ساندريلا
ماتّخلعش! هاد لميصاج مديور باش تشوفو لفرقة ديال الصيانة و لمراجعة د لمقالات، و ماكيعنيش بلي درتي شي غلط! |
لمعلومات لّي ف هاد لمقالة ؤلا هاد لفقرة ناقصين ف توتيق، خاصّ يتزادو فيها عيون لكلام باش تكون موتوقة. شوف هنا كيفاش تزيد لعيون. ماتّخلعش! هاد لميصاج مديور باش تشوفو لفرقة ديال الصيانة و لمراجعة د لمقالات، و ماكيعنيش بلي درتي شي غلط! |
ساندريلا (بالطاليانية Cenerentola، بالفرانساوية Cendrillon، بلالمانية Aschenputtel)، ؤلا السباطة ديال الزاج الصغيرة هي من الحكايات الشعبية المعروفة فالعالم كامل، بفضل التواتر ديالها وتمتيلها فبزاف ديال الوسائط باش تعرفات ووصلات للناس. على العموم، القيصة ديالها كتبين جوانب فالعلاقات الإنسانية، بحال الضلم والحݣرة ومن الجهة الاخرى المكافأة ديال المضلوم اللي كينتصر فاللخر وأن الضلم واخا كاع يكون واعر فاللول ولابد يسالي ويكمل. كتهضر القيصة على واحد البنت سميتها ساندريلا اللي كتعيش ضروف صعيبة فاللول ولكن كتقلب من بعد حياتها وتعيش مزيان ومرفحة. الكلمة د ساندريلا كاتّستعمل فالمجاز بمعنى هداك بنادم اللي كيحقق الرباح والنصر من بعد تمارة، بواحد الأعجوبة وحتى حد ممتوقعها. و ف لأصل كاتعني "بنت الفاخر" ؤلا "مولات رّماد"، حيت ديما لاصق ليها فحوايجها منين كتشقى.
القيصة ديال سانديرلا كترجع للجغرافي اليوناني سطرابو اللي كتبها ما بيز 7 قبل الميلاد ؤ 23 بعد الميلاد، سماها رودوپيس وفين كيعاود على عبدة يونانية تزوجات بالملك ديال مصر، كتعتابر هادي أقدم نسخة معروفة على قيصة ساندريلا. قيصة يي شيان الشينوية، اللي تدكرات لأول مرة ف 860 م، هي نسخة وحدة خرى قديمة للقيصة. تنشرات أول نسخة أدبية للقيصة ف ؤروپا وبالتحديد فالطاليان من قبل جيامباتيستا باسيل فكتابو "حكاية الحكايات" عام 1634، ونشر النسخة اللي معروفة دابا من ب نّݣليزية والفرانساوية شارل پيرو عام 1697. وتنشرات من بعد نسخة خرى ف ألمانيا عام 1812، نشروها الخوت ݣريم فمجموعتهوم القصصية الشعبية "حكايا خرافية".
ساندريلا كانت عايشة مع واليديها حتى ماتت مها، ؤ من بعد عاشت مع باها اللي كانت عزيزة عليه بزاف ومكرهش يحقق ليها ݣاع الأمنيات ديالها، وكان يحساب إلى كانت عندها مها غتكون فرحانة ومشى تزوج ب مرا عندها جوج بنات. فاللول كانت كتعامل ساندريلا مزيان ولكن من بعد ما مات باها، خرجات ليها وولات كتعدب فيها ودارت فيها خدامة. ساندريلا مابقى ليها حد إلا شي طيور وفيران دارت فيهوم صحابها وكيعاونوها فالشقى ديال الدار.
واحد النهار، الملك خرج قرار كيقول فيه باللي أي بنت من بنات المدينة ممكن تكون مرات ولدو. والأمير غيختار بنت وحدة فحلفة راقصة غينضمها. وحيت حتى ساندريلا ممكن ليها على حساب القرار تمشي، طلبات من مرات باها تمشي معاها للحفلة، قبلات ولكن بشرط، تنقي الدار وتلقى ليها شي لبسة مزيانة للحفلة، مشات ساندريلا تسيق وعانوها صحابها الطيور والفيران تلقى لبسة مزيانة. منين كملات خدمتها ولبسات حوايجها مشات عند مرات باها باش يمشيو للحفلة، ولكن مرات باها وبناتها من الحسد اللي فيهوم قطعو ليها الكسوة ديالها ومشاو بوحدهوم للحفلة بلا ساندريلا. من بعد ما مشاو بانت لساندريلا سحارة ضريفة وعطات ليها كسوة جديدة زوينة كتر ولكن قالت ليها باللي السحر غيحيد فال12 ديال الليل. مشات ساندريلا للحفلة ؤ فاجآت الأمير بالزين ديالها وطلبها ترقص معاه ونسات حياتها الخايبة كاملة، ونسات حتى باللي السحارة قالت 12 دالليل خصها ترجع دارها، تفكرات ولكن السحر كان قرب يزول وخرجات بالزربة بلا ما تقول للأمير سميتها ومابقى ليه غير واحد صباطتها لاحتها وهي كتجري. فالصباح بكري الأمير عيط على النايب ديالو باش يقلب ليه على مولات الصباطة من بنات المدينة، منين وصلو لدار ساندريلا حاولات مراة باها مايشوفش الأمير ساندريلا ولكن فاللخر شافها بفضل صحابها وعاشت معاه حياة فرحانة وزوينة.
لقيصة ديال ساندريلا كتحاول تبين باللي الأمل فالمستقبل زوين ويلا تسنينا بكل صبر الخير اللي درناه غيرجع لينا. وهاد ساندريلا آمنات باللي غتزوج بالأمير وتعيش فقصر زوين من صغرها، حتى وصلات لداكشي اللي بغات وحققات حلمها وحلم باها أنها تعيش مزيان من بعد تمارة كاملة اللي عاشتها.
تقدر تزيد شوف بزاف د تّصاور و لمعلومات ديال Cinderella ف ويكيميديا كومنز. |