Tributu de les Cien Doncelles

El tributu de les cien doncelles foi un reconocimientu de la supremacía del Emiratu de Córdoba sobro'l reinu d'Asturies, ente finales del sieglu VIII y mediaos del sieglu IX.

Nel añu 783, Mauregatu (fíu bastardu d'Alfonsu I d'Asturies) toma'l tronu asturiano cola aida d'Abderramán I, col que se compromete al pagu del tributu de les cien doncelles pola so collaboración. Nel añu 788, los condes Don Arias y Don Ovecu rebeláronse escontra'l rei Mauregatu y asesináronlu como venganza d'haber dao a los moros tal tributu. El rei Bermudu I d'Asturies, el so socesor, quier finar col tributu trocándolu por un pagu en dineru. A Bermudu socéde-y Alfonsu II el Castu (791–842), que refuga tamién del tributu en dineru y entra en batalla escontra los moros pa evitar el so pagu, venciendo na batalla de Lodos y matando al capitán moru Mugait, colo que consigue'l so propósitu.

Postreramente Abderramán II, en tiempos del rei Ramiru I d'Asturies, atrévese a pidir otra vegada'l tributu de les cien doncelles. Esti, al tar nuna situación de debilidá, y dempués de reunir a los sos conseyeros, accede otra vegada al pagu del tributu. Col tributu vixente de nuevu, dase'l fechu/lleenda de que, los de Simancas, entregen les siete doncelles que-yos correspuenden, coles manes cortaes. Como consecuencia d'esti fechu, los cristianos salieren a pelear escontra los moros, dándose la mítica batalla de Clavijo, na que'l propiu apóstol Santiagu participare. Véncese al exércitu moru, y desaparez el tributu.