都有得褒賞。呢陣時許浚同太醫楊禮壽、安德秀等都獲得下賜嘅膳物鹿皮一張。以後,佢又爲恭嬪金氏嘅細佬診療,醫好咗佢嘅口眼歪斜,個嘴正常返;1590年,許浚救返生咗王子信城君(仁嬪金氏嘅仔),憑住呢啲功佢昇進爲堂上官(指正三品通政大夫以上嘅官)。對於許浚做堂上官嘅事,三司(司憲府、司諫院、弘文館)同義禁府一齊出來彈劾呢件事,佢哋數番懇請王上話「治療好王子係醫官當然嘅事,就算有噉嘅功都好,醫官都唔應該出入喺堂上,所以要取消噉嘅事」,但宣祖唔聽。許浚攞到咗自宣祖同王子李琿(之後嘅光海君)嘅信任。
壬辰倭亂以後
[編輯]宣祖二十五年(1592年),壬辰倭亂爆發,件事殺傷好多百姓,個事態變到國王要避身去到義州。呢陣時許浚作爲御醫(王嘅主治醫師)睇住宣祖嘅健康。佢追從王室嘅行列,扈從宣祖,睇住佢健康嘅功勞令許浚入到日後功臣嘅隊列。1595年,佢根據別傳偏方爲王施鍼治療。呢陣時內醫院(別稱藥房)都提調金應南、提調洪進、副提調吳億齡等都有參與。1596年,佢接手王世子光海君嘅病,醫好咗佢,呢個功勞令許浚成爲正二品下階嘅資憲大夫,升級到同金應鐸、鄭禮男一樣。然後許浚做咗正二品上階嘅正憲大夫同中樞府正二品嘅知中樞府事。佢做正憲大夫嘅事即時引起三司嘅懇願彈劾,籲請取消畀醫官呢種待遇,但宣祖話「佢係有功勞者」而唔聽。1597年以後,許浚同儒醫鄭碏、太醫楊禮壽、金應鐸、李命源、鄭禮男等一齊設置編局編纂醫書,喺收集要點嘅時節發生丁酉再亂,持續到遞年1598年,醫官散曬,作業自然中止。之後宣祖再嗌許浚,要許浚擔起責任去編成新醫書,畀佢500卷內藏方書做參攷。
1600年,許浚做咗首醫(喺實職上喺內醫院最高嘅序列),兼職正二品嘅知中樞府事,由於楊禮壽病死,許浚成爲內醫院最叻嘅首醫。1604年,論功行賞,佢受封爲忠勤貞亮三等扈聖功臣,到1606年,最初係打算以醫官身份加封做正一品嘅陽平府院君,因爲臺諫嘅反對,降格爲從一品嘅陽平君。君係封畀王嘅庶子同堂上嘅位階,同府君嘅官爵好似。之後做從一品上階嘅崇祿大夫,因爲爲王室醫病嘅功勞,諗住封佢做正一品下階嘅輔國崇祿大夫,因爲輔國崇祿大夫係堂上官中文官受嘅位階,以呢個做理由,臺諫再次反對,將件事變爲白紙一張。喺1607年,國王嘅病好危重,無幾耐日命,許浚又用藥出錯,連日來朝廷話要罰首醫許浚嘅輿論好強,但宣祖唔想罰佢,信賴佢嘅醫術。
流配同末年
[編輯]1608年陰曆二月,宣祖病勢急迫,突然就駕崩,按照從來嘅慣例,朝廷啲大臣由於呢種政治目的,追究許浚各種各樣對宣祖嘅死嘅責任,結果罷職佢,將佢門外黜送去孔巖,至此佢做咗39年醫官。門外黜送係流放一種,係將帶罪之人送出漢城府四大門外,驅逐到其他地方嘅刑罰。光海君想早啲時日令許浚復歸,但三司反對,件事無咗着落。不過許浚喺當中繼續秉承1596年嘅王命編纂醫書;喺1609年陰曆十一月廿二(陽曆12月17號)畀光海君赦免召回,復職內醫院;喺光海君二年(1610年),許浚完成《東醫寶鑑》,編述完15年餘嘅研究。
《東醫寶鑑》名氣好高,譽爲朝鮮第一醫書,係本網羅咗當時全部醫學知識嘅臨牀醫學百科全書。佢同中國李時珍嘅《本草綱目》差唔多時候出版,不過因爲《東醫寶鑑》講得比較多種喺朝鮮嘅藥草,所以喺朝鮮使用佢更多。呢部作品呈現咗朝鮮古傳醫學嘅系統,促進咗朝鮮醫學嘅發展,另外佢又補充新觀點入東方醫學。《東醫寶鑑》不但對朝鮮漢方醫學嘅發展有好大影響,18世紀時仲刊行喺日本同清國,都獲得好高評價。而家呢部作品作爲出名嘅醫書,翻譯出版成世界多種語言。
