حازم صلاح ابو اسماعيل
| ||||
---|---|---|---|---|
معلومات شخصيه | ||||
الميلاد | 16 يونيه 1961 (63 سنة) | |||
مواطنه | ||||
عدد الاولاد | ||||
الحياه العمليه | ||||
المدرسه الام | جامعة القاهره | |||
المهنه | محامى ، وسياسى | |||
اللغات المحكيه او المكتوبه | عربى | |||
تعديل مصدري - تعديل |
محمد حازم صلاح ابو اسماعيل (اتولد فى قرية بهرمس فى 4 يونيه 1961)، شيخ مصرى اسلاموى.
اتخرج من كلية الحقوق واشتغل فى المحاماة ، ومن أشهر القضايا اللى اترافع فيها قضية حادثة رأس برقة اللى كان متهم فيها العسكرى الشهيد سليمان خاطر.
حازم صلاح أبو اسماعيل كان مرشح محتمل لحكم مصر بعد زوال حكم الرئيس حسنى مبارك لكن استبعد بعد ما اتضح انه امه بتحمل الجنسيه الامريكيه و ده ضد القانون المصرى اللى بيحتم ان ابوين رئيس مصر لازم يكونو مصريين بالكامل. اخت حازم ابو اسماعيل هى كمان بتحمل الجنسيه الامريكيه و ده رغم انه دايماً بيشتم امريكا و بيتهمها بالكفر. كان اصلاً عضو فى مجلس نقابة المحامين عن جماعة الاخوان المسلمين فى مصر و اترشح عن الجماعه فى انتخابات البرلمان سنة 2005 و سقط وسط اتهامات بالتزوير. قال فى لقاء فى جامع فى القاهره فى 4 يونيه 2011 انه فى حالة حكمه لمصر مش حايتدرج فى تطبيق الشريعه الاسلاميه و انه حا يقفل مصانع الخمور و الملاهى الليليه اللى سماها كاباريهات. و بخصوص المسارح و السينمات و المؤسسات الربويه (قصده البنوك) و علاقة مصر بامريكا و اسرائيل حا يبقى يشرح فى برامجه الفضائيه حايعمل فيها ايه. و شن هجوم جامد على الرئيس جمال عبد الناصر و اتهمه باشاعة الانحلال فى المجتمع المصرى و قال: "كانت ملابس النساء فاضحة رغم أنه رجل صعيدى ووصل الامر أن الملابس كانت تغطى الثلث الاعلى فقط من جسد المرأة والأفلام السينمائية كانت عبارة عن دروس لتدريب الشباب فى كيفية الايقاع بالفتيات " و رجع سبب ده لتحالف عبد الناصر مع السوفييت الكفار.
وضح الشيخ حازم ابو اسماعيل فى برنامج "القاهره اليوم" فى حوار مع عمرو اديب ان الانتخابات حاتبين حقيقة الشعب المصرى و ان المصريين القايمين على الاقتصاد و التربيه درسوا فى الغرب و بيمثلوا مدرسه مغتربه بتتبع " المنهج العالمى " مش المنهج الاسلامى و ان ده عار ثقافى و الانتخابات حاتورى حقيقة الشعب المصرى ، و انه لو حكم مصر حايقيم المسائل عن طريق " الحلال و الحرام " و عن السياحه قال انه " عبد الله " و مايوافقش على ان ناس بمايوهات يمشوا فى قرى العراه (قصده الشواطىء) و انه بيرفض ان واحده ست تلبس مايوه على شاطىء البحر و ما يقبلش ان امرأه عارية الصدر تمشى فى البلد و ان شعب مصر بيرفض ان يكون على ارضه قرى للعراه. و اقترح ان ممكن يعملوا شواطىء خاصه تأجرها وكالات السياحه الاجنبيه خاصه بالسياح بس (يعنى تبقى محرمه على المصريين بس). فى 27 سيتمبر صرح الشيخ حازم بانه حايسعى لعمل سياحه " حلال " زى فى تركيا (ده مع ان تركيا مابتمنعش لبس المايوهات على البلاجات و مابتمنعش الخمور و الرقص و غيرها من الحاجات اللى بيعتبرها الشيخ حازم من الموبقات و بيتخيل انها ممنوعه فى تركيا الدوله المدنيه الحديثه). بالنسبه لسياحة الاثار قال انه حايبقى يعرض الموضوع على المؤسسات المختصه عشان تقول اذا كانت هى و التماثيل زى تمثال رمسيس التانى حلال و لا حرام.
فى 15 سبتمبر 2011 مخترقين اخترقو صفحة الشيخ حازم على الفيسبوك و كتب المخترقين: " رئاسة الجمهورية نريدها اسلامية لا وهابية - لا لحازم صلاح ابو اسماعيل رئيسا للجمهورية ".
فى 30 مارس 2012 اتقدم حازم أبواسماعيل للترشيح لمنصب رئيس الجمهوريه و قدم اقرار بان والده و والدته و مراته ماعهمش غير الجنسيه المصريه لكن اتضح ان والدته معاها الجنسيه الامريكيه من 25 اكتوبر 2006 وانها استخدمت الباسبور الامريكى كذا مره فى دخولها و خروجها من مصر. و بكده خرج حازم ابو اسماعيل من الترشيح حيث ان القانون المصرى يحتم على المرشح انه يكون مصرى هو و ابوه و امه و ماعندهمش غير الجنسيه المصريه.
شوف كمان
لينكات برانيه و مصادر
- لجنة الرئاسة فى بيان رسمى: والدة ابو اسماعيل امريكية من سنة 2006 ...
- فيديو : ابو اسماعيل يدعو لمدبحه و عمرو اديب بيقوله : دم ضحايا العباسيه فى رقبتك...
- ابو اسماعيل: سأمنع الخمور اذا نجحت فى "الرئاسة" ...
- "ابو اسماعيل" يواصل اطلاق "قذائفه الرئاسية": الفنادق الـ5 نجوم تأكل بالدعارة.. ... Archived 2011-09-29 at the Wayback Machine
- مرشح الرئاسة الشيخ حازم ابو اسماعيل و الحكم بالحلال و الحرام !! (فيديو) ...
- شواطئ حلال وشواطئ حرام للمحجبات ...
- اختراق صفحة حازم ابو اسماعيل على الفيسبوك ...