Three Billboards Outside Ebbing, Missouri
Three Billboards Outside Ebbing, Missouri | ||
(Filmposter yn 'e Ingelske Wikipedy) | ||
makkers | ||
regisseur | Martin McDonagh | |
produsint | Graham Broadbent Pete Czernin Martin McDonagh | |
senario | Martin McDonagh | |
kamerarezjy | Ben Davis | |
muzyk | Carter Burwell | |
filmstudio | Fox Searchlight Pictures Film4 Productions Blueprint Pictures Cutting Edge Group | |
distribúsje | Fox Searchlight Pictures | |
spilers | ||
haadrollen | Frances McDormand Woody Harrelson Sam Rockwell | |
byrollen | Lucas Hedges Željko Ivanek Caleb Landry Jones Peter Dinklage Abbie Cornish | |
skaaimerken | ||
lân/lannen | ||
premiêre | 10 novimber 2017 | |
foarm | langspylfilm | |
sjenre | komeedzjedrama en swarte komeedzje | |
taal | Ingelsk | |
spyltiid | 115 minuten | |
budget en resultaten | ||
budget | $12-15 miljoen | |
opbringst | $159,2 miljoen | |
prizen | 2× Oscar 4× Golden Globe 5× BAFTA Award 3× SAG Award |
Three Billboards Outside Ebbing, Missouri is in Amerikaansk-Britske komeedzjedramafilm en swarte komeedzje út 2017 ûnder rezjy fan Martin McDonagh, mei yn 'e haadrollen Frances McDormand, Woody Harrelson en Sam Rockwell. De titel betsjut: "Trije Reklamebuorden Bûten Ebbing (Missoery)". It ferhaal giet oer in frou dy't trije grutte reklamebuorden hiert om oandacht te freegjen foar de ûnoploste ferkrêfting fan en moard op har dochter. De film waard foar it earst fertoand op it Ynternasjonaal Filmfestival fan Feneesje en krige rûnom loovjende resinsjes fan 'e filmkritisy. Yn 2018 waard Three Billboards Outside Ebbing, Missouri nominearre foar seis Golden Globes. Dêrfan wûn de film fjouwer, wêrûnder de Golden Globe foar bêste film (drama). Datselde jiers waard Three Billboards Outside Ebbing, Missouri ek nominearre foar sân Oscars, dêr't er twa fan wûn. Fierders wûn de film fiif BAFTA Awards, trije Screen Actors Guild Awards en in ferskaat oan minder wichtige prizen.
Plot
[bewurkje seksje | boarne bewurkje]Yn it (fiktive) stedsje Ebbing, yn 'e Amerikaanske steat Missoery, rouwet Mildred Hayes om 'e ferkrêfting fan en moard op har teenerdochter Angela, sân moanne lyn. Om't se lulk is oer it feit dat it plysjeûndersyk nei de saak net opsjit, hiert se by it reklameburo fan Red Welby foar in moanne trije âlde, yn ferfal rekke reklamebuorden dy't deunby har hûs by in trochgeande wei lâns steane. Dêrop lit se yn swarte letters op in reade ûndergrûn de teksten sette: "RAPED WHILE DYING" ("ferkrêfte wylst se stoar"), "AND STILL NO ARRESTS?" ("en noch hieltyd gjin arrestaasjes?") en "HOW COME, CHIEF WILLOUGHBY?" ("hoe kin dat, kommissaris Willoughby?").