佢其他嘅著書有《辟疫神方》《新纂辟瘟方》《諺解救急方》《諺解痘瘡集要》《諺解胎產集要》《纂圖方論脈訣集成》(諺解就係佢用諺文寫韓文去解書中嘅文言文)。
《東醫寶鑑》完成以後,許浚做啲培養後進、編纂醫書、修繕醫書等嘅事,1615年陰曆八月十七(陽曆10月9號)以77歲過世(若據1537年生說,噉佢享年79歲)。死後遞個月,光海君保留許浚生前嘅官爵,仲追封做正一品下階嘅輔國崇祿大夫、陽平府院君。
死後
[編輯]許浚嘅墓地喺佢嘅故鄉,位置喺南韓京畿道坡州市津東面下浦里過咗臨津江嘅非軍事中立區(DMZ),安葬住佢同佢夫人安東金氏同埋佢嘅生母。呢個墓地喺六二五戰爭以後就荒置咗,1991年,住喺美國嘅古文獻歷史學者李亮載教授喺軍部嘅協助下發現咗墓地,參加調查活動嘅仲有宗親會同埋許浚先生紀念事業會,而家墓地完全再整備過。1992年6月5號,許浚墓指定爲京畿道記念物第128號。2006年5月墓地作爲軍事安保觀光區域而開放。爲咗紀念佢,喺首爾江西區加陽洞整咗個公園龜巖公園。
經歷年表
[編輯]- 1571年,任官爲內醫院僉正(從四品)。
- 1573年,昇敘爲通訓大夫(正三品堂下),轉任爲內醫院正(正三品堂下)。
- 1587年,國王賜佢鹿皮。
- 1590年,昇敘爲通政大夫(正三品堂上)。
- 1596年,昇敘爲正憲大夫(正二品),轉任爲知中樞府事(正二品)。
- 1600年,遷任爲內醫院首醫(正三品堂上)。
- 1604年農曆六月廿四,封做忠勤貞亮扈聖功臣三等。
- 1606年,封做陽平君。
- 1608年3月,解任御醫,處以流配。
- 1609年農曆十一月廿二,獲得赦免,復歸內醫院。
- 1610年農曆八月初六,完成編纂《東醫寶鑑》。
- 1615年農曆八月十七,逝世。11月,贈位輔國崇祿大夫(正一品),新封爲陽平府院君。
家庭關係
[編輯]小說、戲
[編輯]1976年,李恩成攞許浚嘅生涯做題材寫咗個劇本,畀MBC(韓國文化放送)整成連續劇《執念》,以呢個做基礎,李恩成作出1990年出版嘅小說《小說 東醫寶鑑》,李恩成死後嘅1999年將小說拍成劇集《醫道》。喺呢齣戲,佢嘅老師柳義泰最後患咗反胃(而家講嘅胃癌),搵唔出病嘅原因,於是死後將遺體交畀許浚做全身解剖,來完成一世嘅心願,去搵得世上各類疾病嘅根源。
2013年3月,1999年播出劇集嘅重製版《龜巖許浚》開始播出。
飾演佢嘅人
[編輯]- 金茂生《執念》(1975年;MBC)
- 徐仁錫《東醫寶鑑》(1991年;MBC)
- 田光烈《醫道》(1999年~2000年;MBC)
- 崔秉學《王嘅女子》(왕의 여자;2003年~2004年;SBS)
- 金柱赫、姜漢別《龜巖許浚》(2013年;MBC)
- 朴榮奎《來自星星的你》(2013年~2014年;SBS)
- 尹施允、金甲洙《魔女寶鑑》(2016年;JTBC)
有關
[編輯]- 許浚阿媽係靈光金氏,係敬順王嘅後裔。
- 按陽川許氏嘅族譜,許浚老婆係安東金氏。
誤解
[編輯]喺電視劇度,許浚跟個叫柳義泰嘅人物學醫術,但實際上柳義泰係虛構人物,佢嘅原型劉爾泰係後許浚一百年以上嘅時期活動嘅醫師,所以同許浚完全無關係[2]。喺劇集又話許浚出世喺平安道嘅龍川,後來走咗去慶南山陰(山清),實際上佢係京畿道陽川出身嘅人。喺各種記錄都寫話「陽川人」,宣祖授予佢陽平君嘅品階亦根據呢個來嘅[3]。
