Mirmecobíidos

Mirmecobíidos Myrmecobiidae
Myrmecobius fasciatus
Estado de conservación
En perigo
Clasificación científica
Reino: Animalia Filo: Chordata Subfilo: Vertebrata Clase: Mammalia Subclase: Theria Infraclase: Marsupialia Magnorde: Australidelphia Superorde: Eometatheria Orde: Dasyuromorphia Familia: Myrmecobiidae Waterhouse, 1841 Xénero: Myrmecobius Waterhouse, 1836 Especie: M. fasciatus
Nome binomial
Myrmecobius fasciatus Waterhouse, 1836
Distribución de Myrmecobius fasciatus (verde) e lugares onde se reintroduciu (rosa) Distribución de Myrmecobius fasciatus (verde) e lugares onde se reintroduciu (rosa)
Subespecies
Vexase o texto

A dos mirmecobíidos (Myrmecobiidae) é unha familia de mamíferos marsupiais australidelfos, unha das tres recoñecidas dentro da orde dos dasiuromorfos.

Esta familia conta cun só xénero, Myrmecobius, cunha única especie, Myrmecobius fasciatus, antano difundida en todo o sur de Australia, pero que hoxe se encontra só nalgunhas zonas remotas do suroeste australiano, onde sobrevive en varias pequenas colonias. A súa diminución nos últimos tempos debeuse á destrución do seu hábitat e á depredación de animais introducidos polo ser humano en Australia, de tal xeito que hoxe se encontra en perigo de extinción.

A especie é un emblema de Australia Occidental, e está protexida por programas de conservación.

Debido aos seus hábitos alimentarios (a súa dieta consiste exclusivamente en térmites), coñécese na bibliografía internacional, entre outros, cos nomes de mirmecobio, formigueiro marsupial ou numbat (un dos seus nomes en inglés).

Taxonomía

Descrición

Tanto a familia como o xénero e a especie foron descritos polo naturalista inglés George Robert Waterhouse. A familia en 1841, nun traballo publicado en Nat. Hist. Marsup. or Pouched Animals (Naturalist's Libr.), 10: 60.. O xénero e a especie en 1836, en Proc. Zool. Soc. Lond., 1836: 69.

Etimoloxías

Familia

O nome da familia, Myrmecobiidae, formouse, como é a norma, sobre a raíz do nome do seu xénero tipo, Myrmecobius, coa adición da desinencia do latín científico -ĭdae, propia dos nomes das familias de animais.

Xénero

O nome do xénero, Myrmecobius, está formado polos elementos do latín científico mirmeco-, tirado do grego antigo μύρμηκος ‎mýrmēkos, xenitivo de μύρμηξ ‎mýrmēx, 'formiga', e -bius, derivado do grego antigo βίος ‎bíos, 'vida'. Literalmente, 'os que viven das formigas'.

Especie

O epíteto específico, fasciatūs, é o participio do verbo fasciō, derivado de fascia, 'venda', 'vendaxe', pero tamén 'franxa', 'banda', 'tira'. É dicir, que significa 'con franxas', 'con bandas'.

Clasificación

Como quedou dito, a especie Mirmecobius fasciatus é a única da familia. Nela recoñécense dúas subespecies:

Familia Myrmecobiidae Waterhouse, 1841

• Xénero Myrmecobius Waterhouse, 1836
  • Myrmecobius fasciatus Waterhouse, 1836
    • M. f. fasciatus Waterhouse, 1836
    • M. f. rufus Wood Jones, 1923

Galería de imaxes

• 
  Numbat, no zoo de Perth
• 
  Primeiro plano
  (Zoo de Perth)
• 
  Femia de numbat
  (Zoo de Perth)
• 
  Myrmecobius fasciatus taxidermizado. Göteborgs Naturhistoriska Museum
• 
  Lámina de Myrmecobius fasciatus de W. Dickes (1840)
• 
  Lámina de banded anteater de R. Lydekker (1896)

Véxase tamén

Bibliografía

• Grzimek, B., Schlager, N. & Olendorf, D (2003): Grzimek's Animal Life Encyclopedia. Detroit: Thomson Gale.
• McKenna, M. C. & Bell, S. K. (1997): Classification of Mammals Above the Species Level. Nova York: Columbia University Press. ISBN 0-231-11013-8.
• Rowland, P. & Strahan, R., eds. (1995): The Mammals of Australia. Washington, D.C.: Smithsonian Institution Press.
• Vaughan, T. A. (1986): Mammalogy. Third Edition. Fort Worth, Texas: Saunders College Publishing.
• Vaughan, T. A.; J. M. Ryan & N. J. Czaplewski (2000): Mammalogy. Fourth Edition. Philadelphia, Pennsylvania: Saunders College Publishing.
• Wilson, D. E. & Reeder D. M. (editores) (2005): Dasyuromorphia en Mammal Species of the World. A Taxonomic and Geographic Reference, 2 vol. 3ª ed. Baltimore, Maryland, EE. UU.: Johns Hopkins University Press. ISBN 0-8018-8221-4.

Outros artigos

• Marsupiais
• Australidelfos
• Dasiuromorfos

Ligazóns externas

• Myrmecobiidae na ADW. Con ampla información e bibliografía (en inglés).
• Myrmecobiidae na EOL. Con numerosas imaxes.
• Myrmecobius fasciatus na ADW. Con amplísimas información e bibliografía (en inglés).
• Myrmecobius fasciatus na EOL. Con información e numerosa imaxes (en inglés).
• Myrmecobiidae no NCBI.