De trije reklamebuorden soargje foar in protte argewaasje by de measte oare ynwenners fan Ebbing, ûnder wa plysjekommissaris Bill Willoughby en dy syn ûnderhearrige, plysjeman Jason Dixon, in rasistyske, gewelddiedige alkoholist. It feit dat Willoughy terminale alfleisklierkanker hat, draacht by oan 'e ôfkarring fan Mildred har aksje troch de measte oare ynwenners fan Ebbing. Willoughby siket har op en prebearret syn sykte te brûken om har derfan te oertsjûgjen de reklamebuorden fuort te heljen, mar as er har yn 't sin bringt dat er net lang mear te libjen hat, antwurdet se dat se dat wol wit, mar dat de teksten op 'e buorden nei syn dea net folle sin mear hawwe. Mildred en har soan Robbie, dy't op 'e pleatslike middelbere skoalle sit, wurde lestich fallen om 'e buorden, mar ta Robbie syn ergernis wurdt syn mem dêr allinne mar koppiger fan.
Willoughby hat begryp foar Mildred har frustraasje oer it gebrek oan fuortgong fan it ûndersyk nei de ferkrêfting fan en moard op Angela, mar hy fynt ek dat er der al it mooglike oan dien hat om 'e saak op te lossen. Soms is it no ienris sa dat in moardsaak nettsjinsteande alle ynset fan 'e plysje ûnoplost bliuwt. De trije reklamebuorden beskôget er dan ek as in ûnearlike foarm fan karaktermoard. Dixon, foar wa't Willoughby min ofte mear in heitfiguer is, en de iennichste persoan foar wa't er respekt hat, wurdt ta razernij brocht troch Mildred har oanhâldende wegering om 'e buorden fuort te heljen. Hy bedriget Red Welby, dy't de buorden oan Mildred ferhierd hat, en hy arrestearret har jongere swarte kollega en freondinne Denise op 'e triviale beskuldiging fan it yn besit hawwen fan in marihûanasigaret. Mildred wurdt ek opsocht troch har gewelddiedige eks-man Charlie, dy't har de skuld jout fan 'e dea fan harren dochter.
Tink derom: Yn de tekst hjirûnder wurdt de ôfrin fan de film beskreaun.
As jo de film sels sjen wolle, is it mooglik better dat jo it no folgjende diel fan 'e plotbeskriuwing (earst noch) net lêze. |
As Mildred nei de toskedokter giet, wol dy har in leske leare troch har mei de boar flink te gnjirdzjen, mar ear't er dêrta komme kin, skuort Mildred him it ding út 'e hannen en boarret in gatsje dwers troch de neil fan syn tomme. Letter dy deis komt Willoughby yn 'e winkel dêr't Mildred wurket en nimt har op beskuldiging fan mishanneling mei nei it plysjeburo foar ûnderfreging. As er har yn it ferhear nimt, begjint er ynienen bloed op te hoastjen en moat er ôffierd wurde nei it sikehûs. Underwilens set Mildred nei it kantoar fan Red Welby ta, dat rjocht foar it plysjeburo oer leit, om 'e hier fan 'e trije reklamebuorden te ferlingen. Welby is ûnderwilens lykwols sa yn 'e pine set, dat er besiket dêr ûnderút te kommen troch de priis te ferheegjen. Krekt as it derop liket dat Mildred de buorden kwytreitsje sil, arrivearret der lykwols in koerier mei in kefert mei fiiftûzen dollar fan in ûnbekende woldogger. It jild is bestimd foar in nije moanne hier fan 'e trije reklamebuorden. Welby hat dan gjin oare kar as de hier te ferlingen.
Willoughby ûntslacht himsels út it sikehûs en giet nei hûs, dêr't er in idyllyske dei trochbringt mei syn frou Anne en harren beide dochterkes. Nei't er dy jûns de bern op bêd brocht hat, en wylst Anne op 'e bank yn 'e sûs leit om't se tefolle wyn op hat, giet Willoughby nei de stâl dêr't er syn hynders hâldt en sjit himsels mei in gewear troch de holle. Hy lit ôfskiedsbrieven foar ferskate minsken nei. Yn it brief oan Anne leit er út dat er har en de bern de pine besparje woe dy't se sûnder mis ûndergien hawwe soene as er oer in perioade fan moannen stadichoan weiteard wie oan kanker. Dixon reägearret op it nijs fan 'e dea fan Willoughby troch folslein troch it lint te gean. Hy skonket de strjitte oer, stoarmet it kantoar fan Welby binnen, wêrnei't er dy hielendal yninoar slacht om him dan út it finster fan 'e twadde ferdjipping te smiten. It hiele barren fynt plak foar de eagen fan kommissaris Abercrombie, dy't stjoerd is om Willoughby te ferfangen, en waans earste die yn syn nije funksje is om Dixon te ûntslaan.
