Lempol (Odobenus rosmarus)
Lempol Odobenus rosmarus | |||||||||||||||
| |||||||||||||||
giltafa pulara | |||||||||||||||
Bliind | Animalia | ||||||||||||||
Dansok | Chordata | ||||||||||||||
Volveydansok | Vertebrata | ||||||||||||||
Pula | Mammalia | ||||||||||||||
Volveypula | Theria | ||||||||||||||
Tolvolveypula | Eutheria | ||||||||||||||
Veem | Carnivora | ||||||||||||||
Yasa | Odobenidae | ||||||||||||||
oxi | |||||||||||||||
Odobenus | |||||||||||||||
Brisson, 1762 | |||||||||||||||
katca | |||||||||||||||
Odobenus rosmarus | |||||||||||||||
Linnaeus, 1758
| |||||||||||||||
Lempol (Odobenus rosmarus) tir tana moukolafa katca ke Odobenus oxi vey Odobenidae yasa ke CARNIVORA veem ( CANIFORMIA volveyveem ). Gan Linnaeus bak 1758 taneon zo pimtayar.
Pimtara
[betara | va krent betá]Alma ke milgaf lempol va butcim is im somedir voxe sotir kum lukoptaberetraf vaf is prantaf im lize valeveon sumafa zuvda rojusa gu fent va alnafo is granafo is fofkafo alto tid.
Taka tir anamkackafa is pinafa kapbure alto ; iteem sotir pinapaf isen pezolkeem mantaf is adeenaf. Abduef inieem sotir trelaf kapbure tel radimef lodabrotcaf is zegodaf.
Ana kira ke bat dunol sotir toloya talgavapa, i ticef myast tis ke lempolye lidam lempolya. Talgaveem wetce xeka ta suxara va opravask is divsidara va tulwadunol zo zanudar. Inafa malestura tickir kum tulwadunol ik lonadunol ik lesko vols kabay voldum spedol.
Lempol gitir merelingasaf is gombalaf sulem, vaxe remi renugal edje lempolye va sint figon doalied, levrotitison va lempolya. Lempolya va tanoy oc arti ocaga vas tanoy tanda nazbar.
Meftava kum cot
[betara | va krent betá]Lempolye ( Odobenus rosmarus ) va gamiafo nek tuzafo alto dir isen aldo fereon tir vas loon tanoy ik dace toloy decitor. To logranaf moukol ke arktikaf bireem vaxe megol tir ! Bata meftava dem cot va sinka vas 45 kg- ( nelkon tulwadunol is lona-dunol ) vieleon gikoartokar. Sumafa bada vas icle 7.5 cm- va alto gu fentunafa lava sonendar.
Kare xo, lempol tis yastaf govitol valente Pacifika welfa isu Atlantika rotir deblitus ok lamas. Mon kunoye lempolye moe lenteamerikafa krimta tandon zavzagid voxen tol-kunoye are gee Bering vedil milinde askid. Kore bat pwertaf moukol valevo opruk grupujer, pune va oprukxo bak muvugal ko geon Bering bira wale Sibira is Alaska sye ilpujer.
Eyaf sulem
[betara | va krent betá]Lempol koe lavok djukablir. Tildeteson mo ezasi opraki anton divpujer ; wori idulugalon, remi tanoy aksat is acku moe kona piluda ke Atlantika welfa diliodon gijonvieler. Tis eyaf sulem, va siudapa dem dat tum tadler, i dem tum ruldas vas konak sanoy iku dace decemoy olkik. Lanu viaku dace rotid vas yona decita. Lempolya dositana gan oceem poke lavok va sint katanad, solve lempolye va xopo sume bira kereled. Seotatason va lokiewafa runda, sulemye fereon mijed nume bal koboda va abrotcaf talgaveem meklabuson faved. Yorda ke ticef myasteem ware zo grupenser. Kas lempol, fasiason va biraludev milinde batcoba mali toloya decemda is acku dun zo kalir, trasitison va sinka vaon zanudar ? Neken talgaveem arse tir darsackafa pilkomodasa sugda tove rumeik ke varafa tamava !
Vexala dem apteem
[betara | va krent betá]Sedme Mammal Species of the World (siatos ke 2005), bata katca vas 3 apta ruldar :
- Lempol (Odobenus rosmarus rosmarus) (Linnaeus, 1758)
- Lempol (Odobenus rosmarus divergens) (Illiger, 1815)
- Lempol (Odobenus rosmarus laptevi) (Chapskii, 1940)
Ewavak
[betara | va krent betá]Pulasa vuestexa is xantaza
[betara | va krent betá]
- (en) vuest- : Mammal Species of the World (v- 3, 2005) : Odobenus rosmarus (Linnaeus, 1758)
- (en) vuest- : CITES : Odobenus rosmarus
- (en) vuest- : UICN : katca Odobenus rosmarus (Linnaeus, 1758)
- (en, fr) vuest- : ITIS : Odobenus rosmarus (Linnaeus, 1758)
- (en) vuest- : Tree of Life Web Project : Odobenus rosmarus
- (en) vuest- : Catalogue of Life : Odobenus rosmarus (Linnaeus, 1758)
- (en) vuest- : Paleobiology Database : Odobenus rosmarus (Linnaeus, 1758)
- (en) vuest- : Animal Diversity Web : Odobenus rosmarus
- (en) vuest- : NCBI : Odobenus rosmarus
Ara vuestexa
[betara | va krent betá]- Lempol (Odobenus rosmarus) dene Wikispecies
Kotavafa vuestesa xantaza
[betara | va krent betá]- Kotava winugaf moukolaf ravlemak (Kotava, Latinava, 2019)
- Lempol dene www.europalingua.eu