Prunus domestica
Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla. |
- Iste articlo tracta sobre a cerollera Prunus domestica. Ta atros emplegos de «cerollera» se veiga Cerollera (desambigación).
Prunus domestica | |
---|---|
Cerollera en a Republica Checa. | |
Denominacions populars | |
Cerollera, cerollero, cergollero, ceruellera, ciruellera, cerullera, cirueller, cergoller, prunera, pruner
| |
Estau de conservación | |
Clasificación cientifica | |
Eukaryota | |
Plantae | |
Magnoliophyta | |
Magnoliopsida | |
Rosales | |
Rosaceae | |
Amygdaloideae | |
Amygdaleae | |
Prunus | |
P. domestica | |
Descripción | |
Prunus domestica
LINNAEUS, 1753 |
A cerollera[1] domestica u cerollero domestico (Prunus domestica[2] (L., 1753)) ye un árbol fruital d'o chenero Prunus, en a familia d'as rosacias y subfamilia d'as amigdaloidias[3] (linache d'as almendreras), cautivau mas que mas por o suyo fruito comestible: a cerolla.
O chenero Prunus, a lo cual a cerollera pertenece, ha seu obchecto de reclasificación recient[3] por o gran numero d'especies que concabeba; a presencia de muitas d'as cuals se debeba a la laxitut d'os caracters especificos con que s'heba descrito anteriorment o taxon.[3] A cerollera, d'o suyo fruito dimana o nombre d'o chenero (lat. <PRUNA), se troba actualment claseficau en o subchenero Prunus.
Descripción
[editar | modificar o codigo]Como muitos d'os fruitals Prunus propiament ditos, a cerollera ye un árbol caducifolio de mida mediana, que anque gosa poder creixer dica 10 metros d'altaria, de regular no pasa t'alto d'os 5 metros. A corona ye ampla, diafana, con as ramas deseparadas, que con frecuencia parten de forcallos a baixa altaria. O tronco ye curto.
A crosta ye grisa u marrón, rugosa y firme estriada en o tronco y as ramas, pero ye lasa y brillant en as brancas chóvens, de color mas royisca.
As follas fan entre 4 y 10 cm de largaria por 2–4 cm d'amplo, ovadas, elipticas u ovo-lancioladas, de forma que recordan muto a las d'a manzanera.
As flors son solitarias, anque como en muitas rosacias pasa bellas vegadas amaneixen agrupadas. Os petalos son blancos, de 8 dica 13 mm de largos. Os estambres en multiplo de 5 son largos y tienen as anteras amariellas. O receptaclo ye infero, glabro u pubescent, y de 4–10 mm.
O fruito ye una drupa pura, monocarpelar, glabra, de forma elipsoidal y d'entre 3 y 6 cm de diametro. Recibe o nombre mayoritario de «cerolla»[1] en o dominio lingüistico aragonés, especialment en Sobrarbe, Alto Galligo, Chacetania, Semontanos de l'Alto Aragón y os Monegros, pero tamién tiene variants como «cerola», «cerolda», «acerolla», «ciruella», «ciruela», u «ceruella»,[1] (lat. <CEREŌLA) y en as comarcas mas orientals de l'Alto Aragón se documenta como «pruna»[1] (lat. <PRUNA).
Fitonimia
[editar | modificar o codigo]A cerollera, como o suyo fruito, tiene diferents nombres u fitonimos en aragonés, a mayoría d'os cuals vienen de l'hipotetico etimo latín *CEREOLARIA> u *CEREOLARIU>, y iste de <CEREŌLA, «cerulia/feita de cera», en referencia a o fruito: cerollera, cerollero, ciruellero/a (pronunciau zirgüellero/a[1] con protesi velar), cerolero, cirollera, cirgollera, cirigollero, ceriuellero/a (pronunciau zerigüellero/a[1] con protesi velar), cercoller (zercollé[1]), cirulera, ciroldera, cirroldero, cirgoller, etc.
As variants con -ll- en aragonés se remontan seguntes Manuel Ariza Viguera a variants latinas como CEREOLEUM u CERULEUM[4], y se tornan a trobar en parolas y toponimos d'os dominios galaicoportugués (cerollo con o significau d'aranyón) y astur-leyonés (Cerulleda)[5].
Os eixemplars bordes que a sobén se troba en os arredols d'as zonas de cultura reciben o nombre de «cascavillers»[1], y os suyos fruitos, que por no recibir cultura gosan estar mas chicoz y inapofeitables que as cerollas, se documentan con o nombre popular de «cascavels»[1] u «cascavillos».[1]
Imáchens
[editar | modificar o codigo]-
Florada.
-
Madera.
-
Prunus domestica
-
Cerollas royas.
-
Cerollas moradas.
Referencias
[editar | modificar o codigo]- ↑ 1,00 1,01 1,02 1,03 1,04 1,05 1,06 1,07 1,08 1,09 (an) VIDALLER TRICAS, Rafel, Libro de As Matas y Os Animals; Dizionario aragonés d'espezies animals y bechetals; Ed. Val d'Onsera. Zaragoza 2004. ISBN 978-84-8986-235-7
- ↑ (la) LINNAEUS, C.. 1753. Species Plantarum. Tomo I. Pag. 475.
- ↑ 3,0 3,1 3,2 (es) Estudios sobre el género Prunus en el Neotrópico; consultau o 22 d'aviento de 2015.
- ↑ (es) Manuel Ariza Viguera: Geografía lingüística y toponimia de la "Pruna domestica" L. y de la "Pruna spinosa " L. en la Península Ibérica. Boletín de la Real Academia Española, ISSN 0210-4822, Tomo 55, Cuaderno 204, 1975, pp 37-82.
- ↑ (es) José Luís Pensado: Estudios asturianos. Volumen 10 de Llibrería llingüística. Academia de la Llingua Asturiana, 1999. ISBN 8481681806, 9788481681802. p 223.
Vinclos externos
[editar | modificar o codigo]Se veigan as imáchens de Commons sobre Prunus domestica.
Wikispecies tiene un articlo sobre Prunus domestica.