Underwilens wurdt Mildred, dy't nei de arrestaasje fan Denise allinne yn 'e winkel stiet, dêr yntimidearre en bedrige troch in man dy't se net ken. Se wurdt rêden as Anne Willoughby de winkel yn komt en de man him ôfjout. Anne wol it brief besoargje dat har man foar Mildred efterlitten hat. Yn dat brief bewissiget Willoughby Mildred derfan dat sy en har reklamebuorden gjin rol spilen by syn beslissing om selsmoard te dwaan. Hy fertelt har fierders dat de fiiftûzen dollar foar de ferlinging fan 'e hier fan him kaam, in set dy't er dien hat om't er it fermaaklik fynt dat se no noch in moanne oan 'e buorden fêst sit, wylst se der troch syn dea allinne mar ellinde fan krije sil. Teffens sprekt er syn oprjochte hoop út dat de buorden de moard op har dochter yn 'e belangstelling hâlde sille. Anne besoarget ek in brief fan Willoughby oan Dixon op it plysjekantoar, net wittende dat Dixon dêr net mear wurket. Brigadier Connolly skillet Dixon thús op en riedt him oan om nei wurktiid del te kommen foar it brief, sadat er Abercrombie net mear ûnder eagen hoecht te kommen.
Noch dyselde deis wurde de trije reklamebuorden yn 'e brân stutsen. Mildred, dy't Dixon of ien fan 'e oare plysjes fertinkt, slacht werom troch jûns nei wurktiid it lege plysjekantoar mei molotovcocktails te bekûgeljen. Op dat tiidstip is Dixon lykwols krekt troch de efterdoar nei binnen ta glûpt, dêr't er mei earkes yn en de rêch nei de foarside fan it gebou ta keard it brief fan Willoughby sit te lêzen. Yn it brief drukt Willoughby him op it hert om syn haat en lulkens los te litten en te learen om leafde te fielen, mei't dat de iennichste manear is om syn grutte pontinsjeel te reälisearjen en syn dream te ferfoljen om resjersjeur te wurden. Tsjin 'e tiid dat Dixon him derfan bewust wurdt dat der wat mis is, stiet it hiele gebou al yn ljochte lôge. Mei it brief en it dossier fan Angela har moardsaak, dat er op ien fan 'e buro's lizzen sjocht, springt er dwers troch de flammesee hinne om te ûntsnappen, en rint dêrby slimme brânwûnen op. James, in autoferkeaper mei dwerchgroei dy't fereale is op Mildred, is tsjûge fan it foarfal en wit de brânende klean fan Dixon te dwêstgjen. Neitiid besoarget er Mildred in aliby troch tsjin 'e plysje út te hâlden dat se mei him op in ôfspraakje wie doe't de oanfal op it plysjeburo barde.
Dixon wurdt yn it sikehûs behannele foar syn wûnen, dêr't er by tafal yn deselde keamer komt te lizzen as Welby. Him de rie fan Willoughby neinimmend, besiket er syn haat en lulkens los te litten en biedt er Welby syn ûntskuldigings oan. Underwilens besoarget Jerome, in jonge swarte man dy't de teksten yn opdracht fan Welby op 'e trije reklamebuorden plakt hat, by Mildred de reserveposters dy't bylevere wiene foar as der wat mei oarspronklike posters barre soe. Mildred, James en Jerome reparearje dêrmei de trije reklamebuorden. Denise, dy't einlings frijlitten is, jout har by harren.
