Ռավենսբրյուկ
Տեսակ | Նացիստական համակենտրոնացման ճամբարներ |
---|---|
Երկիր | |
ԲԾՄ | 54 մետր |
Անվանված է | Ravensbrück? |
Ղեկավար կազմակերպություն | ՍՍ |
Հիմնադրված է | 1938 |
Տնօրեն | Fritz Suhren? |
Ժառանգության կարգավիճակ | ճարտարապետական ժառանգության հուշարձան |
Պաշտոնական կայք |
Ռավենսբրյուկ (գերմ.՝ KZ Ravensbrück), համակենտրոնացման ճամբար Երրորդ ռայխում։ Գտնվում է Գերմանիայի հյուսիս-արևելքում, մայրաքաղաք Բեռլինից 90 կմ հյուսիս՝ Ֆյուրստենբերգ գյուղում, որը ներկայումս քաղաքի կարգավիճակ ունի։ Մահվան ճամբարը գոյություն է ունեցել 1939 թվականի մայիսից մինչև 1945 թվականի մայիսի վերջերը։ Այն ձևավորվել է որպես «կանանց ճամբար»[1]։ Նացիստների մեծագույն ճամբարն էր կին կալանավորների համար։ Գրանցված դատապարտյալների թիվը, գոյության ողջ ընթացքում, կազմել է ավելի քան 130 հազար մարդ։
Ճամբարի ստեղծում
[խմբագրել | խմբագրել կոդը]Ճամբարի շինարարությունը սկսվել է 1938 թվականի նոյեմբերին ՍՍ-ի ռայխսֆյուրեր Հայնրիխ Հիմլերի ղեկավարությամբ։ Ճամբարի առաջին հատվածամասը կառուցել են Զաքսենհաուզեն ճամբարի կալանավորները։ Ռավենսբրյուկը բացվել է 1939 թվականի մայիսին։ Այստեղ Լիխտենբուրգ համակենտրոնացման ճամբարից, որը գտնվում էր Սաքսոնիայում, բերեցին առաջին կալանավորներին՝ թվով 867 կանանց. նրանք պետք է աշխատեին ճամբարի առաջիկա ընդլայնման համար։ Ճամբարը բաղկացած էր գլխավոր և օժանդակ ճամբարից։ Գլխավոր ճամբարում պահում էին միայն կանանց, որի տարածքը նախատեսված էր վեց հազար անձանց համար։ 1941 թվականի ապրիլին ձևավորվեց նաև տղամարդկանց փոքր ճամբարը, որտեղ պահվում էին 350 կալանավոր. այն սահմանակից էր գլխավոր ճամբարին[1]. Համակենտրոնացման ճամբարը շրջապատված էր խրամով և բետոնյա պատերով՝ փշալարերով պատված, որով էլեկտրաէներգիա էր անցկացված[2]։ 1945 թվականին ճամբարի ամբողջ տարածքը կազմում էր 170 հա։
1942 թվականի հունիսին, գլխավոր ճամբարի անմիջական հարևանությամբ, կառուցվում է ճամբար երիտասարդների համար, որը կոչվեց «Ուկկերմարկ» (պաշտոնական անվանումը՝ «Ուկկերմարկ ճամբարի երիտասարդների իրավունքների պահպանության ճամբար»), որտեղ բերվեցին շուրջ 400 աղջիկներ։
1940 թվականի հունիսին Ռավենսբրյուկում հիմնադրվեց ՍՍ-ի՝ «Gesellschaft für Textil- und Lederverwertung mbH» («Տեքստիլի և կաշու արտադրության համայնք») ձեռնարկությունը։ Ճամբարի տարածքում կառուցվեց «արդյունաբերական տնտեսություն»՝ կանանց ավանդական արտադրական արտադրամասերով։ 1942 թվականի հունիսին գերմանական էլեկտրոտեխնիկական Siemens & Halske AG կոնցեռնը կառուցեց 20 արդյունաբերական բարաք՝ կալանավորների հարկադրական աշխատանքի նպատակով։ 1943 թվականի մարտին սկսվեց կալանավորների ուժեղացված օգտագործումը ռազմական արդյունաբերությունում։ Այդ պատճառով բացվում են ներքին ճամբարներ, օրինակ՝ Կառլսհագեն, Նոյբրանդենբուրգ և Ֆելտեն։ Ամբողջ Ռավենսբրյուկում հաշվվում էր 70 բաժանմունք, որտեղ հարկադրաբար օգտագործում էին կանանց ուժը։ Ենթաճամբարները ձգվում էին Բալթիկ ծովից մինչև Բավարիա։ 1944 թվականի մայիսին 2500 կանանց փոխադրեցին Ռոստոկ-Շվարցենֆրոստի՝ «Heinkel» և Զվոդաուի՝ «Սիմենս» զինագորրծարաններ։ 1944 թվականի ընթացքում Ռավենսբրյուկից զանազան վայրեր, որտեղ կային ռազմական արդյունաբերության օբյեկտներ, փոխադրվեցին 70 000 կալանավորի։
Ռավենսբրյուկի մի շարք ենթաճամբարներ
[խմբագրել | խմբագրել կոդը]Ենթաճամբարներ կային հետևյալ բնակավայրերում.
