Al Pacino
Al Pacino | |
Pacino in September 2004.
| |
Geboortenaam | Alfredo James Pacino |
---|---|
Geboorte | 25 April 1940 Manhattan, New York-stad, VSA |
Nasionaliteit | Amerikaans |
Beroep(e) | Akteur, regisseur, draaiboekskrywer |
Aktiewe jare | 1967–tans |
Internet-rolprentdatabasis-profiel |
Alfredo James "Al" Pacino (geb. 25 April 1940) is ’n Amerikaanse rolprent- en verhoogakteur asook ’n regisseur en draaiboekskrywer. Hy word dikwels beskou as een van die beste akteurs van alle tye.[1] Sy loopbaan strek oor meer as 50 jaar waarin hy talle pryse en erepryse ontvang het, onder meer ’n Oscar, twee Tonys, twee Emmys, vier Golden Globes en pryse vir sy lewenslange bydrae tot die rolprentbedryf. Hy is een van min akteurs wat al minstens een Oscar, Emmy en Tony ontvang het.
Pacino is ’n metode-akteur en voormalige student van die Herbert Berghof Studio en die Actors Studio in New York-stad. Hy het sy rolprentdebuut in 1969 gemaak met ’n klein rol in Me, Natalie en in 1971 het hy lof gekry vir sy hoofrol as ’n heroïenverslaafde in The Panic in Needle Park. Hy het internasionaal beroemd geraak vir veral sy rol as Michael Corleone in Francis Ford Coppola se The Godfather (1972). Hy het sy eerste Oscar-benoeming daarvoor gekry en sou die rol ook in die opvolgprente Part II (1974) en Part III (1990) vertolk. Sy spel as Corleone word nou beskou as een van die beste vertolkings ooit op die silwerdoek.
Pacino het sy eerste Oscar-benoeming vir beste akteur vir Serpico (1973) ontvang; hy is ook benoem vir The Godfather Part II, Dog Day Afternoon (1975) en ...And Justice for All (1979), en het die prys gewen vir sy rol in Scent of a Woman (1992). Vir sy spel in The Godfather, Dick Tracy (1990) en Glengarry Glen Ross (1992) is hy benoem vir ’n Oscar vir beste manlike byspeler. Ander noemenswaardige rolle was in onder meer Scarface (1983), Carlito's Way (1993), Heat (1995), Donnie Brasco (1997), The Insider (1999) en Insomnia (2002). Hy was op TV in verskeie reekse, soos die minireeks Angels in America (2003), en die fliek You Don't Know Jack (2010) – vir albei het hy ’n Emmy gewen vir uitmuntende akteur in ’n hoofrol in ’n minireeks of TV-fliek.
Pacino het ook ’n lang lys rolle op die verhoog agter die rug en het twee Tonys gewen, in 1969 en 1977, vir onderskeidelik Does a Tiger Wear a Necktie? en The Basic Training of Pavlo Hummel. Hy is ’n groot aanhanger van Shakespeare en was die regisseur van Looking for Richard (1996), ’n dokumentêr oor die toneelstuk Richard III, ’n rol wat hy in 1977 op die verhoog vertolk het. Hy het ook self in die dokumentêr gespeel. Hy was ook te sien in ’n 2004-rolprentweergawe en 2010-verhoogproduksie van The Merchant of Venice.
Verwysings
[wysig | wysig bron]- ↑ "Pacino named 'greatest film star'" (in Engels). BBC. 5 Mei 2003. Geargiveer vanaf die oorspronklike op 7 September 2017. Besoek op 4 April 2011.
Eksterne skakels
[wysig | wysig bron]- Al Pacino in die Internet-rolprentdatabasis
Wikimedia Commons het meer media in die kategorie Al Pacino.
Hierdie artikel is vertaal uit die Engelse Wikipedia