Sadree't er ûntslein is út it sikehûs giet Dixon nei in snústerige kroech ta om syn pine om 'e dea fan Willoughby fuort te drinken. Dêr heart er in pear lju praten dy't op trochreis binne. Ien fan 'e beide, deselde man dy't earder Mildred yn har winkel bedrige, skept deroer op dat er in famke ferkrêfte en fermoarde hat op 'e wize sa't Angela Hayes oan har ein kommen is. Dixon giet nei bûten ta om it nûmer fan 'e kentekenplaat út Idaho op 'e auto fan 'e man te notearjen, en komt der dan wer yn, dêr't er de keardel ta slaanderij provosearret. Hy wurdt totaal yninoar slein, mar wêr't it him om giet is dat er de man oer it gesicht klauwe kin. Neitiid hellet er de hûd en it bloed ûnder syn neilen wei om in DNA-meunster feilich te stellen.
Underwilens giet Mildred echt op in ôfspraakje mei James om him derfoar te betankjen dat er har in aliby ferskaft hat. Yn it restaurant dêr't se binne, komme ek har eks-man Charlie en syn naïve njoggentjinjierrige freondinne Penelope binnen. Charlie beslacht it ôfspraakje fan Mildred mei James mei de gek en jout boppedat ta dat hy it wie dy't de trije reklamebuorden yn 'e brân stutsen hat doe't er dronken wie. James, dy't begjint oan te fielen dat Mildred út begrutsjen mei him op it ôfspraakje gien is, jout him lulk en kwetst ôf. Mildred giet ek fuort, mar pas nei't se nei de tafel fan Charlie en Penelope gien is, om har eks-man te fertellen dat er it fanke mar better goed behannelje kin, om't er oars mei har te meitsjen kriget.
Abercrombie priizget Dixon foar syn inisjatyf oangeande it krijen fan it DNA-meunster fan 'e man út Idaho, mar ynformearret him dat it net oerienkomt mei it DNA dat oantroffen is op it stoflik omskot fan Angela, noch mei DNA fan hokker ûnoploste moardsaak yn 'e Feriene Steaten ek. Boppedat wie de man út Idaho yn 'e tiid dat Angela ferkrêfte en ombrocht waard as soldaat yn it Amerikaanske Leger stasjonearre yn Afganistan. Dixon konkludearret dat de man skuldich wêze moat oan in oare ferkrêfting en moard, wierskynlik yn Afganistan. Hy siket Mildred op om har oer de man te fertellen en freget oft se sin hat om in reiske nei Idaho te meitsjen. Sy stimt ta en de oare moarns sette se tegearre ôf. As se noch net sa lang ûnderweis binne, bychtet Mildred op dat sy dejinge wie dy't it plysjeburo yn 'e brân stutsen hat; Dixon is dêr net yn it minst ferheard oer en freget allinnich mar wa't yn 'e frede oars dien hawwe kinnen hie. It doel fan 'e reis is om it rjocht yn eigen hân te nimmen en de man út Idaho te fermoardzjen; sawol Mildred as Dixon jouwe oan dat se ûnwis binne oft se dat trochsette kinne, mar se prate ôf om dêr pas in beslút oer te nimmen as se de man fûn hawwe.