- Անսբախ
- Բարտ
- Բելցիգ
- Բեռլին (Ավելի քան տասը ճամբարներ)
- Վոկուլ-Դաբելով
- Գենտին
- Դրեզդեն-Ունիվերսելլե (գերմ.՝ Dresden Universelle)
- Կառլսհագեն
- Քյոնիգսբերգ-Նեյմարկ
- Կլյուտցով (Klützow)
- Լայպցիգ-Շյոնֆելդ (Leipzig Shoenfeld)
- Մալխով (համակենտրոնացման ճամբար)
- Նոյբրանդենբուր
- Պենեմյունդե
- Պրենցլաու
- Ռեխլին
- Ռեցով
- Ռոստոկ
- Ռոստոկ-Մարիենե (Rostock-Marienehe)
- Ֆելդբերգ
- Ֆելտեն
- Ֆյուրստենբերգ
- Հենիգսդորֆ
- Հոհենլիխեն (Hohenlychen)
- Շվարցենֆորստ (Schwarzenforst)
- Շյոնեֆելդ (Դամե Շպրեվալդ)
- Ստարգարդ
- Էբերսվալդե
Դատապարտյալներ
[խմբագրել | խմբագրել կոդը]Հենց սկզբից ճամբարում դատապարտյալները գերմանուհիներն էին, այսպես կոչված «ազգի խայտառակիչները»՝ հանցագործներ, «հակասոցիալական վարք» ունեցողներ և Եհովայի վկաներ[3]։ 1939 թվականի հունիսն Ավտրիայի Բուրգենլանդ քաղաքից Ռավենսբրյուկ արտաքսվեցին 440 գնչուներ՝ իրենց երեխաների հետ։ Սեպտեմբերից նոյեմբեր ընկած ժամանակահատվածում ճամբար բերեցին 60 լեհ կանանց։ 1940 թվականի դեկտեմբերին ընդառաջ 16 բնակեցված բարաքներում հաշվվում էր 4200 կին-կալանավոր, այդ թվում Ավստրիայից, Լեհաստանից և Չեխիայից[1]:
1941 թվականի ապրիլին Ռավենսբրյուկ բերեցին 3500 նոր կալանավորի, այդ թվում՝ Նիդերլանդներից, Լեհաստանից, նախկին Հարասլավիայի տարածքներից։ 1942 թվականի մարտին Օսվենցիմ մահվան ճամբարի շինարարության նպատակով՝ այստեղից տասը հազար կնոջ ուղարկեցին։ 1942 թվականի հունիսի 14-ին չեխական ոչնչացված Լիդիցե գյուղից այստեղ բերեցին 182 կնոջ։ 1942 թվականի հոկտեմբերին Կայսերական անվտանգության գլխավոր կառավարությունը հրաման տվեց, որպեսզի Ռավենսբրյուկը դարձնեն «հրեաներից ազատ»։ Ավելի քան 600 կալանավորի, որից 522 հրեուհիներ, տեղափոխվեցին Օսվենցիմ։ 1942 թվականի դեկտեմբերին ընդառաջ ճամբարում կալանավորների թիվը հասավ 10 800 մարդու. կալանավորներ բերվեցին հետևյալ երկրներից՝ Ֆրանսիա, Բելգիա, Նորվեգիա, Լյուքսեմբուրգ և Ռումինիա[1]։
1943 թվականի փետրվարի 3-ին Ռավենսբրյուկ բերեցին 536 խորհրդային ռազմագերու՝ կին-բժիշկներ, բուժքույրեր, կապավոր-կանանց, Ղրիմի կռիվներում մարտնչած կանանց։ Հենց սկզբից նրանց հատվածը առանձնացված էր ամբողջից փշալարերով[4]։ Նույն թվականին Փարիզից տրանսպորտով 1 000 ֆրանսուհիների բերեցին այդտեղ։ 1943 թվականի դեկտեմբերի նախաշեմին ՍՍ-ի վերահսկողության տակ գտնվող Ռավենսբրյուկում կալանավոր կանաց թիվը հասավ 15 100[1]։
Բլանկա Ռոտշիլդը՝ կալանավորներից մեկը, որը Ռավենսբրյուկ էր արտաքսվել 1944 թվականի վերջին, այսպես էր նկարագրում ճամբարը[5].
