Alexander Frei
Alexander Frei | ||
Personalia | ||
---|---|---|
Wänn uf d Wält choo | 15. Juuli 1979 | |
Wo uf d Wält choo | Baasel, Schwyz | |
Größi | 179 cm | |
Position | Stiirmer | |
Junioren | ||
Johr | Station | |
1987–1988 | FC Begnins | |
1988–1995 | FC Aesch BL | |
1995–1997 | FC Baasel | |
Herre | ||
Johr | Station | Spil (Tor)1 |
1997–1998 | FC Basel | 11 | (1)
1998–1999 | FC Thun | 32 | (6)
1999–2000 | FC Luzern | 53 (17) |
2001–2002 | Gänf Servette | 64 (36) |
2003–2006 | Stade Rennes | 100 (47) |
2003–2006 | Stade Rennes B | 5 | (7)
2006–2009 | Borussia Dortmund | 74 (34) |
2008–2009 | Borussia Dortmund II | 1 | (2)
2009–2013 | FC Baasel | 103 (73) |
Nationalmannschaft | ||
Johr | Uuswahl | Spil (Tor)2 |
1995–1996 | Schwyz U18 | 5 | (1)
1996–1997 | Schwyz U19 | 4 | (3)
1999–2002 | Schwyz U21 | 19 | (9)
2001–2011 | Schwyz | 84 (42) |
Statione als Trainer | ||
Johr | Station | |
2013–2014 | FC Luzärn (Sportdiräkter) | |
2015 | AS Timau Baasel | |
2016–2017 | FC Baasel U-15 | |
2017– | FC Baasel U-18 | |
2018 | FC Basel (Interimstrainer) | |
1 Aagää sind nur Ligaspiil. Stand: Kariereändi 2 Stand: 7. Juuni 2020 |
Dialäkt: Baseldytsch |
Dr Alexander Frei (* 15. Juli 1979 z Baasel) isch en eemoolige Schwyzer Fuessballspiler.
Verein
[ändere | Quälltäxt bearbeite]Verein in dr Schwyz
[ändere | Quälltäxt bearbeite]Dr Alexander Frei hèt sy Karriere 1997 aagfange bim FC Baasel, won er sich aber nit hèt kenne dursetze. 1998 isch er zùm FC Thun in di zwaitheggscht Spiilklasse gwäggslet, aber scho ai Joor speeter isch er sym Trainer André Egli zùm FC Luzern gfolgt. An dr Syte vom Kubilay Türkyılmaz hèt er dert syni èèrschte NLA-Gool gschosse. Vu 2001 bis 2002 hèt dr Frei erfolgryych fir Servette Genf gspiilt.
Stade Rennes
[ändere | Quälltäxt bearbeite]In dr Winterpause vo dr Saison 2002/03 hèt er bim franzesische Club Stade Rennes ùnterschriibe. In dr Matsch derno isch dr Frei praktisch nie zum Yysatz koo. Är hèt nùme ai Gool erziilt und hèt ai Penalty verschosse. Zue dr Saison 2003/04 isch s z Rennes zuen eme Trainerwäggsel koo. Dr nei Trainer László Bölöni hèt dr Frei vilmol yygstetzt ùnd dää hèt sich defir mit 20 Saisongool revanchiert, wo ne zùm zwaiterfolgryychschte Goolschitz vu dr heggschte franzesische Liga gmacht hän. Eso dräffsicher isch usser em André Abegglen, em Stéphane Chapuisat ùnd iim no kai Schwyzer im Uusland gsii. Ai Johr speeter, in dr Saison 2004/05, isch er Goolschitzekeenig vo dr Ligue 1 worde.
Borussia Dortmund
[ändere | Quälltäxt bearbeite]Dr Alexander Frei isch zue dr Saison 2006/07 gege ne Ableessumme vo eppe 4,1 Millione Euro zùm Bùndesligaverain Borussia Dortmund gwäggslet, won ere e Verdraag iber vier Joor ùnterschriibe hèt. Scho in syyre èèrschte Saison hèt dr Frei mit 16 Gool e groosse Aadail am Glasseverblyyb vom BVB ghaa.
Wäg ere Hùftoperation im Mai 2007 ùnd zwai Muskelfasereriss im Spotsùmmer 2007 hèt er bis aafangs 2008 nimi fir dr BVB oder d Schwyzer Nationalmannschaft kenne spiile. Syy èèrschte Bflichtmatsch no syyre Operation hèt dr Frei zum Rùckrùndenùfdaggt geege dr MSV Duisburg ghaa, im Ländermatsch gege Dytschland am 26. März 2008 isch er in s Team vo dr Schwyz zrùggkeert. Syy èèrscht Gool no syyre lange Verletzigspause hèt dr Frei am 6. April 2008 im Matsch vom BVB gege Bayer 04 Leverkusen erziilt. Dert isch em in dr 87. Spiilminute dr zwischezytlig Uusglyych zùm 1:1 glùnge. Mit Borussia Dortmund isch dr Alexander Frei am 19. April 2008 im DFB-Pokal-Finale z Berlin gstande, wo d Mannschaft mit 1:2 no Verlengerig geege dr FC Bayern München verloore hèt.
