Malice - Il sospetto
C'l artìcul chè 'l è scrit in
Miranduléś |
Malice - Il sospetto | ||
Bill Pullman e la Kidman in na figùra dal film | ||
Malice - Al suspèt 1993 | ||
---|---|---|
Regìa: Harold Becker | ||
Scritōr: Jonas McCord • Aaron Sorkin • Scott Frank | ||
Atōr: Nicole Kidman • Bill Pullman • Alec Baldwin Bebe Neuwirth • George C. Scott • Anne Bancroft Peter Gallagher • Gwyneth Paltrow • David Bowe | ||
Müsica: Jerry Goldsmith | ||
Léngua: Ingléś | ||
Dürä dal film: 107 minüt | ||
Nasiōṅ: Stat Unî • Cànada |
Malice - Il sospetto (Malice - Al suspèt) 'l è 'n thriller canadéś e americàṅ dal 1993 'd Harold Becker ch'l è stâ fat c'n un budget ad vint migliòṅ ad dòlar a 'l incìrca.
In na part pìcula a s véd anc la Gwyneth Paltrow.
Sunt
Andy Safian (Bill Pullman) e la Tracy Kennsinger (Nicole Kidman) i èṅ marè e mujér. I vìv'n a Westerley in dal New England e i vrévan métar sù famìja ma prima i gh'aṅ da giustàr la sò vila e star aténti ad nòt 'd a n far-as minga védar, tirànd al téndi quànd i èṅ in cambra da lèt, da 'l fiōl dla sò vśina 'd cà (Paula Plum), Billy (Michael Hatt).
La Tracy, ch'ad mistēr la fà la mistra 'd aśìl, da 'n pôc ad tèmp la sènt di dulōr a la pansa e la decìd acsè 'd andàr a far-as védar da 'n ginecòlug ad Boston, al dutōr David Lillianfield. In cal méntar sò marè al gh'à di àtar prubléma incóra più grand parchè in dla scóla in dua lò al fà al diretōr in secónda a gh'è 'n manìac ch'al cópa al studènti tajànd-ag via di cavìi dòp avér-i masàdi. Al dutōr Jed Hill (Alec Baldwin), vèć cumpàgn ad scóla 'd Andy, al gh la cava a salvàr-an una ma n'atra, la Paula Bell (Gwyneth Paltrow), la fà invéci na bruta fiṅ. P'r al fat ch'l è pròpria Andy a catàr-la e a tucàr al sò cadàvar, lì lò al finìs p'r èsar suspetâ 'd ès'r al masadōr dal ragasōli. La sò amìga Dana Harris (Bebe Neuwirth), detective dla pulisìa, la gh cunsìlia ad far-as far 'l eśàm dla śbòra par vgnir-an fóra pulî. Cla sira lè pò sò mujér l'è custréta a 'ndàr in présia a 'l uśdàł parchè la gh'à un quèl ch'a pâr un càncar a 'n uvàri e al dutōr Jed al decìd ad cavàr-'g-al via e al fà cumpàgn anc cun c'l àtar, sénsa spetàr di àt'r eśam par védar s'l éra mis mâł anc quàl lè. Sōl dòp 'l uperasiòṅ a s vèṅ a savér ch'l éra sè śbif ma in na quàlc manéra a s psiva far quèl listés par salvàr-al. Inóltar la dóna l'éra gravda e acsè l'à anc pardû al putèṅ. Sénsa piò psēr avér di fiōi, la sò vita l'è ruinàda. La Tracy la fà subìt càuśa a 'l uśdàł e a Jed e pò la lasa anc sò marè ch'al n à fat gnint p'r impedìr cal masèl lè e dònca a i sò òć 'l è respunsàbil anca lò. 'L avucàt dla dóna, Dennis Riley (Peter Gallagher), al gh la cava a far-as dar da qvéi dal General Hospital, c'n un patéǵ, déś migliòṅ ad dòlar.
Na sira Andy al rèsta in ufìsi in fiṅ a tardóra e al s mét a cambiàr na lampadìna in cantìna. Chè al cata na scatla cun dèntar dal foto e di cavìi tajâ e al capìs subìt ch'l à catâ 'l manìac: 'l è 'n bidèl, Earl Leemus (Tobin Bell), ch'al vèṅ acsè arestâ subìt. Ma quànd Andy al dascór cun la Dana, chi lē la gh diś ch'l eśam dla sò śbòra 'l iva dit che lò al n è briśa bòṅ ad far di fiōi. 'L óm al pénsa subìt a cla vacàsa ad sò mujér ch'la gh'à mis i còran e ch'la pōl avér-ag cuntâ anc na sfilaràda ad bali su di àtar quèi.