Rolferdieling
[bewurkje seksje | boarne bewurkje]- haadrollen
personaazje | akteur/aktrise |
Mildred Hayes | Frances McDormand |
kommissaris Bill Willoughby | Woody Harrelson |
plysje Jason Dixon | Sam Rockwell |
- byrollen
personaazje | akteur/aktrise |
Robbie Hayes | Lucas Hedges |
plysje Cedric Connolly | Željko Ivanek |
Red Welby | Caleb Landry Jones |
James | Peter Dinklage |
Anne Willoughby | Abbie Cornish |
man út Idaho | Brendan Sexton III |
Penelope | Samara Weaving |
Charlie Hayes | John Hawkes |
Denise | Amanda Warren |
Jerome | Darrell Britt-Gibson |
kommissaris Abercrombie | Clarke Peters |
Angela Hayes | Kathryn Newton |
frou Dixon | Sandy Martin |
Pamela | Kerry Condon |
Gabriella | Malaya Rivera Drew |
pastoar Montgomery | Nick Searcy |
Tony | Christopher Berry |
toskedokter Geoffrey | Jerry Winsett |
Produksje
[bewurkje seksje | boarne bewurkje]Doe't er yn 1998 troch it Suden fan 'e Feriene Steaten reizge, kaam skriuwer en regisseur Martin McDonagh in pear reklamebuorden tsjin mei dêrop beskuldigjende teksten oer in ûnoplost misdriuw yn Vidor (Teksas). De buorden rekken him djip en lieten him neitiid net mear los. Hy gie derfan út dat se opset wiene troch de mem fan it slachtoffer (eins wiene se opset, sa bliek letter, troch James Fulton, waans dochter Kathy Page yn 1991 ferkrêfte en fermoarde waard). It ynspirearre McDonagh ta it skriuwen fan it senario foar Three Billboards Outside Ebbing, Missouri, in kreätyf proses dêr't er jierrenlang mei ompakte. Yn in fraachpetear yn 2017 beneidrukte er dat de hiele film fiksje wie, en net basearre op in wier ferhaal, en dat de reklamebuorden dy't er yn 1998 sjoen hie him inkeld op it idee foar de film brocht hiene.
Uteinlik regissearre McDonagh Three Billboards Outside Ebbing, Missouri op basis fan syn eigen senario. Yn 'e mande mei Graham Broadbent en Pete Czernin wied er ek as filmprodusint by it projekt belutsen. De film wie in Amerikaansk-Britske ko-produksje fan 'e studio's Fox Searchlight Pictures, Film4 Productions, Blueprint Pictures en de Cutting Edge Group. McDonagh skreau de rol fan Mildred Hayes spesifyk foar aktrise Frances McDormand. Dy fûn Mildred yn 't earstoan te âld foar har, mar op oantrúnjen fan har man Joel Coen naam se de rol dochs oan. Nei eigen sizzen putte se foar de rol fan Mildred ynspiraasje út it aktearjen fan John Wayne yn âlde westernfilms. Sam Rockwell, dy't syn personaazje persiis tsjinsteld oan Mildred meitsje woe, liet him ynspirearje troch it aktearwurk fan Lee Marvin, dy't de antagonist en tsjinspiler fan Wayne wie yn The Man Who Shot Liberty Valance.
Der wie foar Three Billboards Outside Ebbing, Missouri in budget fan $12 oant 15 miljoen beskikber. De opnamen setten op 2 maaie 2016 útein yn Sylva (Noard-Karolina), en duorren oant 4 juny. De kamerarezjy wie yn 'e hannen fan Ben Davis. Allison Outdoor Advertising út Sylva boude de eigentlike reklamebuorden út 'e film, dy't yn in greide by Black Mountain (Noard-Karolina) set waarden om't dy lokaasje gaadliker wie. Behalven as der filme waard, wiene de buorden ôfdutsen om foar te kommen dat tafallige passanten kjel wurde soene fan 'e teksten. De filmmuzyk fan Three Billboards Outside Ebbing, Missouri waard fersoarge troch Carter Burwell.