1939-ից 1945 թվականներն ընկած ողջ ժամանակահատվածում Ռավենսբրյում ճամբարում գրանցեցին 132 հազար կանանց ու երեխաների, 20 000 տղամարդու և 1 000 աղջկա «Ուկկերմարկ ճամբարի երիտասարդների իրավունքների պահպանության աղջիկներ»[1]։ Այս ճամբարում պահում էին գրեթե 40 ազգության կալանավորի։ Բանտարկյալներին տրամադրվում էր զոլավոր հանդերձանք և փայտյա նալիկներ[2]։ Ձախ թևքին ճամբարային համարն էր և նշագրումը՝ եռանկան տեսք ունեցող, որը տարբեր գույնի ու նշանակության էր, այսպես. կարմիրը քաղաքական և Դիմադրության շարժման մասնակիցների նշագրումն էր, դեղինը՝ հրեաների գույնը, կանաչը՝ քրեական հանցագործների, մանուշակագույնը՝ Եհովայի վկաների, սևը՝ գնչուների, պոռնիկների, լեսբուհիների և գողերի։ Եռանկյան կենտրոնում գտնվում էր տառը, որը նշում էր ազգային պատկանելիությունը։ Խորհրդային ռազմագերիները ճամբարում հայտնվելուց հետո հրաժարվեցին կրել այդ տարբերանշումները իրենց թևքերին։ Արդյունքում նրանք ստացան կարմիր եռանկյուն՝ մեջը գրված «SU»՝ Խորհրդային Միություն[4]։
Ճամբարի կալանավորների թվում կային նաև երեխաներ, որոնք այստեղ էին հայտնվել մայրերի հետ կամ էլ ծնվել էին ճամբարում։ Երեխաների առաջին փոքրաթիվ խումբը բաղկացած էր գնչու երեխաներից, որոնք բերվեցին այստեղ Բուրգենլանդից (Ավստրիա)։ 1942 թվականի հուլիսին մի քանի երեխայի բերեցին Լիդիցե չեխական ոչնչացված գյուղից։ Երեխաների թիվը ապրիլից հոկտեմբեր ընկած ժամանակաշրջանում զգալիորեն մեծացավ 1944 թվականին։ Օսվենցիմի գնչուների ճամբարը փակելուց հետո այստեղ բերեցին էլի մի խումբ գնչու երեխաների։ Մյուս ստվար խումբը հիմնականում կազմված էր լեհ երեխաներից, որոնք Ռավենսբրյուկ բերվեցին Բուդապեշտի գետտոյից։ Համաձայն նշումների, 1944 թվականի սեպտեմբերից մինչև 1945 թվականի ապրիլ ճամբարում ծնվել է 560 երեխա (23 կանանց մոտ վաղածնություն էր, 20 երեխա ծնվել է մեռած, 5 կնոջ աբորտ են արել)։ Այդ երեխաների մեծամասնությունը մահացավ հյուծումից։ Ըստ պահպանված որոշ փաստաթղթերի Ռավենսբրյուկում ողջ են մնացել մոտավորապես 100 երեխա։ 1943-ից 1945 թվականները ճամբարում գտնվել են 863-ից 881 երեխա՝ 2-ից 16 տարեկան, տասնութ ազգությամբ[4][6]։
Կարմիր խաչի օգնություն
[խմբագրել | խմբագրել կոդը]1945 թվականի ապրիլի 5-ից 26-ը Կարմիր խաչի միջազգային կոմիտեի և Շվեդիայի ու Դանիայի կարմիր խաչերի ջանքներով անցկացվել է «Bernadotte» գործողությունը՝ Ռավենսբրյուկից տարհանելով կալանավորների դեպի չեզոք երկրներ։ Գործողությունների շնորհիվ ազատվել է 7 500 կին-կալանավոր, որոնց տարել են Շվեյցարիա, Դանիա և Շվեդիա[1]։
Ճամբարային կարգուկանոն
[խմբագրել | խմբագրել կոդը]Ճամբար բերելիս կալանավորներին մերկացնում էին բակում՝ անկախ տարվա եղանակից, խուզում էին մազերը։ Բանտարկյալների մոտից վերցնում էին փաստաթղթերն ու այն ամենը, ինչը կար նրանց մոտ։ Հետո սպասում էին, որպեսզի բաղնիք գնալու թույլտվություն ստանան։ Լոգանքից հետո կալանավորներին տրամադրվում էին ճամբարային զգեստ և բաժանում նրանց տարբեր հաստատություններում, որտեղ ստանում էին համարներն ու նշագրումները[7]։
Վերկացը Ռավեսբրյուկում տեղի էր ունենում առավոտյան ժամը 4-ին։ Կալանավորները, ստանալով ½ բաժակ սառը սուրճ, շարվում էին դրսում՝ անվանականչի։ Ստուգումը տևում էր 2-3 ժամ՝ անկախ եղանակային պայմանների։ Ցուրտ ձմեռներին և անձրևոտ օրերին միտումնավոր կերպով անվանականչը երկարաձգվում էր։ Դրանից հետո ազատազրկյալներին ուղարկում էին աշխատանքի, որը տևում էր 12-14 ժամ[7]։
Ցերեկային հերթափոխի ժամանակ բանտարկյալ կանանց տրամադրվում էր կեսժամանոց ընդմիջում՝ սնվելու նպատակով։ Չափափաժնի մեջ մտնում էր կես լիտր ջուր՝ գոնգեղի կամ կարտոֆիլի կճեպներով։ Գիշերային հերթափոխի ժամանակ ընդմիջում նախատեսված չէր. սննդամթերքը տալիս էին աշխատանքից վերադառնալուց հետո միայն[7]։
Ցերեկային հերթափոխից հետո կալանավորները շարվում էին երեկոյան անվանակարգի, որը տևում էր ավելի քան երկու ժամ, որից հետո ստանում էին սուրճ և 200 գրամ հաց[7]։
Փոստ կալանավորների համար
[խմբագրել | խմբագրել կոդը]Նամակագրությունը կալանավորների շրջանում խիստ կանոնակարգված էր։ Համակենտրոնացման ճամբարի համար հատուկ պատրաստվել էին «փոստային հավաքածու», որը կազմված էր ծրարից, ձևաթղթից և փոստային քարտից։ Քարտի վրա սոսնձում էին հատուկ թուղթ, որի վրա գրված էր հետևյալ բովանդակությամբ տեքստ.
