Komsomol
Die Komsomol (Russies: Комсомо́л) was die jeugliga van die Kommunistiese Party van die Sowjetunie. Die volle naam was Коммунисти́ческий сою́з молодёжи (Kommoenistitsjeski Sojoez Molodjozji). Die voorloper van die Komsomol is in 1918 in die stadsgebiede van Rusland gestig. Dit was toe bekend as die Russiese Kommunistiese Jeugliga. In 1922 is dit hervorm tot die Всесоюзный Ленинский Коммунистический Союз Молодёжи (ВЛКСМ), die Lenin-jeugliga van die Hele Sowjetunie (WLKSM).
Oorsig
[wysig | wysig bron]Tydens die Russiese Rewolusie het die Bolsjewiste nie enige belangstelling getoon in die stigting van ’n jeugliga nie, maar teen 1918 het die Komsomol met lede van die Bolsjewisteparty ontmoet, hoewel die twee organisasies nie eintlik lede of beleide gedeel het nie. ’n Jaar later het die Bolsjewiste egter so te sê beheer oor die liga oorgeneem en dit is kort daarna gevestig as die jeugliga van die Kommunistiese Party.
Lede moes tussen 14 en 28 jaar oud wees, maar Komsomol-amptenare kon ouer wees. Jonger kinders het lid van die Pioniers van die Sowjetunie geword. Komsomol het min regstreekse invloed op die Kommunistiese Party gehad, maar dit was ’n belangrike leerskool vir die waardes van die party aan jongmense. Aktiewe lede het ook sekere voorregte geniet. Toe dit op sy grootste was, in die 1970's, het die Komsomol verskeie miljoene lede gehad: Sowat twee derdes van die huidige volwasse bevolking van Rusland was die een of ander tyd ’n lid.
Die hervormings van Michail Gorbatsjof, perestroika en glasnost, het eindelik ontbloot dat die Komsomol swak bestuur is. Die liga is lank gekenmerk deur konserwatisme en burokrasie en dit was polities eintlik magteloos. By die radikale 20ste kongres van die liga is die reëls daarvan verander om ’n markoriëntasie te vestig. Dit het die Komsomol egter vernietig – daar was geen doel meer nie, en belangstelling, lidmaatskap en die gehalte van lidmaatskap het afgeneem. Op die 22ste kongres van die liga, in 1991, is dit ontbind. Die spreekbuis van die liga, die koerant Komsomolskaja Prawda, het egter oorleef en bestaan vandag nog.
Bronne
[wysig | wysig bron]- Gooderham, Peter. "The Komsomol and Worker Youth: The Inculcation of 'Communist Values' in Leningrad during NEP," Soviet Studies 34.4 (1982): 506-28. in JSTOR
- Gorsuch, Anne E. “Soviet Youth and the Politics of Popular Culture during NEP,” Social History, 17.2 (1992): 189-201. in JSTOR
Eksterne skakels
[wysig | wysig bron]Wikimedia Commons het meer media in die kategorie Komsomol.
Hierdie artikel is vertaal uit die Engelse Wikipedia