Distribúsje
[bewurkje seksje | boarne bewurkje]Studio Fox Searchlight Pictures wie ferantwurdlik foar de distribúsje fan 'e film. De earste fertoaning fan Three Billboards Outside Ebbing, Missouri fûn plak op 4 septimber 2017, op it Ynternasjonaal Filmfestival fan Feneesje. Oare fertoanings makken ûnderdiel út fan it Ynternasjonaal Filmfestival fan Toronto, it Ynternasjonaal Filmfestival fan San Sebastián, it BFI Filmfestival fan Londen, it Filmfestival fan Zürich en it Ynternasjonaal Filmfestival fan Mar del Plata. De film iepene op 10 novimber 2017 yn in beheind tal Amerikaanske bioskopen, dat op 1 desimber útwreide waard. Fan 12 jannewaris 2018 ôf wie Three Billboards Outside Ebbing, Missouri ek yn 'e bioskopen yn it Feriene Keninkryk te sjen. De film waard op 27 febrewaris 2018 útbrocht op dvd en blu-ray, wêrby't regisseur Martin McDonagh syn mei in Oscar bekroande koarte film Six Shooter as bonus tafoege is.
Untfangst
[bewurkje seksje | boarne bewurkje]De filmkritisy ûntfongen Three Billboards Outside Ebbing, Missouri oer it algemien mei tige positive resinsjes. Yn it tydskrift Variety priizge Owen Gleiberman bgl. de aktearprestaasje fan Frances McDormand yn 'e haadrol, dy't neffens him "op briljante wize de betize minsklike geast ûnder de útdrukkingsleaze fasade sjen lit." Sam Rockwell syn optreden neamde er "in iepenbiering". En Steve Pond omskreau Three Billboards Outside Ebbing, Missouri yn TheWrap as "hiel grappich, hiel gewelddiedich en ûnferwachts op it moed kommend."
Der wie ek krityk op 'e film. Sa namen guons oanstjit oan McDonagh syn portrettearring fan it Amerikaanske plattelân, dy't bgl. troch kollumnist Wesley Morris yn The New York Times omskreaun waard as in karikatuer. Tim Parks fan The New Yorker priizge de "treflik filme bylden", mar fûn dat de plot fan 'e film "wol tûzen goedkeape tafallichheden" befette. Three Billboards Outside Ebbing, Missouri wie sadwaande neffens him "leech wat emosjonele yntelliginsje oangiet".
Dêrnjonken koene oare kritisy de behanneling fan rasiale tema's yn 'e film net goedkrije, benammen de rehabilitaasje fan 'e rasistyske plysje Dixon, spile troch Sam Rockwell. Sa skreau blogger Ira Madison III yn The Daily Beast dat dy ommekear "yn ien wurd oanstjitjaand is […] McDonagh syn besykjen om it libben fan 'e swarten yn 'e Feriene Steaten yn syn skript op te nimmen, is gauris knoffelich en âlderwetsk en sit fol efterhelle byldspraken."
Op 'e webside Rotten Tomatoes, dy't resinsjes sammelet, hie Three Billboards Outside Ebbing, Missouri in heech goedkarringspersintaazje fan 91%, basearre op 359 ûnderskate resinsjes. De konsensuskrityk fan 'e webside, gearstald út al dy resinsjes, stelt: "[De film] hâldt feardich it lykwicht tusken in swarte komeedzje en in oangripend drama – en bringt syn cast besteande út feteranen dêrmei ta ûnferjitlike prestaasjes." Op Metacritic, de wichtichste konkurrint fan Rotten Tomatoes, behelle Three Billboards Outside Ebbing, Missouri in goedkarringspersintaazje fan 88%, basearre op 50 resinsjes.
Resultaat
[bewurkje seksje | boarne bewurkje]Opbringst
[bewurkje seksje | boarne bewurkje]Three Billboards Outside Ebbing, Missouri brocht yn 'e bioskopen yn 'e Feriene Steaten en Kanada $54,5 miljoen op, en yn alle oare lannen en territoaria $104,7 miljoen. Wrâldwiid kaam de totale opbringst dêrmei út op $159,2 miljoen. Ofset tsjin it budget fan $12-15 miljoen komt dat del op in winst fan teminsten $144,2 miljoen, al moatte dêr de marketingkosten noch fan ôf.
