S Basler Gotthälf Quardier

Gotthelf Quartier vo Basel
Flechi	0,47 km²
Iiwohner	6692 (Dez. 2008)
Bevölkerigsdichti	6692 / 0.47 Iiwohner/km²
Usländeraadeil	23,8 %
BFS-Nr.	2701-009
Postleitzahl	4054

Dialäkt: Baseldütsch

S Gotthälf isch e Stadtdeil vo dr Schwiizer Stadt Basel. Es lit am westlige Stadtrand und gränzt im Norde an s Iseli Quardier (Allschwilerstrooss, Ahornstrooss), im Weste an d Baselbieter Gmeind Allschwil (Im lange Loh) und im Süde an s Bachlette Quardier (Wanderstrooss, Weiherwäg); östlig lit s Am Ring Quardier (Spalering).

S Gotthälf-Quardier, s Gotthälfschuelhuus und d Gotthälfstrooss si noch em Jeremias Gotthelf benennt.

Deil vom Gotthälf und vom Bachlette Quardier möche dr inoffiziell Stadtdeil Neubad us.

Bevölkerig

D Bevölkerig im Quardier isch sit 1980 vo 7875 Iiwohner uf 6692 im Johr 2008 gfalle und isch stark überalteret. Ändi 2008 si 56% vo de Lüt wiiblig, 44% männlig gsi. Öbbe zwei Drittel vo de Iiwohner si erwachseni Schwiizer Bürger gsi, e Zähntel Chinder mit Schwiizerpass. Fast e Viertel vo der Bevölkerig si Usländer gsi, drunder het s nume sehr wenig Chinder und Jugendligi gha.

Religion

D Sekularisierig isch in de letzte Johrzähnt stark fortgschritte. Fast d Helfti vo dr Bevölkerig isch Ändi 2008 konfessionslos gsi, 45% im Vergliich zu 25% im Johr 1980. Dr Aadeil vo de Protestante isch in dere Ziit vo 39% uf 21% gfalle, vo de Katholike vo 29% uf 18%. Au die jüdisch Gmeind isch um e Drittel uf 2% gschmulze. Gwachse si die ost-christligi Bevölkerig (uf 1.5%) und die islamischi (uf 3.5%).

Gebäud und Sehenswürdigkeite

• S Schwiizer Filmmuseum
• S Merian-Iseli Spital

Weblingg

• Statistischs Amt vom Kanton Basel-Stadt - Quardierportrait Gotthälf