«Բոլոր փոստային առաքումների վրա պետք է գրված լինի ազատազրկյալի անունն ու ազգանունը, ծննդյան թվականը, ճամբարային համարանիշը, բաժանմունքի համարը»։
Եթե որևէ մի տվյալ բացակայի, ապա փոստային առաքումը հետ կգա ուղարկողին[8]:
Ծրարների և ձևաթղթերի վերին ձախ հատվածում տպագրված էր մեջբերում ճամբարային կարգուկանոնից.
Ռավենսբրյուկ կանաց համակենտրոնացման ճամբար։ Քաղվածք ճամբարային կարգուկանոնից։ Յուրաքանչյուր կալանավոր կարող է ուղարկել կամ ստանալ մեկ նամակ կամ մեկ բացիկ ամսական մեկ անգամ։ Նամակները կարող են գրվել նորմալ ֆորմատի 4 էջի վրա՝ յուրաքանչյուր էջին 15 տողը չգերազանցող բովանդակությամբ, իսկ բացիկին՝ 10 տող։ Նամակի մեջ կարելի է դնել միայն մեկ փոստային նամականիշ 12 փֆենինգ արժողությամբ։ Մնացածները կբռնագրավվեն հօգուտ դրանցից չունեցող կալանավորի։ Լուսանկարներ ուղարկել չի թույլատրվում։ Փոստային բոլոր առաքումների ժամանակ անհրաժեշտ է նշել կալանավորի և բարաքի համարը։
Ցանկացած պարունակությամբ ծանրոցներ չեն ընդունվում։ Ճամբարում կարելի է ամեն ինչ գնել։ Գումար կարող եք ուղարկել միայն փոստով։ Նացիոնալ-սոցիալիստական թերթերը թույլատրելի են, բայց պետք է կալանավորներն անձամբ բաժանորդագրված լինեն ճամբարի փոստային գրաքննության հիմնարկում։ Ուղարկվող մարդու ազատության համար հայտարարություն տալն անմիտ է։ Ճամբարի պարետ[9] |
Ծրարի վերին ծայրով տպագրված էր հետևյալ տեքստը. «Անհասկանալի և վատ անընթեռնելի ձեռագրով նամակները չեն ենթարկվի գրաքննության և կոչնչացվեն»։ Նամակի համար շրջանակի տեսք ունեցող ձևաթղթի վրա տպագրված էր սահմանափակիչ գիծ, որի սահմաններից դուրս գալն արգելվում էր[8]։
Ճամբարի կալանավորների սպանություններ
[խմբագրել | խմբագրել կոդը]Ըստ տարբեր գնահատականների, Ռավենսբրյուկ համակենտրոնացման ճամբարում զոհվել է 50 000-ից 92 000 մարդ[3]։ Մահացության հիմնական պատճառներից էին՝ թերսնումը, քայքայող աշխատանքը, շատ վատ սանիտարահիգիենիկ պայմանները, թույլատրելի սահմանը գերազանցող մեծաքանակ կալանավորների մի վայրում տեղաբաշխումը, համակարգված կտտանքների ենթարկվելը ճամբարի ղեկավարության կողմից։
Ամիսը երկու անգամ անցկացվում էր կալանավորների ջոկում, որոնք ենթակա էին ոչնչացման[7]։ Այն կալանավորներին, որոնց ճանաչել էին որպես անաշխատունակ՝ ծոծրակից գնդակահարում էին։ Ամեն օր Ռավենսբրյուկում սպանում էին մինչև 50 մարդ։ Կալանավորներին հաճախ ուղարկում էին Օսվենցիմ և այլ մահվան ճամբարներ։ Զորօրինակ, 1942 թվականի մարտից ապրիլ ընկած ժամանակահատվածում, շուրջ 1600 «տեսակավորված» կին-կալանավորների Ռավենսբրյուկից սպանեցին Բեռնբուրգի գազախցիկներում[1]։
1942 թվականի օգոստոսից մինչև 1943 թվականի սկիզբը կատարվել է զանգվածային գնդակահարություն, որին զոհ գնաց լեհական ազնվականությունը։ Կրակեցին ավելի քան 700 կնոջ[7]։
Այսպես կոչված «14f13 գործողության» շրջանակներում Ռավենսբրյուկ համակենտրոնացման ճամբարում կար զանգվածային ոչնչացման վայր։ 1943-ից 1944 թվականներին շատ կալանավորներ զոհվեցին ֆենոլինինի ներարկումից[3]։ 1943 թվականի աշնանը ճամբարում կառուցվեց դիակիզարան։ Գոյացած ողջ մոխիրը լցնում էին Շվեդտզեե լիճը։