Prizen
[bewurkje seksje | boarne bewurkje]Three Billboards Outside Ebbing, Missouri waard troch it Amerikaansk Film Ynstitút (AFI) útroppen ta ien fan 'e tsien bêste films fan it jier. De film waard yn 2017 op it Ynternasjonaal Filmfestival fan Feneesje nominearre foar de Gouden Liuw, en wûn datselde jiers de haadpriis op it Ynternasjonaal Filmfestival fan Toronto, de publykspriis op it Ynternasjonaal Filmfestival fan San Sebastián en it Brûnzen Hynder (Bronshästen) op it Ynternasjonaal Filmfestival fan Stockholm.
Three Billboards Outside Ebbing, Missouri waard yn jannewaris 2018 nominearre foar seis Golden Globes, wêrûnder de prizen yn 'e kategoryen foar bêste regisseur en bêste orizjinele filmmuzyk. Hy wûn de Golden Globes foar bêste film (drama), bêste aktrise (Frances McDormand), bêste byrol fan in akteur (Sam Rockwell) en bêste senario (Martin McDonagh). Letter dat jiers waard de film nominearre foar sân Oscars, wêrûnder dy yn 'e kategoryen bêste film, bêste byrol fan in akteur (Woody Harrelson), bêste orizjinele senario, bêste orizjinele filmmuzyk en bêste filmmontaazje. Three Billboards Outside Ebbing, Missouri wûn twa Oscars: foar bêste aktrise (McDormand) en bêste byrol fan in akteur (Rockwell).
By de Britske BAFTA Awards waard de film yn 2018 nominearre foar njoggen prizen, wêrûnder dy yn 'e kategoryen bêste byrol fan in akteur (Harrelson), bêste kamerarezjy, bêste regisseur en bêste filmmontaazje. Three Billboards Outside Ebbing, Missouri wûn fiif BAFTA's, foar bêste film, bêste Britske film, bêste aktrise (McDormand), bêste byrol fan in akteur (Rockwell) en bêste orizjinele senario (McDonagh). De film waard ek nominearre foar trije Britske Empire Awards.
Yn 'e Feriene Steaten waard Three Billboards Outside Ebbing, Missouri fierders nominearre foar fjouwer Screen Actors Guild Awards, wêrfan't er trije wûn: bêste aktrise (McDormand), bêste byrol fan in akteur (Rockwell) en bêste cast. By de Satellite Awards waard de film seis kear nominearre en wûn er de prizen foar bêste film, bêste byrol fan in akteur (Rockwell) en bêste orizjinele senario (McDonagh). By de Saturn Awards waard Three Billboards Outside Ebbing, Missouri twa kear nominearre en wûn er de priis foar bêste skrillerfilm.
Keppelings om utens
[bewurkje seksje | boarne bewurkje]- (in) Offisjele webside fan Three Billboards Outside Ebbing, Missouri
- (in) Ynformaasje oer Three Billboards Outside Ebbing, Missouri yn 'e Internet Movie Database (IMDb)
Boarnen, noaten en/as referinsjes: |
Foar boarnen en oare literatuer, sjoch ûnder: References, op dizze side. |
- Amerikaanske komeedzjedramafilm
- Amerikaanske swarte komeedzje
- Britske komeedzjedramafilm
- Britske swarte komeedzje
- Ingelsktalige film
- Film fan Film4 Productions
- Film fan Searchlight Pictures
- Film fan Martin McDonagh
- Film út 2017
- Film oer ferkrêfting
- Film oer moard
- Film oer memmen en dochters
- Film oer in Amerikaanske plysjetsjinst
- Film oer kanker
- Film oer selsmoard
- Film oer húslik geweld
- Film oer figilantisme
- Film oer rouferwurking
- Winner fan de Golden Globe foar Bêste Film – Drama