Blu:Sens
Coordenadas: 42°54′15.54″N 8°30′29.96″O / 42.9043167, -8.5083222
Blusens Technology, S.L. | |
---|---|
Blu:Sens I+D+I | |
Tipo | Sociedade Limitada |
Fundación | 2002 |
Localización | EDIFICIO CNL Avda. Fernando Casas Novoa, 37 Portal B 2º 15703 Santiago de Compostela |
Fundador | Miguel Silva Constenla |
Persoas clave | José Ramón García (Presidente) Manuel Jove (Ex accionista maioritario) |
Industria | hardware |
Produtos | electrónica de consumo |
Beneficio | 60 millóns de euros, 2011[1] |
Número de empregados | 130 (en 2009)[2] |
Na rede | |
http://blusens.com/ | |
[ editar datos en Wikidata ] |
Blu:Sens é unha empresa galega de ámbito tecnolóxico con sede en Santiago de Compostela. Entre os seus produtos hai televisores, sintonizadores de TDT, reprodutores de DVD, de MP3, localizadores GPS e outros artigos de electrónica de consumo.
Historia
[editar | editar a fonte]Este artigo (ou sección) está desactualizado(a). A información fornecida mudou ou é insuficiente. |
Ideada no 2001, a empresa experimentou un rápido crecemento ata converterse na empresa que máis reprodutores de mp3 vendeu en España no 2006. A curta historia de Blu:Sens está protagonizada por Miguel Silva e José Ramón García, amigos da infancia. Silva era o responsable de Televés nos Emiratos Árabes. García traballaba como economista na filial de consultoría do grupo vasco Mondragón Corporación Cooperativa. En 2001, xunto a outros dous amigos, crearon Blu:Sens, pasando as horas libres dos seus empregos deseñando un plan de negocio. Cunha longa experiencia desenvolvendo planificación estratéxica para outros empresarios, José Ramón García elaborou un plan de negocio para o seu proxecto de empresa nacente, no que tódolos aspectos do futuro desenvolvemento quedaban estipulados para o período 2002-2005: a que se ía dedicar a empresa, que se ía fabricar, onde comercializalo, e que posicionamento buscar.
Unha das claves do éxito radicou en subcontratar certas tarefas (como a ensamblaxe dos produtos) e centrarse en tarefas que podían darlle valor á empresa: mercadotecnia, innovación ou deseño: externalizar procesos produtivos. Por esta razón Blu:Sens buscou acordos na China.
A empresa naceu no 2002 nunha pequena oficina da zona antiga de Compostela, con 3000 € de capital, solicitando un millón de euros a tres bancos para os acordos con fabricantes asiáticos. Axiña comezaron a distribuír reprodutores de DVDs, facturando xa en decembro de 2002 un millón de euros.
Blu:Sens ten en España tódolos seus departamentos de deseño, innovación, mercadotecnia e comercialización, nos que traballan unhas 90 persoas. Están repartidos entre Santiago, onde está a súa sede social, e Madrid, sede de Opera Wireless, unha das catro filiais da sociedade. As outras filiais están na China (Blu:Sens China), sede da fábrica na que emprega a 220 persoas, e en Dubai (Blu:Star Middle East). En 2007 estaba en fase de crear filiais en Malaisia e México, así como unha sociedade holding, Corporación Blu:Sens, con sede en Galiza.
Os maiores investimentos de Blu:Sens son para I+D e mercadotecnia. Reservan o 10% dos ingresos para desenvolver novos produtos e un 5% para mercadotecnia. A empresa paga para que tódalas modelos dos certames de Miss España leven os seus aparellos nos desfiles. En outono de 2007 presentou os novos reprodutores de mp3 no estadio Santiago Bernabeu de Madrid, e para o ano 2008 creou o equipo Blu:Sens Aprilia para o Campionato Mundial de Motociclismo, na categoría de 125cc.
O 8 de abril de 2008 Blu:Sens anunciou a creación do selo discográfico Blu:Sens Music, do que a partir de 2009 se fará cargo a xornalista e produtora Eva Perales[3].
Tralo ascenso do Obradoiro Club de Amigos do Baloncesto á liga ACB, pasou a denominarse Xacobeo 2010 Blu:Sens.
O 28 de abril de 2008 anunciouse a adquisición por parte de Manuel Jove de case o 50% da empresa a través dunha sociedade súa, o que supón unha importante ampliación de capital que lle permitirá seguir crecendo.
Blu:sens foi denunciada por Televés e condenada en 2012 polo Xulgado do Mercantil número 1 da Coruña pola elaboración e distribución dun catálogo en 2009 por entender que infrinxía os dereitos de propiedade intelectual de Televés. Blu:sens tamén foi condenada ao pago de 123 euros[4].
En 2013 Jove deixou de ser accionista da empresa[5]. En xullo de 2013 a empresa presentou pre concurso de acredores[6]. Blusens Technology SLU, a filial de compras da empresa, presentou concurso voluntario de acredores en outubro de 2013[7].
Notas
[editar | editar a fonte]- ↑ Destellos de éxito en plena recesión. El País
- ↑ "BLUSENS GLOBAL CORPORATION en PDF páx. 15" (PDF). Arquivado dende o orixinal (PDF) o 11 de xuño de 2013. Consultado o 18 de febreiro de 2013.
- ↑ MP3 y música 'feitos na casa', El País, 10/2/2009
- ↑ Condenan a Blusens por plaxio nun catálogo profesional editado en 2009. Código Cero
- ↑ Jimenez, Marimar. Cinco Días, ed. "Jove sale del capital de la tecnológica española Blusens". Consultado o 12-06-2013 21:42.
- ↑ Blusens presenta preconcurso de acreedores. ABC
- ↑ La Opinión A Coruña (ed.). "La central de compras de Blusens presenta concurso voluntario de acreedores". Consultado o 28 de outubro de 2013.