1944 թվականի ավարտին, Հայնրիխ Հիմլերի ռավենսբրյուկյան այցելությունից հետո, ճամբարի ղեկավարությունը հրաման ստացավ վերացնել բոլոր ծերերին, հիվանդներին և անաշխատունակներին։ Ռավենսբրյուկ ժամանեցին այսպես կոչված սպանությունների «փորձագետներ», որոնց մեջ էր նաև ՍՍ-ի ունտերշտուրմֆյուրեր Յոհան Շվարցգուբերը՝ Օսվենցիմ-Բիրկենաուի տնօրենը։ Նրանց գալով սկսվեցին զանգվածային ոչնչացման գործողությունները։ Կանանց ընտրում էին հատուկ շքերթների ժամանակ և ընտրվածներին տալիս վարդագույն հատուկ քարտեր, որոնց վրա գրված էին՝ «V. V.» (գերմ.՝ Vernichtungslager, Vernichten՝ մահվան ճամբար, ոչնչացնել)։ Նախկինում այդպիսի քարտեր տրամադրում էին ծանր աշխատանքից ազատվածներին, որոնք ժամանակին դարձան իսկական մահվան անձնագրեր։ Այդ անձնագրերը ստանալով կանանց տեղափոխում էին այսպես կոչված «Ուկկերմարկի երիտասարդների իրավունքների պահպանման ճամբար», որտեղ սպանում էին բոլորին։ Ընդ որում, գրանցման մատյաններում նշում էին կատարում այն մասին, որ կալանավորներին տարհանել են Սիլեզիա՝ Միտտելվերդեի առողջության վերականգնման կենտրոն։ Այդպիսով, մի քանի ամսվա ընթացքում, մինչև դրա ազատագրումը, այն դարձավ մահվան ճամբար։ Սկզբից կանանց գնդակահարում էին ծոծրակներից։ Մի քանի հարյուր կանաց գնդակահարելուց հետո, Ռավենսբրյուկի պարետը որոշեց, որ այդ մեթոդը հույժ դանդաղ է։ 1944 թվականի դեկտեմբերին Ուկկերմարկ երիտասարդական ճամբարում կառուցեցին գազային խցիկներ։
Ճամբար պարեկ Շվարցգուբերի օգնականը գազի խցիկների մասին այսպես է նկարագրել.
1945 թվականի հունվարի վերջից մինչև ապրիլի սկիզբ Ուկկերմարկում գնդակահարվեցին կամ գազով խեղդամահ արվեցին 5 000-6 000 կալանավորի[1]։ Այդ բանտարկյալների անունները ցայսօր էլ անհայտ են մարդկությանը։ Ռավենսբրյուկի ազատագրման նախօրեին ՍՍ-ի անդամները ոչնչացրին բոլոր փաստաթղթերը։
Մի փրկված ցուցակում, որը ժամանակին կազմել էին Ռավենսբրյուկի ղեկավարության ներկայացուցիչները, թվարկված է 25 028 կնոջ անուն։ Նրանցից 24,9% լեհեր են, 19,9%՝ գերմանացիներ, 15,1%՝ հրեաներ, 15% ռուսներ, 7,3%՝ ֆրանսիացիներ, 5,4%՝ գնչուներ և 12,4%՝ այլ ազգերի ներկայացուցիչներ։ Այդ կանանց 83,54% քաղաքական հանցագործներ էին, 12,35% հակահասարակական վարք ունեին, 2,02% պոռնիկներ էին, 1,11% Եհովայի վկաներ էին, իսկ 0,78% «ռասան պղծողներ», իսկ 0,2%՝ այլ։
Բժշկական փորձարկումներ
[խմբագրել | խմբագրել կոդը]1942 թվականի օգոստոսի 1-ից Ռավենսբրյուկ համակենտրոնացման ճամբարում սկսեցին անցկացնել բժշկական փորձարկումներ կալանավորների վրա։ Փորձերի են ենթարկվել 86 կին, որոնցից 74 լեհեր էին։
Փորձարկումների առաջին փուլն ուղղված էր ստրեպտոցիդի արդյունավետության հաստատմանը հրազենային վերքի մշակման ժամանակ։ Կալանավորներին տալիս էին ստաֆիլոկոկ, գազային փտախտի և փայտացման հարուցիչներ, ինչպես նաև միաժամանակ մի շարք բակտերիաներ։ Գրեթե միշտ կալանավորների ազդրերին անում էին խորը, մինչև ոսկորը հասնող կտրվածքներ, որտեղ տեղադրում էին բակտերիաները։ Հաճախ, որպեսզի փորձարկումն ավելի բնական լիներ, կտրվածքների մեջ տեղադրում էին փայտյա, մտաղական կամ ապակյա կտորներ։ Ընդ որում, մանրակրկիտությամբ գրանցում էին մարմնի ջերմաստիճանը, ցավերը, հյուսվածքներում նեկրոզների հայտնվելը և այլ ախտանշաններ։ Կենդանի մարդկանց վրա փորձարկումների արդյունքում Հայնրիխ Հիմլերի անձնական բժիշկ Կարլ Գեբհարդտը 1943 թվականի մայիսին հանդես եկավ զեկույցով՝ «Հատուկ փորձարկումներ, որոնք վերաբերում են ստրեպտոցիդի ազդեցությանը» Բեռլինի ռազմական ակադեմիայում[10]։
Փորձարկումների երկրորդ շարքն ուղղված էր ոսկրային հյուսվածքների տրանսպլանտացիայի ուսումնասիրմանը, ոսկորների վերականգնմանը, մկաններին ու նյարդերին։ Փորձարկումների ժամանակ խեղում էին առողջ կանանց և գիպս դնում կոտրվածքներին։ Փորձին հետևելու նպատակով կտրում էին առողջ մարդու մարմնի մասերը և դուրս հանում ոսկորները։ Երբեմն առողջ կալանավորների ոտքերը, ձեռքերն ու թիակներն էին ծայրատում և տեղափոխում էին Հոենլիխեն համակենտրոնացման ճամբար, պրոֆեսոր Գեբհարդտի մոտ, որտեղ վերջինս իր ընկերների՝ ՍՍ-ի վիրաբույժներ Շտումպֆֆեգգերի և Շուլցի հետ փորձեր էին անում[10]։ Այդ փորձարկումների արդյունքում զոհվեցին մի շարք կանայք, ողջ մնացածները ամբողջ կյանքում մնացին խեղանդամ։