Wäg syyre Verletzig bi dr Europamaischterschaft 2008 hèt dr Frei dr Saisonstart vo dr Borussia in d Bùndesliga-Spiilzyt 2008/09 verbasst. Won er syy Verletzig wider uuskùriert ghaa hèt, isch er am 13. Septämber 2008 im Revierderby gege dr FC Schalke 04 zùm èèrschte Mool wider im Kader vom BVB gstande ùnd hèt do glyy zwai Gool gschosse. Insgsamt isch er bis zùm Saisonändi ùf zwelf Gool in 29 Matsch koo.[1]
FC Baasel
[ändere | Quälltäxt bearbeite]Im Juuli 2009 isch dr Alexander Frei zùm FC Baasel gwäggslet, won er no als Jùùgedspiiler verloo ghaa hèt. Borussia Dortmund hèt fir dää Transfer e Ableessùmme vo rùnd 4,25 Millione Euro iberkoo. Scho in syym èèrschte Bflichtmatsch hèt er in dr 90. Minute dr 2:1-Siigdräffer gschosse im Matsch geege dr FC Sion.[2] In dr glyyche Saison hèt dr Alexander Frei syy èèrschte Maischtertitel und mit em Cupsiig au s èèrscht Double. In dr Säsong 2010/11 isch er mit em FC Basel wider Schwizermäister worde, und het sälber 27 Gool gmacht und isch Goolschützeköönig worde.
Am 21. Septämber 2011 isch im Frei im Joggeli bim 6:0-Häimsiig gegen e FC Lausanne-Sport e Hattrick glunge.[3]
2013 het dr Alexander Frei sinere Brofikarriere en Ändi gmacht und het bim FC Luzärn as dr nöi Sportsschef underschriibe. Am 11. April 2013 het er sis letschte Öiropacöpspiil gege Tottenham Hotspur gspiilt, wo Baasel im Benaltischiesse mit 4:1 gwunne het.
Nationalmannschaft
[ändere | Quälltäxt bearbeite]Dr Alexander Frei hèt am 24. März 2001 gege Serbie und Montenegro (1:1) in dr Schwyzer Nationalmannschaft debütiert. Mit zwai Gool im letschte Teschtspiil vor dr Euro 2008 gege dr Noochber Liechtestai hèt er dr bishärig Nati-Rekordschitz Kubilay Türkyılmaz (34 Dräffer) iberhoolt. 2005 ùnd 2007 isch er zùm Spiiler vom Joor gweelt worde. Wel bi Länderspiil e baar Mool vomene Dail vom aigene Pùblikùm uusbfiffe worden isch, hèt er am 4. Novämber 2010 syy Ruggdritt us dr Nationalmannschaft per Ändi Saison 2010/2011 ergleert.[4]
Turnier
[ändere | Quälltäxt bearbeite]Dr Frei hèt fir d Schwyz bishär an drei groosse internationale Turnier dailgnoo: Bi dr Europamaischterschaft 2004 isch er mit dr Schwyzer Nati ooni Siig scho no dr Voorrùndi uusgschiide. Derzue hèt er im Matsch geege Ängland syy Geegespiiler Steven Gerrard aagspeizt ùnd isch derno fir dr rächtlige Turnierverlauf gspèèrt worde.
Bi dr Wältmaischterschaft 2006 isch d Nati erfolgryycher gsi; au dùr zwai Dräffer vom Frei isch d Schwyz bis in dr Achtelfinal koo, wo d Mannschaft aber geege d Ukraine im Pn#enaltyschiesse uusgschiiden isch.
In dr zwaijèèrige Voorberaitig ùf d Europamaischterschaft 2008 im aigene Land isch dr Frei vom Trainer Köbi Kuhn zùm neie Captain vo dr Nati ernännt worde, wo syy Voorgänger Johann Vogel us dr Nationalmannschaft uusgmuschteret worden isch. Scho im Ereffnigsmatsch vom Turnier geege Tschechie hèt er aber no dr èèrschte Halbzyt miessen uusgwäggslet wärde, wel er sich bimene Zwaikampf mit syym Geegespiiler Zdeněk Grygera e Verletzig vom Inneband im lingge Gnyy zuezoge ghaa hèt. Wäge däre Blessur isch er fir dr wyter Verlauf vom Turnier uusgfalle, wo fir d Schwyz wider mit eme Vorrùndeuus ùfghèèrt hèt.
Titel und Erfolg
[ändere | Quälltäxt bearbeite]Servette Genf
- Schwyzer Cupsiiger: 2001
FC Baasel
- Schwyzer Maischter: 2010, 2011, 2012
- Schwyzer Cupsiiger: 2010, 2012
Weblink
[ändere | Quälltäxt bearbeite]Commons: Alexander Frei – Sammlig vo Multimediadateie
- Websyte vom Alexander Frei
- Alexander Frei uf dr Websyte vo dr Swiss Football League
- Spiilerprofil ùf dr Homepage vo L'Équipe (franzesisch)
- Spiilerprofil ùf dr Homepage vo dr Ligue 1 (franzesisch)
- Alexander Frei in dr Datebank vu Weltfussball.de
Fuessnote
[ändere | Quälltäxt bearbeite]- ↑ Saison 2008/09 ùf weltfussball.de. Archiviert vom Original am 5. März 2016; abgruefen am 5. November 2010.
- ↑ kicker: Perfekt: Frei wechselt nach Basel
- ↑ Basel überrollt Aufsteiger Lausanne. Neue Zürcher Zeitung AG. 2011. Abgrüeft am 21. September 2011.
- ↑ Alex Frei erklärt seinen Rücktritt – per Ende Saison (Memento vom 6. Novämber 2010 im Internet Archive) Tages-Anzeiger vom 4. Novämber 2010
Dä Artikel basiert uff ere fräie Übersetzig vu dere Version vum Artikel „Alexander_Frei“ vu de dütsche Wikipedia. E Liste vu de Autore un Versione isch do z finde. |