Anastasija Myskina
C'l artìcul chè 'l è scrit in
Miranduléś |
L’Anastasija Andreevna Myskina (Mósca, 8 ad Luj dal 1981, ciamàda in Rus Анастасия Мыскина,
[ɐnəstɐˈsʲijə ˈmɨskʲɪnə]) l'è stada na tenìsta rusa ch'l'è stada la nùmar dū dal mónd (al 13 ad Setémbar dal 2004). L'è élta 181 cm e la péśa 59 chilo. L'è fiōla dla Galina e 'd Andrey.
In dla sò caréra, tacàda fra i prufesiunìsta in dal 1998, l'à vins un tìtul dal Gran Slam (al Roland Garros dal 2004) e 10 turnèo WTA in tut, purtànd-'s a cà da piò ad sinc migliòṅ e mèś ad dòlar. In di àtar Slam invéci l'è stada bòna ad rivar sèmpar in di quàrt.
A gh piàś magnàr i gnòc e al sushi.
Caréra
La Myskina la s fà nutàr subìt in d'l Utóbar dal 1997 quànd la s pòrta a cà al turnèo ITF ad déś-mila dòlar ad Batumi baténd in finàl l'Elena Dement'eva par 6-7 6-4 7-5. 'L an dòp la vins anc qvél ad Tallinn e la riva in finàl in àtar dū.
In dal 1999, pasànd p'r al qualificasiòṅ, la finìs in dal tablòṅ prinsipàl dal turnèo WTA ad Tashkent ma la gh pèrd subìt p'r òpra dla mudnéśa Adriana Serra Zanetti cun al puntéǵ ad 6-1 5-7 3-6. La stmana dòp però la và a vìnsar 'l ITF ad Gurìsia baténd in finàl l'Ángeles Montolio par 6-1 6-3. La bat pò incóra la spagnōla in finàl anc a Palèrum, vinsénd acsè al sò prim tìtul WTA, pasànd anc p'r al qualificasiòṅ. A gl'US Open la riva a 'l secónd tùran (5-7 5-7 da la Mary Joe Fernandez). La sèra 'l an cun i quàrt a Kuala Lumpur (7-6 1-6 1-6 da l'Åsa Svensson) e 'l secónd tùran a Pattaya City (2-6 5-7 da la Rita Grande).
In dal 2000 la pèrd a 'l tèrs tùran a Miami da la Nadia Petrova e a Wimbledon in dua però l'è bòna ad bàtar la Kim Clijsters 6-4 6-2. Dòp èsar rivàda in semifinàl a Sopot (3-6 2-6 da l'Anke Huber) la gh la cava a dvintàr una dal primi sinquànta śugadōri dal mónd. In Utóbar, dand la paga a l'Elena Dement'eva par 6-4 2-6 6-1, la riva in di quàrt a Śurîg ma lè la gh'à da cédar a la pardóna ad cà Martina Hingis (nùmar òṅ dal mónd) par 0-6 4-6.
La taca mâl al 2001 parchè l'è bòna ad vìnsar sōla na partida cun l'Iva Majoli a Amelia Island, pardénd-an invéci sinc. A Birmingham la riva a 'l tèrs tùran baténd a fadìga l'Adriana Serra Zanetti ma pò la lasa strada a la Lisa Raymond par 6-1 2-6 6-7. A Eastbourne la và a cà subìt cun la Stéphanie Foretz Gacon. In Agóst, pasànd p'r al qualificasiòṅ e baténd subìt l'Amanda Coetzer 6-3 7-5, la riva a 'l secónd tùran a New Haven ma lè la vèṅ sćiancàda 2-6 1-6 da la Lindsay Davenport. Cuma pardénta furtunàda la śōga 'l turnèo ad Lìpsia e lè la dà la paga incóra a l'Iva Majoli e a l'Anna Kurnikova prima 'd andàr a cà pardénd da la Magdalena Maleeva par 4-6 3-6. A Mósca in Utóbar la gh rénd indrē al favōr a la bùlgara ma pò la pèrd in semifinàl par 7-6 1-6 5-7 da l'Elena Dement'eva. La sèra 'l an da nùmar sinquànta-nóṿ dal mónd.