Որպեսզի հետևեն ռեանիմացիայի պրոցեսին, կալանավոր կանանց սառեցնում էին։ Կատարում էին նաև ամլացման փորձարկումներ. հիմնական զոհերը հրեաներն ու գնչուներն էին։ 1945 թվականի հունվար ամսին Ռավենսբրյուկում ամլացրել են 120-140 գնչուհու[1]։
Ռավենսբրյուկ համակենտրոնացման ճամբարի կալանավորների նկատմամբ բժշկական փորձարկումներին մասնակցել են մի շարք բժիշկներ ՍՍ-ի հաուպտշտուրմֆյուրեր Վալտեր Զոննթագի (Walter Sonntag, 1940 թվականի մայիսի 2-ից 1941 թվականի դեկտեմբեր, այլ աղբյուրներով 1941 թվականի հուլիսից 1942 թվականի փետրվար) և ՍՍ-ի հաուպտշտուրմֆյուրեր Գերհարդ Շիդլաուսկիի (Gerhard Schiedlausky) ղեկավարությամբ։ Անմիջական ղեկավար էր համարվում պրոֆեսոր Կարլ Գեբհարդտը[10]։ Փորձարկումներին մասնակցություն ցուցաբերած բժիշկներից են եղել.
- Ադոլֆ Վինկելման (Adolf Winkelmann), 1945 թվականի վերջին նշանակվել է ճամբարային բժիշկ։ Ենթարկվել է Ռիխարդ Տրոմերին։ Հայտնի է նրանով, որ 1945 թվականի մարտի 11-ին Ռավենսբրյուկում կազմակերպել է այսպես կոչված «Սպորտի տոնը»։ ՍՍ-ականները ստիպում էին կալանավորներին թռնել խրամատի վրայից, վազք կատարել և մեծ ծանրություն ունեցող վարժություններ անել։ Շատ հիվանդներ, ծերեր կամ հոգնած կանայք չէին դիմանում այդ կտտանքներին և ուղարկվում էին գազի խցիկներ։
- Հերտա Օբերհոյզեր, 1940-ից 1943 թվականներին զբաղվել է կալանավորների նյարդերի, մկանների և ոսկրային հյուսվածքների տրանսպլանտացիայով։ Տանջամահ է արել առողջ երեխաներին՝ նրանց ներարկելով նավթ և բարբիտուրատներ, հետո ծայրատել է վերջույթները՝ ուսումնասիրելու նպատակով։ Ներարկման և դրան հաջորդող մահվան ժամանակը կազմում էր 3-ից 5 րոպե, ընդ որում, մարդը լիակատար գիտակցության մեջ էր գտնվում։
- Բեննո Օրենդի (Benno Orendi), 1944 թվականի ապրիլի 26-ից դեկտեմբորի 21-ը փորձարկումներ է կատարել կալանավորների ոսկորների ռեգեներացիայի, մկանների և նյարդերի վրա։ Ուսումնասիրել է հակաբիոտիկների ազդեցությունը կալանավորներին վարակի ներարկումից հետո։
- Հելմուտ Պոպպենդիկ, մասնակցել է զանազան բժշկական փորձարկումների։
- Ռոլֆ Ռոզենտալ (Rolf Rosenthal), 1942 թվականի հունվարից 1943 թվականի հուլիսը եղել է ճամբարային բժիշկ։ Հայտնի է իր սադիստական մոտեցումներով։ Կատարել է հղիության ընդհատման փորձեր մինչևիսկ հղիության 8-րդ ամսում գտնվող կանանց վրա։ Պտուղն այրում էին հնոցում, նույնիսկ եթե կենդանի էր։
- Պերսիվալ Թրեյդ (Percival Treite), 1943 թվականի սեպտեմբերից, մինչև ԽՍՀՄ Կարմիր բանակի կողմից Ռավենսբրյուկի ազատագրումը, եղել է ճամբարային կրտսեր բժիշկ։ Սպանել է տուբերկուլոզով հիվանդներին՝ սրտի մեջ ներարկում անելով, կամ ուղարկելով Մայդանեկ մահվան ճամբար։
- Ռիխարդ Թրոմմեր (Richard Trommer), 1943 թվականի օգոստոսից մինչև ճամբարի տարհանումը ճամբարային գլխավոր բժիշկն էր։ 1945 թվականի փետրվարից կատարել է հիվանդների և անաշխատունակների ընտրություն՝ գազային խցիկներում սպանդի ենթարկելու նպատակով։ Նրա ընտրությամբ առանձնացված կանանց թիվը 1945 թվականի փետրվարից մարտ ընկած ժամանակահատվածում հասավ ավելի քան 4,5 հազարի։
- Մարտին Հելլինգեր (Martin Hellinger), ղեկավարել է ատամնաբուժական ծառայությունը 1943 թվականի մարտից 1945 թվականի ապրիլ ամիսը։ Անձամբ է քաշել բոլոր մեռածների ոսկե ատամները՝ դիակիզումից առաջ։
Պահպանություն
[խմբագրել | խմբագրել կոդը]Ռավենսբրյուկ համակենտրոնացման ճամբարի պարեկ եղել են ներքոհիշյալ անձինք.