爭議
[編輯]出生時期
[編輯]而家許浚嘅出生年度認證爲1539年,但喺1991年之前,佔支配嘅講法係據陽川許氏宗親會份族譜記載嘅1546年出生說。1991年,李亮載發現許浚嘅墓以後,慢慢噉有關許浚嘅出生年度嘅其他學說開始提起。當代官撰書籍除外嘅其他書籍,對出生年度嘅記錄好多講法,如1546年(明宗二年)、1547年(明宗三年)等。
最初對許浚嘅出生年度提起異議嘅人係李亮載教授,以後李亮載帶頭嘅史學者喺1999年發現咗一項記錄,喺朝鮮中期嘅儀禮書籍中嘅《太平會盟圖》度搵到佢嘅出生年度係己亥年,即佢喺1539年(中宗三十四年)生,同時代生存嘅文章家崔笠嘅文集《簡易集》度,崔笠將自身老友許浚喺1608年從義州歸鄉嘅事記錄低,當中言及嘅事實係許浚同佢自身同甲,亦即1539年生。呢份記錄係篇詩文,佢嘅題目係《贈送同庚大醫許陽平君還朝自義州》,意思係「贈送畀同我同庚嘅老友太醫陽平君許浚,佢從義州返朝廷」。
另外位置喺首爾特別市江西區嘅許浚博物館保管有內醫院嘅名簿《內醫先生案》,入面記錄許浚嘅出生年度係1537年丁酉年。許浚博物館嘅金快正館長嘅見解係當時內醫院嘅記錄正確過《太平會盟圖》嘅記錄。《內醫先生案》係1605年著述嘅名簿,入面有許浚直接寫嘅序文,記載住許浚嘅直系先輩(阿爸許碖、阿爺許琨、太爺許智)。不過許浚嘅享年記錄係77歲。《太醫院先生案》亦係記載許浚嘅出生年度係1537年丁酉年。不過若果許浚係1537年生人,到1615年過身時,當時佢嘅年紀會係79歲,呢個同《內醫先生案》嘅記錄唔同。
庶出爭議
[編輯]喺陽川許氏族譜度,記錄話許浚係庶子。大部分人都以爲許浚嘅生母係許碖嘅妾一直孫氏。不過事實上許浚嘅生母係許碖嘅再娶夫人靈光金氏。
薦舉許浚入內醫院嘅柳希春,佢有本日記《眉巖日記》,入面提到個人物叫金時洽,留低記錄話佢係許浚嘅舅父。書簡學者李亮載依據份記錄對金時洽嘅記述係「嫡舅」,主張話許碖嘅再娶夫人靈光金氏身爲庶女,許浚亦係庶子。但係呢個「嫡」表現出來只係意味住許浚嘅生母靈光金氏嘅同母兄弟係庶子,立證唔到許浚亦係庶子嘅事實。另外,許浚嘅同母弟許澂喺1586年及第到文科謁聖試丙科,佢嘅名同父母關係留低記錄喺當時嘅國朝榜目度。庶子係冇得參加文科(即大科),按呢個部分許浚嘅生母靈光金氏會係嫡室所生,話許浚同許澂兄弟都唔係庶子嘅主張係可能嘅。(雖則喺文科榜目檢索到許澂係話佢及第到文科,但亦有個別庶子及第到。喺朝鮮時代亦有庶子考到文科。但升官時個品階有限制)許浚喺1573年做正三品內醫院正嘅事留低記錄,喺1575年任命爲宣祖嘅御醫,許澂喺1586年嘅時間參加科舉,之後佢老母同許浚嘅同母弟許澂就唔係中人出身,而認證爲班家血族,許浚實際昇入堂上官班列嘅事喺1590年左右,係許澂及第科舉(1586年)四年後嘅事,因爲噉佢哋嘅出身係個謎。
許浚嘅後孫
[編輯]許浚唯一嘅仔係許謙。許謙及第文科,做過府使,以後封爵爲巴陵君。以後到朝鮮19代王肅宗時,佢嘅太孫許瑱受封爵號巴春君,許瑱嘅仔、許浚嘅太太孫許堉受封爵號陽興君。許堉嘅仔、許浚嘅五代孫許銑喺朝鮮21代王英祖時封做陽原君,許銑嘅仔、許浚嘅六代孫許潝亦係英祖時封爵爲陽恩君。就噉佢哋累代後孫都歷任朝廷官職,自先代住起嘅京畿道長湍郡禹勤里(而家京畿道坡州市),佢哋代代都居住嗰度。以後喺朝鮮後期,許浚嘅10代孫許堵(1827~1884)移居去黃海道海州,13代宗孫許亨旭(1924年生)直到1945年都住喺嗰度。