La vèra al 2002 baténd in cà sua la Samantha Stosur a Gold Coast 6-2 6-0 ma pardénd a 'l secónd tùran da la giapunéśa Ai Sugiyama. A Sydney la và a cà subìt cun un 3-6 2-6 in sal cupét da la Silvia Farina Elia. La riva pò in di quàrt a Doha e Dubai pardénd da la Janette Husárová e da la Venus Williams in tri sét. In di Stat Unî la riva a 'l quàrt tùran a Indian Wells, a 'l tèrs a Miami e Amelia Island e in di quàrt a Sarasota (baténd la Mary Pierce) e a Charleston (baténd l'Arantxa Sánchez Vicario). A Róma la mét in riga la Daniela Hantuchová, la Magüi Serna e la Jelena Dokić prima ad lasàr strada a la Serena Williams 3-6 4-6. La rusa la riva pò in finàl in di turnèo śugâ in sl'èrba a Birmingham (2-6 3-6 da l'austragliàna Jelena Dokić) e a Eastbourne (1-6 3-6 da la Chanda Rubin). Chi riśultâ bèi chè i la cùcian a 'l quindicéśum pòst in clasìfica. A Wimbledon però la riva sōl a 'l tèrs tùran, batùda da l'Amélie Mauresmo 4-6 2-6. In Agóst a New Haven la spasa via prima la Conchita Martínez 6-1 6-4 e pò al Top déś Justine Henin 7-6 6-2 e Martina Hingis 6-7 6-4 6-0. La pèrd pò in semifinàl cun la Lindsay Davenport par 2-6 2-6. In Setémbar la riva in finàl a Bahia e a Lìpsia: in Braśil la bat la gréca Eleni Daniilidou par 6-3 0-6 6-2, in Germâgna la pèrd invéci 3-6 2-6 da la Serena Williams, nùmar òṅ dal mónd.
In dal 2003 la tōś part a 'l turnèo ad Sydney ma la gh astà pôc parchè l'Elena Bovina la la bat subìt 6-3 7-5. A Melbourne la Myskina la riva invéci in di quàrt, batùda par 6-2 6-4 da la Kim Clijsters. A Doha la vìns al sò tèrs tìtul WTA band la paga a cl'atra rusa, l'Elena Lichovceva, par 6-3 6-1. L’Anastasija la bat incóra na śugadōra dal sò paéś a Dubai (la Dinara Safina) prima ad pèrdar in di quàrt da la Justine Henin par 1-6 4-6. A Indian Wells la céd in dal prim incóntar a la tenìsta ad Leningrâd Svetlana Kuznecova 4-6 7-6 3-6. Al sò pardìdi cun dal rusi i cuntìnuan anc a Sarasota in di Stat Unî: la Myskina la gh'à prima la méj su la Nadia Petrova e su l'Elena Dement'eva e pò in finàl la bat anc l'Alicia Molik par 6-4 6-1, faghénd suo al tìtul. La riva in di quàrt pò a Róma e a Straśbûrg, pardénd da la Kim Clijsters 2-6 2-6 e da la Silvia Farina Elia 2-6 3-6. A Wimbledon la riva a 'l quàrt tùran in dua la pèrd da la Jennifer Capriati par 2-6 3-6. La fà méj a gl'US Open in dua la patìs dimóndi par bàtar la mudnéśa Antonella Serra Zanetti (7-6 a 'l tèrs) ma pò la riva in di quàrt mandànd a cà la Mary Pierce 7-6 6-1 par pò cédar a la Justine Henin 2-6 3-6. La rusa la tōś l'arvìnsida sèg baténd-la in finàl a Lìpsia al méś dòp par 3-6 6-3 6-3, prufitànd-'s anc dal bandòṅ dla Kim Clijsters in semifinàl quànd la bélga l'éra avànti 7-5 4-4. La Myskina la s pòrta pò a cà anc al tìtul ad cà sua ad Mósca la stmana dòp, 6-2 6-4 a l'Amélie Mauresmo dòp avér lasâ al briśi a la Magüi Serna, a l'Eleni Daniilidou e a l'Anna Smashnova. A Filderstadt in Utóbar però la fà védar ch'la fà fadìga a digerìr la Bovina parchè la gh pèrd incóra a 'l secónd tùran par 2-6 3-6. Al situasiòṅ i s arbàltan però a la fiṅ dal méś: a Linz la Myskina la bat finalmènt l'Elena Bovina par 6-4 3-6 6-2 ma pò la và a pèrdar in finàl a Philadelphia da l'Amélie Mauresmo par 7-5 0-6 2-6.
La rusa la taca al 2004 cun i quàrt a Sydney (4-6 6-7 da l'Amélie Mauresmo) e a Melbourne (2-6 6-7 da la Kim Clijsters, cun la tènìsta ad Mósca ch'l'iva péna dâ la paga a na śōvna Marija Šarapova). A Doha la Myskina la vins al tìtul baténd in semifinàl la Jennifer Capriati par 6-2 6-2 e in finàl la Svetlana Kuznecova par 4-6 6-4 6-4. A Indian Wells la riva in semifinàl pardénd sénsa discùtar da la Justine Henin 1-6 1-6. In Maǵ la s pòrta a cà al Roland Garros baténd da i utàṿ in avànti la Svetlana Kuznecova 1-6 6-4 8-6, la Venus Williams 6-3 6-4, la Jennifer Capriati 6-2 6-2 e l'Elena Dement'eva 6-1 6-2. La riva in finàl anc a San Diego dòp avér vins 17-15 al tie-break dal tèrs sét cun la Vera Zvonarëva ma pò la gh'à da lasàr al tìtul a la Lindsay Davenport par 6-1 6-1. In Agóst la riva in semifinàl a Montreal (3-6 7-5 4-6 da l'Elena Lichovceva) e a Sopot (la bandòna sénsa śugàr cun la Klára Zakopalová). A Bali la và fóra subìt pardénd da la Maria Elena Camerin par 3-6 6-1 2-6. In Utóbar l'ardópia al tìtul ad Mósca dand la paga a chi atri rusi Elena Lichovceva, Vera Zvonarëva e Elena Dement'eva in finàl e pò anc a la nùmar dū dal mónd, la Lindsay Davenport. A la fiṅ d'l an la s pòrta a cà anc la Fed Cup cóntar la Frància.