- մայիս, 1939 թիվ՝ ՍՍ-ի շտանդարտենֆյուրեր Գյունտեր Տամաշկե (Günther Tamaschke)
- հունվար, 1940 թիվ՝ ՍՍ-ի հաուպտշտուրմֆյուրեր Մաքս Քյոգել (Max Koegel)
- 1942 թվականի սեպտեմբերի 1-ից 1945 թվականի ապրիլի 27 կամ 29՝ ՍՍ-ի հաուպտշտուրմֆյուրեր Ֆրից Զուհրեն
Տղամարդկանց ճամբարը գտնվում էր ՍՍ-ի հաուպտշտուրմֆյուրեր Յոհան Շվարցհուբերի (Johann Schwarzhuber) վերահսկողության ներքո։
Բացի տղամարդկանցից, Ռավենսբրյուկ ճամբարում 150-ից ավելի կին-հսկողներ կային։ Այս ճամբարում վերապատրաստում և մարզումներ են անցել ավելի քան չորս հազար վերակացուներ (Aufseherin), որոնք կամ մնացել են ու աշխատել են Ռավենսբրյուկում կամ էլ ծառայության անցել այլ ճամբարներում։ Կանանց ճամբարի ղեկավարներից են եղել ներքոհիշյալ անձինք.
- մայիս, 1939-1941՝ գլխավոր վերակացու Էմմա Ցիմմեր (Emma Zimmer), Յոհաննա Լանգեֆելդի (Johanna Langefeld) օգնականը
- 1941 թվականի մարտից 1942 թիվ՝ գլխավոր վերակացու Յոհաննա Լանգեֆելդ
- մարտից հոկտեմբեր, 1942 թիվ՝ գլխավոր վերակացու Մարիա Մանդել (Maria Mandel)
- 1942 թվի հոկտեմբերից 1943 թվի օգոստոս՝ Յոհաննա Լանգեֆելդ, որը վերադարձել էր Օսվենցիմից
- 1943 թվի օգոստոսից 1944 թվի սեպտեմբեր՝ գլխավոր ավագ վերակացու Աննա Քլայն-Պլաուբել (Anna Klein-Plaubel), բանտային վերակացու՝ Դորոթեա Բինց (Dorothea Binz)
- 1944 թվի սեպտեմբերից 1945 թվի ապրիլ՝ գլխավոր ավագ վերակացու Լուիզա Բրուններ (Luise Brunner), գլխավոր վերակացու՝ Հիլդեգարդ Նոյման (1944 թվականի հոկտեմբեր-նոյեմբեր), ճամբարի ղեկավար՝ Լոտտե Տոբերենց (Lotte Toberentz) (1945 թվականի հունվար-ապրիլ), բանտային վերակացու՝ Դորոթեա Բինց։
Այս կանանցից շատերը ծառայել են այլ համակենտրոնացման և մահվան ճամբարների բանտերում որպես վերակացու։ Ռավենսբրյուկի բլոկների (Blockfuehrerin) վերակացու կանայք միշտ ՍՍ-ի տղամարդկանց և շների ուղեկցությամբ, մտրակներով հետևում էին ճամբարի առօրյային։ Այս կանայք տարբերվում էին իրենց դաժանությամբ և սադիստական նկրտումներով։ Ճամբարի վերակացու կանաց թվին են պատկանել նաև ներքոհիշյալ անձինք.
