Malakka
Malakka (Maleis: Melaka) is 'n staat in Maleisië. Die hoofstad is die gelyknamige stad, Malakka, met 'n inwonertal van 872 900 (2015-sensus).
Geografie en demografie
[wysig | wysig bron]Die staat is geleë in die suidweste van die Maleise skiereiland, aan die Straat Malakka, ongeveer 80 km van die Indonesiese eiland Sumatra. Malakka grens in die noorde aan die Maleise staat Negeri Sembilan en in die ooste aan Johor. Malakka is 'n klein staat met 'n totale oppervlak van 1650 km².
Inheemse Maleisiërs (50%) en Sjinese Maleisiërs (40%) vorm die twee grootste etniese groepe. Die Indiese Maleisiërs wat vanaf Indië afkomstig is vorm 'n minderheidsgroep.
Daar is ook 'n klein Europese minderheid van afstammelinge van vroeëre koloniale oorheersers. Onder andere afstammelinge van Portugese, wat 'n antieke Portugees-kreoolse taal praat, genaamd Kristangs. Daarnaas bestaan daar ook nog enkele afstammelinge van Nederlanders en Britte.
Verder vorm Malakka 'n belangrike vesting vir die Peranakan. Baie van hulle het hulself as gevolg van die handel tussen Indië en Sjinese in die pre-koloniale tyd hier gevestig.
Bestuurlike indeling
[wysig | wysig bron]Malakka is in drie distrikte onderverdeel:
- Alor Gajah
- Melaka Tengah (Sentraal-Malakka)
- Jasin
Hierdie distrikte is verder in 81 subdivisies verdeel.
Geskiedenis
[wysig | wysig bron]In 1377 word deur Majapahit 'n strafekspedisie gehou teen Parameswara, die Hindoe-prins van Palembang op Sumatra. Hy vlug na Malakka en stig daar in 1390 'n koninkryk. Hy regeer 1390-1414. Hy nooi die orang laut, die nomades van die see wat die handel in die argipel beheers om in Malakka 'n handelsentrum te stig. Siam is 'n groot bedreiging van sy onafhanklike ryk en in 1405 soek hy beskerming van die Chinese. Die enorme Chinese vloot van admiraal Zheng He (Cheng Ho) besoek Malakka reëlmatig tot 1434.. Die orang laut is hoofsaaklik Moslems en Parameswara het moontlik self op die einde van sy lewe ook Moslem geword en word ook Iskandar Syah genoem. Sy twee opvolgers Megat Iskandar Syah (1414-1424) en Muhammad Syah (1424-1444) was ook Moslems, die vierde sultan Parameswara Dewa Syah (1445-1446) was dalk 'n Hindoe. Hy word skielik vermoor en vervang deur sy halfbroer, sultan Muzaffar Syah (1446-1459). Islam is sedert sy bewind die heersende religie. In sy tyd ontwikkel Malakka tot 'n belangrike staat wat aan altwee kante van die Straat gebied beheers en voedsel, tin, goud en peper produseer en handel oor die hele argipel dryf.[1]
Dit trek die aandag van die Portugese wat in 1510 Goa op die kus van Indië verower. Hulle stuur eers vir Diogo Lopes de Sequeira om vreedsame handelsbetrekkings met Malakka te bewerkstellig. Hy word in 1509 deur sultan Mahmud Syah (1488-1528) eers goed ontvang, maar die Muslem-handelaars is bedug vir hierdie nuwe kompetisie. Hulle dood heelparty van sy mans. In April 1511 stuur die Portugese 'n vloot vanuit Goa met 17/18 skepe en 1200 mans en verower Malakka.[1]
Eksterne skakels
[wysig | wysig bron]- Meer oor Malakka op Maleisie.be
Wikimedia Commons het meer media in die kategorie Malakka.
Verwysings
[wysig | wysig bron]- ↑ 1,0 1,1 A History of Modern Indonesia since c.1200 M.C. Ricklefs Macmillan International Higher Education, 2008, ISBN 1-137-14918-3, ISBN 978-1-137-14918-3