Imperio Britanico
Se conoxe como Imperio britanico a las tierras que pendeban politica e economicament d'a Gran Bretanya. O momento de mayor importanzia d'o Imperio estió a prenzipios d'o sieglo XX, probablement entre 1890 e 1910, quan teneba una poblazión d'entre 400 e 500 millons de presonas e bels 33 millons de quilometros cuadratos, lo que significaba alto u baixo una cuarta parti d'a poblazión mundial e dos zinquenas partis d'as terras emerxitas.
O Imperio se desarrolló mientres uns 300 años, a traviés d'una serie de fases relazionatas con o comerzio, a colonizazión e a conquista en las que estendilló as suyas mugas, antimás de periodos d'autibidat diplomatica.
Grazias a lo Imperio britanico a tecnolochía, o comerzio, o idioma anglés e o gubierno britanicos s'esbandioron por tot o mundo. A exemonía imperial contrebuyó a lo espeutacular creximiento economico de Gran Bretanya e a lo peso d'os suyos intreses en o eszenario mundial.
O primero en emplegar a expresión "Imperio britanico" estió lo dotor John Dee, astrologo, alquimista e matematico d'a reina Isabel I d'Anglaterra.
Bels territorios que han formato parti d'o Imperio britanico son: Irlanda, Estatos Unitos, Canadá, Chamaica, Australia, Nueba Zelanda, India, Malaisia, Echipto, Surafrica, Nicheria, Camerún, Kenia, Hong Kong, Iraq, Chipre, Chibraltar u Menorca entre muitos atros. Hue en día bels d'istos territorios, ya independients, reconoxen os suyos lazos con Gran Bretanya a traviés d'a Commonwealth. Plantilla:Destacato Plantilla:Destacato