In dal 2005 la riva in di utàṿ a gl'Australian Open e in semifinàl a Antwerp, batùda chè da la Venus Williams 3-6 6-3 3-6. A Miami, dòp avér mandâ a cà la Flavia Pennetta, la céd a 'l quàrt tùran a la Kim Clijsters. Dòp tri prim tùran in sla tèra batùda, a Eastbourne la cata a 'l secónd tùran la qualificàda Roberta Vinci e la gh pèrd 4-6 6-7. A Wimbledon la riva invéci in di quàrt ma incóra na vòlta la gh'à da pigàr-as a l'Amélie Mauresmo in dū sét. In Agóst la pèrd 5-7 2-6 la finàl ad Stucólma da la Katarina Srebotnik. La stmana dòp invéci l'è la Kim Clijsters a bat'r-la in dla semifinàl ad Turònt. In tut al manéri l rusa la s mét in bisàca pò 'n àtar tìtul a Kolkata in Ìndia baténd in semifinàl la Kaia Kanepi dl'Estògna 6-3 6-1 e la Karolina Šprem dla Cruàsia par 6-2 6-2. La finìs 'l an cun na semifinàl a Śurîg (0-6 4-6 da la Lindsay Davenport).
In dal 2006 la riva incóra na vòlta in di utàṿ a gl'Australian Open, batùda da la śvisra Patty Schnyder 2-6 1-6, e anc a Indian Wells (1-6 3-6 da la Dinara Safina). A Miami l'è na lòta in famìja fra rusi e bielurùsi. La Myskina la bat l'Ekaterina Bychkova, la Viktoryja Azaranka e l'Anna Čakvetadze ma in di quàrt la pèrd da la Marija Šarapova 3-6 3-6. A Varsàvia la và a cà subìt p'r òpra dla carta salvàdga Agnieszka Radwańska. A Róma la bat a fadìga incóra l'Azaranka e pò la Roberta Vinci par pò pèrdar da la Svetlana Kuznecova par 1-6 4-6. In Maǵ la śōga pardénd-la la finàla dal turnèo 'd Ìstanbul cóntar la Shahar Peer ch'l a gh'à la méj par 1-6 6-3 7-6. A 'l Roland Garros la rusa la riva a 'l quàrt tùran baténd 6-2 6-3 l'Ana Ivanović ma pò la gh'à da chinàr-as a la Justine Henin cun al puntéǵ ad 1-6 4-6. La śōga sèg anc in dla finàla 'd Eastbourne e la gh'à da 'lvàr bandéra biànca par 4-6 6-1 7-6. A Wimbledon la rusa la pèrd incóra da la sò bistiàsa négra, l'Amélie Mauresmo (1-8 i cunfrònt dirèt), ch'la gh'à la méj par 6-1 3-6 6-3. In Agóst l’Anastasija la pèrd n'atra finàla a Stucólma cun la Jie Zheng par 4-6 1-6, faghénd-as mâl dimóndi a un dî. Purtròp par lē, c'l infurtùni lè al sgnarà par sèmpar la sò caréra: a 'ndàr a la fiṅ d'l an la rusa la n vins piò, pardénd cun la Shahar Peer a Montreal, cun la Mara Santangelo a New Haven, cun la Viktoryja Azaranka a gl'US Open e cun la Timea Bacsinszky (śvisra nùmar 174 dal mónd) a Śurîg. In dal 2007 la próa a turnàr in si camp a Auckland e a 'l Roland Garros ma la mùcia sù sōl dū scunfìti ch'i la cunvìnsan a dar-'g a muć.
Finàli in di Gran Slam
Roland Garros | 2004 | V | Elena Dement'eva | 6-1 6-2 |
Spetegulés
In d'l Agóst dal 2004 la rivìsta par masć GQ l'à fat vgnir fóra dal foto ad lē cavàda śò dal tut, tòlti da 'l giurnàl rus Medved. Lē, ch'la n iva minga dâ al sò parmés, la n gh astà mia e la gh dmanda un riśarcimènt 'd òt migliòṅ ad dòlar p'r i dan. I giùdas, in un prim mumènt, i gh daṅ ragiòṅ a lē ma pò i arbàltan al giudìsi dgénd ch'l'iva invéci firmâ al parmés. Lē la dà pò la cólpa a 'n śbali in dla tradusiòṅ dal tèst dal cuntràt ma la gh'à da star listés cun al bèc sut.