Augustinus van Kantelberg
Augustinus van Kantelberg | |
---|---|
Heilige | |
Gebore | eerste derde van die sesde eeu, Rome |
Sterfte | 26 Mei 604 of 605, Canterbury |
Vereer in | Rooms-Katolieke Kerk, Oosters-Ortodokse Kerk, Kerk van Engeland |
Pelgrimsoord | Canterbury, Ramsgate |
Feesdag | 26 Mei (Anglikaanse Gemeenskap; Oosters-Ortodokse Kerk; Rooms-Katolieke Kerk; buitengewone kalender in Groot-Brittanje) 27 Mei (Rooms-Katolieke Kerk, gewone Kalender) 28 Mei (Rooms-Katolieke buitengewone kalender buite Groot-Brittanje) |
Sint Augustinus van Kantelberg (?-605) was 'n Italiaanse priester wat deur pous Gregorius I na Engeland gestuur is om die mense daar tot die Christendom te bekeer. Hy was die eerste aartsbiskop van Kantelberg.[1]
Augustinus was die prior (Latynse titel wat eerste beteken) van die Sint Andreasklooster in Rome wat deur pous Gregorius I gestig is. Dieselfde pous stel hom in 595 as die hoof van veertig monnike aan om 'n sending na Britannia te onderneem. Die doel van die sending was om koning Æthelberht van Kent (die Bretwalda van Engeland) en sy onderdane in die Koninkryk van Kent te kersten. Hierdie onderneming staan as die Gregoriaanse missie bekend.
Kent is waarskynlik gekies omdat Æthelberht met 'n Christelike prinses, Bertha die dogter van Charibert I, die Merowingiese koning van Parys, getrou het. Hulle het gedink dat sy 'n positiewe invloed op haar man gehad het. Voor die sending Kent bereik het, het hulle oorweeg om eerder om te draai, maar pous Gregorius spoor hulle aan om deur te druk. In 597 land Augustinus en sy missie op die Isle of Thanet. Vandaar reis hulle na Canterbury, die belangrikste stad in Æthelberhts se koninkryk.
Die missie was suksesvol. Koning Æthelberht bekeer homself tot die Christendom en gee die sendelinge toestemming om sy koninkryk te bearbei. Hy gee hulle ook land om 'n klooster buite die stadsmure van Canterbury te stig. Augustinus is daar as die eerste aartsbiskop van Kantelberg gewy. Hy bekeer talle van die koning se onderdane. Tydens 'n massabyeenkoms op die Kersfees van 597 het hy selfs duisende mense gedoop. Aangemoedig deur die sukses, stuur pous Gregorius in 601 bykomende sendelinge na Kent. Hy stuur ook bemoedigende briewe en geskenke vir die kerke. Alle pogings om die inheemse Keltiese biskoppe te oorreed om hulle aan die kerk van Rome te onderwerp loop egter op niks uit nie.
In 604 is Rooms-Katolieke biskoppe in Londen en Rochester aangestel. 'n Skool is ook opgerig om Angel-Saksiese priesters en sendelinge op te lei. Augustinus, wat blykbaar sy dood voel naderkom het, reël ook die wyding van sy opvolger, Laurentius van Kantelberg, een van die manne wat hom vanaf Rome vergesel het, om die tweede aartsbiskop van Kantelberg te word.
Augustinus van Kantelberg sterf waarskynlik in Mei van die jaar 604 of 605. Hy is kort daarna as 'n heilige verklaar. Sy gedenkdag val op 27 en 28 Mei en in Engeland op 26 Mei.
Verwysings
[wysig | wysig bron]- ↑ HAT Taal-en-feitegids, Pearson, Desember 2013, ISBN 978-1-77578-243-8
Eksterne skakels
[wysig | wysig bron]Wikimedia Commons het meer media in die kategorie Augustinus van Kantelberg.