Xordica Editorial
Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla. |
- Ista pachina tracta sobre a editorial Xordica. Ta las plantas con identico nombre, se veiga o chenero Urtica.
Xordica Editorial, SL. | |
---|---|
Datos chenerals | |
Eslogan | {{{slogan_interpresa}}} |
Establimiento | 1994 |
Localización | |
Enfiladors | {{{enfiladors}}} |
Industria | Editorial |
Productos | |
Beneficios | {{{reuto}}} |
Emplegatos | {{{emplegaus}}} |
Pachina web | |
Pachina web | www.Xordica.com |
Retes socials | |
@Xordica | |
Xordica Editorial |
Xordica Editorial ye una interpresa editorial aragonesa con seu en o municipio de Villanueva de Galligo (Comarca de Zaragoza), propiedat de l'editor y escritor aragonés Chusé Raul Usón. Ye constituita como Sociedat Limitata[1] y fue establita en 1994[2][3].
Se define como una editorial independient[3], y dende es suyos principios ha destacato lo suyo treballo con escritors novels[2] y obras que, d'unatra manera, trobarían dificultaz ta estar publicatas. Anque o foco principal d'a suya actividat ye a narrativa, tamién ha dato salita a numerosas obras sobre a luenga aragonesa, tanto escritas en o propio idioma como de divulgación y cientificas sobre ella en castellano.
Fuén pioners, d'entre as editorials aragonesas, en tener una pachina web bilingüe en aragonés y castellano.
Coleccions
[editar | modificar o codigo]Fue a primer colección d'a editorial, establita en 1994 ta dar espacio a narrativa breve, relatos y cuentos[4]. Usón a describió, en 2011, como a «locomotera» d'a editorial[3][4] por a suya importancia en ventas y o numero d'obras espublicatas.
Chós d'ista coleción s'ha publicato a autors como Jesús Moncada, Juan Perucho y Javier Tomeo, pero tamién autors novels como Daniel Gascón, Cristina Grande y Fernando Martín Pescador. Aragoneses, d'a resta d'Espanya, y tamién estranchers.
Los Libros de la Falsa
[editar | modificar o codigo]Creyada tamién en 1994, se planteyó en as suyas oríchens ta dar-le cabita a lo que no cabeba en «Carrachinas»[4]: ensayos, biografías, articlos periodisticos, etc.
Con Los Libros de la Falsa s'ha expulicato a José Antonio Labordeta, a David Trueba, Antón Castro, Luis Alegre, etc. En l'actualidat, tiene mas de 20 títols, y ha concabito y ha servito ta dar-le salita a, d'entre belatras cosas, publicacions sobre Aragón mas amanadas a la etnolochía y as ciencias humanas, que malament hesen puesto estar publicatas por atros editors mas comercials.
Xordiqueta
[editar | modificar o codigo]A colección infantil y chovenil d'a editorial. Contién obras orientatas as ninos y chóvens, literatura ilustrata, y cualques obras premiatas. A tematica cheneral ye de biografías d'aragoneses ilustres, orientatas a os críos.
Simient negra
[editar | modificar o codigo]Colección totalment en aragonés. A creyón en 1997, ta poder espublicar a autors aragoneses actuals en luenga vernacla. O suyo libro mas vendito ye Alredor d'a chaminera (2001), de José María Satué, con mas de 1.000 eixemplars[4]. El sigue O rafe d'o espiello (1997), d'Ánchel Conte.
Actualment (2015) tiene 24 títols espublicatos, toz en aragonés, y ye a principal y mas activa colección en luenga aragonesa en o panorama literario. A suya importancia s'alazeta en que fa accesible a obra literaria contemporania en aragonés a o publico cheneral.
O suyo nombre dimana d'a dovineta altoaragonesa que diz «Campo blanco, simient negra. Cinco bueis y una rella.[4] Qué ye?», d'a cual a respuesta ye «a escritura», estando a simient negra la tinta.
S'ha expublicato baixo ista colección a autors maternos en luenga aragonesa como Elena Chazal (aragonés ribagorzano), Victoria Nicolás (aragonés cheso), Quino Villa (aragonés chistabín), en chunto con belatros en stándard aprendito, como Francho Nagore, Chusé Inazio Nabarro y o propio Chusé Raul Usón.
Titulata en nombre d'a criatura mitolochica aragonesa con a que s'espantaba a os críos, ye pensata ta dar conoixencia d'obras de literatura chovenil.
Cuadernos Jean-Joseph Saroïhandy
[editar | modificar o codigo]Creyata en 2004, ha servito ta dar publicación a tractatos y ensayos d'a mas pura filolochía y lingüistica sobre l'aragonés. Ye una colección fundamentalment adedicata a la divulgación cientifica, y contiene, d'entre belatras actuals, as obras mas sinyaleras d'os primers investigadors de l'aragonés, como W.D. Elcock, Alwin Kuhn y o propio pinero de pioners, Saroïhandy, de qui dimana o nombre d'a colección.
Pirineus
[editar | modificar o codigo]Establita en 2011, ye a mas nueva, y ye pensata ta expublicar a obra en aragonés d'autors que no tuvon a suerte de veyer-se publicatos en vida, por no estar escritors profesionals, u porque os suyos escritos fuen destinatos a publicacions que a par d'alavez os consideraban mas dialectals y/u folkloricos que serios.
A colección se composa de hueito títols, y con ella s'ha espublicato a autors d'a «eclosión dialectal» de l'aragonés, costumbrista y rural, en os sieglos XIX y primera metat d'o XX, como Cleto Torrodellas en aragonés ribagorzano u Leonardo Escalona en aragonés belsetán.
Referencias
[editar | modificar o codigo]- ↑ (es) Xordica Editorial en o portal empresia.com, consultato lo 21 de septiembre de 2015.
- ↑ 2,0 2,1 (es) Ficha en La Librería de Javier, consultata lo 21 de septiembre de 2015.
- ↑ 3,0 3,1 3,2 (es) Blog oficial de Xordica Editorial, consultato lo 21 de septiembre de 2015.
- ↑ 4,0 4,1 4,2 4,3 4,4 (an)(es) www.Xordica.com, web oficial d'a Editorial, consultata lo 21 de septiembre de 2015.