Mashona Washington
C'l artìcul chè 'l è scrit in
Miranduléś |
La Mashona Washington (Flint, 31 ad Maǵ dal 1976) l'è stada na tenìsta americàna, prufesiunìsta da 'l 1995. L'è élta 168 cm e la péśa 59 chilo. La dróa al bras dèstar e la tira 'l arvèrs a dū maṅ.
La stà a Houston (Tèxas) e a gh piàś far da magnàr e far dal còmpri. La scólta la mùśica hip hop, R&B e gospel. L'è la surèla ad MaliVai Washington, anca lò tenìsta.
In dla sò caréra l'è rivàda a èsar la nùmar sinquànta dal mónd 'l 8 ad Nuvémbar dal 2004 e l'à vins dū tìtui ITF in singulàr e ùndas in dópi.
Caréra
La Mashona la vins al sò prim tìtul ITF a Albuquerque (Stat Unî) in dal Setémbar dal 2001 baténd in finàl la Marissa Gould par 7-5 6-3. 'L an dòp la śōga a i US Open par via dna carta salvàdga ma la pèrd a 'l secónd tùran da la Kim Clijsters 1-6 6-7. In dal 2003 la riva a 'l secónd tùran anc a Turònt pardénd da la Vera Zvonarëva 1-6 1-6.
In dal 2004 la tōś part in Śnar a 'l turnèo 'd Hobart. Chè la bat par dū vòlti ad fila l'Iveta Benešová (pardénta furtunàda) par pò cédar a 'l secónd tùran a l'Anca Barna par 6-3 5-7 5-7. A Wimbledon la pasa 'l qualificasiòṅ ma, dòp avér batû l'Angelique Widjaja, la pèrd da la Tat'jana Panova. A Stanford la riva par la prima vòlta in di quàrt 'd un WTA ma lè la n pōl far gnint cun la nùmar sinc dal mónd, la Lindsay Davenport, anc s'la la fà sudàr purtànd-la a 'l tèrs sét. A New Haven la bat a 'l secónd tùran la nùmar sèt dal mónd Marija Šarapova ma pò la n gh la cava briśa a mandàr śò al śōg dl'Elena Bovina ch'la gh'à la méj sèg par 6-3 6-2. A gl'US Open la và fóra subìt ad òpra dla mudnéśa Antonella Serra Zanetti. In Utóbar la riva par la prima vòlta in finàl in un turnèo WTA baténd par 3-6 7-5 6-2 la céca Klára Zakopalová ma pò la vèṅ sćiancàda da la Marija Šarapova par 0-6 1-6.
In dal 2005 la pèrd incóra da l'Elena Bovina a 'l prim tùran ad Róma ma a Ìstanbul la riva in di quàrt baténd na śōvna Elena Vesnina par pò pèrdar da l'Anna Smashnova 3-6 1-6. A Birmingham e Eastbourne la riva incóra in di quàrt pardénd da la Jelena Janković 2-6 4-6 e da la Kim Clijsters 2-6 2-6. La pasa dū tùran anc a Wimbledon prima ad lasàr strada a l'Elena Dement'eva. La pèrd sèg anc in Luj in dal sò incóntar ad Fed Cup cun la Rùsia. 'L ùltim turnèo ch'la śōga in d'l an 'l è qvél ad Philadelphia in dua la céd in di quàrt a l'Amélie Mauresmo par 3-6 4-6.
In dal 2006 la n và mai da 'd là da 'l secónd tùran in di prim turnèo dla stagiòṅ. A 'l Roland Garros l'è lè lè par mandàr a cà subìt la Marija Šarapova, nùmar quàtar dal mónd. In vantàś 2-6 7-5 5-2 e servìsi, l'americàna la s fà rimuntàr, butànd in dgl'urtìghi anc un match point in sal 5-4 par lē in dal tèrs sét. La siberiàna la pasa pò 'l tùran par 6-2 5-7 7-5. In Śugn la céd a 'l secónd tùran a la Dinara Safina 6-4 4-6 1-6. In dal sò incóntar ad Fed Cup śugâ in Bélgi in Luj, l'è custréta a bandunàr cóntar la Kirsten Flipkens.
La tórna a śugàr sōl in d'l Utóbar dal 2007 ma la n è più bòna ad tùrnar a i sò livèi anc s'la gh la cava a purtàr a cà 'n àtar tìtul ITF a Carson in dal Maǵ dal 2008. Dòp avér mancâ al qualificasiòṅ in d'l ITF ad Grapevine, a la fiṅ dal 2011 la śmét ad śugàr.