以後佢嘅直系宗孫直到而家都住喺北韓,而家南韓陽川許氏中有自稱話係許浚後孫嘅人,事實上佢哋唔係真係許浚嘅後孫,呢件事實已經由陽川許氏宗親會直接講明咗。
評價
[編輯]許浚作爲主治醫師,宣祖對佢評價話「廣泛噉通達諸書,用藥老練」(제서(諸書)에 널리 통달(通達)하여 약(藥)을 쓰는 데에 노련(老鍊)하다),朝鮮中期嘅學者李睟光評價話「許浚用豬尾膏做藥,醫好咗好多人嘅痘瘡,近來楊禮壽、許浚、朴齊家、孫士銘、安德秀等醫員嘅名並駕齊驅」(허준(許浚)이 저미고(豬尾膏)란 약(藥)으로 많은 사람들의 두창(痘瘡)을 고쳤으며, 근래(近來)에 양예수(楊禮壽), 허준(許浚), 박제가(朴齊家), 손사명(孫士銘), 안덕수(安德秀) 등(等)이 의원(醫員)으로 이름이 있을 뿐이다)。
喺日本稱佢做「韓國杏林扁倉」,即韓國出嘅扁倉,喺中國稱頌佢係「作出天下之寶嘅人」。
其他
[編輯]睇埋
[編輯]註
[編輯]- ↑ 「龜」字粵音有三,而韓文漢字音亦係有三,都係逐個對應。其中表示「烏龜」時,粵讀gwai1,韓讀귀(gwi);表示「裂開」時,粵讀gwan1,韓讀균(gyun);表示地名用字時,粵讀gau1,韓讀구(gu)。根據韓文讀音,許浚嘅號嘅龜字讀地名用字嘅發音。對於呢個地名用字嘅審音,粵語審音配詞字庫審音爲gau1,係據古音居求切(據《康熙字典》)得來,但出於避忌粗口嘅原因,《廣州話正音字典》審音爲kau1,因此若果讀者出於避忌考慮,可以將許浚嘅號龜巖讀爲kau1 ngaam4。
攷
[編輯]- ↑ 1.0 1.1 〈『동의보감』의 주인 허준의 고향은 어디?(漢諺:『東醫寶鑑』의 主人 許浚의 故鄕은 어디?[[Category:有韓文嘅文章]];粵譯:《東醫寶鑑》主人許浚嘅故鄉喺邊度?)〉. 《글로벌이코노믹(Global Economic;寰球經濟)》 (韓文). 2015年2月27號. 喺2017年2月13號搵到.
{{cite web}}
: URL–wikilink conflict (help) - ↑ 〈허준의 스승이라는 류의태는 허구다!(漢諺:許浚의 스승이라는 柳義泰는 虛構다![[Category:有韓文嘅文章]];粵譯:許浚嘅師傅柳義泰係虛構㗎!)〉. Chosun Media (韓文). 2015年12月11號. 原著喺2020年3月28號歸檔. 喺2017年4月9號搵到.
{{cite web}}
: URL–wikilink conflict (help) - ↑ 〈허준은 남다른 집념의 소유자(漢諺:許浚은 남다른 執念의 所有者[[Category:有韓文嘅文章]];粵譯:許浚係特別執念嘅所有者)〉. 《韓聯社》 (韓文). 2009年7月31號. 喺2017年4月9號搵到.
{{cite web}}
: URL–wikilink conflict (help)
出面網頁
[編輯]- 許浚博物館官方網站((韓文),內有中文版)
- 《醫道》DVD,AsianDB (英文)
- Naver人物韓國史:許浚 (韓文)