- Յոհաննա Բորման (Johanna Bormann, 1893-1945), մահապատժի է ենթարկվել
- Թերեզա Բրանդլ (Therese Brandl, 1902-1948), մահապատժի է ենթարկվել
- Հերմինե Բրաունշտայներ (Hermine Braunsteiner, 1919-1999), դատապարտվել է 1981 թվականին ցմահ ազատազրկման
- Իրմա Գրեզե (1923-1945), մահապատժի է ենթարկվել
- Գրետե Բոյզել (Grete Boesel, 1908-1947), մահապատժի է ենթարկվել
- Էռնա Վոլիշ (Erna Wallisch, 1922-2008)
- Ռութ Նոյդեկ (Ruth Neudeck, 1920-1948), մահապատժի է ենթարկվել
- Մարգարեթ Ռաբե (Margarete Rabe, ծնվ. 1923), դատապարտվել է ցմահ ազատազրկման, 1954 (ըստ այլ աղբյուրների 1959) թվականին վաղաժամկետ ազատվել է կալանքից
- Իդա Շրայտեր (Ida Schreiter, 1912-1948), մահապատժի է ենթարկվել[11][12]։
«Մահվան երթ»
[խմբագրել | խմբագրել կոդը]1945 թվականի ապրիլի 27-ին սկսվեց Ռավենսբրյուկ տխրահռչակ ճամբարի տարհանումը։ Բացառությամբ 3500 թույլ ու հյուծված կանանց ու երեխաների, «մահվան երթով» դեպի արևմուտք քշեցին ավելի քան 20 000 մարդու[3]։
Ապրիլի 28-ին երթը հասավ դեպի Ռետով կոմունա, որտեղ գտնվում էր Ռավենսբրյուկի ներքին ճամբարը։ Սա մահվան երթի հանգստի առաջին վայրն էր։ Հաջորդ հանգստի վայրը Ռավենսբրյուկի Մալխով ներքին ճամբարն էր։ Շատ կալանավորներ այստեղ տաք սնունդ ստացան Ռավենսբրյուկից դուրս գալուց հետո։ Շատերի համար այս վայրը դարձավ «մահվան երթի» մասնակիցների վերջին հանգրվանը։
ՍՍ-ի պահակազորի անդամները փակեցին ճամբարի և բարաքների դարպասները և երեկոյան ամբողջությամբ լքեցին այն։ Հաջորդ օրը Մալխովն ազատագրվեց Կարմիր բանակի կողմից[1]։
«Մահվան երթի» վերջին կայանատեղին համարվում է Ռաբեն Շտեյնֆելդը։
Ճամբարի ազատագրում
[խմբագրել | խմբագրել կոդը]1945 թվականի ապրիլի 30-ին Կարմիր բանակի կողմից Ռավենսբրյուկում ազատագրվեց 3 000 հիվանդ կին և նրանց սպասարկող բժշկական անձնակազմը՝ կալանավորներից բաղկացած։ Մինչև 1945 թվականի մայիսի 3-ը 2-րդ Բելոռուսական զորագնդի օգնությամբ ազատագրվեցին Ռավենսբրյուկի ներքին ճամբարների կալանավորները[1]։
Ռազմական հանցագործների դատավարություն
[խմբագրել | խմբագրել կոդը]1946-ից 1948 թվականներն ընկած ժամանակահատվածում Համբուրգում տեղի ունեցավ Ռավենսբրյուկում գործունեություն ծավալած ՍՍ-ի անդամների դատավարությունները։ Հընթացս առաջին դատավարությունների՝ 16 հանցագործի համար կայացվեց մահապատժի դատավճիռ։
1973 թվականին ԱՄՆ-ի կառավարությունը Գերմանիային արտահանձնեց նախկին բանտային վերակացու Հերմինե Բրաունտշայներին (գերմ.՝ Hermine Braunsteiner), որպեսզի վերջինս կանգնի գերմանական ատյանի առաջ։ Հերմինեն բռնվել էր «նացիստների որսորդ» Սիմոն Վիզենտալի կողմից։
2006 թվականին Միացյալ Նահանգների իշխանությունները Գերմանիա արտաքսեցին Ռավենսբրյուկ ճամբարի նախկին վերակացու՝ ութսունչորսամյա Էլֆրիդա Ռինկելին, որը Սան Ֆրանցիսկոյում էր հաստատվել 1959 թվականից[13]։
Ճամբարի տարածքի օգտագործում ազատագրելուց հետո
[խմբագրել | խմբագրել կոդը]Մինչև 1993 թվականը Ռավենսբրյուկ նախկին ճամբարի տարածքում տեղաբաշխվել էին Կարմիր բանակի հետևյալ ստորաբաժանումները և 2-րդ գվարդիական տանկային կարմիր դրոշի շքանշանակիր բանակը․
- 60-րդ մոտոհրաձգային կարմիր դրոշի շքանշանակիր գունդ
- 1185-րդ դեսանտագրոհային գումարտակ (մինչև 1990 թվականը)
- 527-րդ հատուկ նշանակության վաշտ (1985 թվականի սեպտեմբերից տեղափոխվեց Շտենդալ)
- 52-րդ ռադիոտեխնիկական գումարտակ
- 5-րդ գվարդիական՝ Դեմբլինսկո-Պոմերանյան կապի գունդ
- Նյութական ապահովման 118-րդ զորամիավորում[14]
Հիշատակ
[խմբագրել | խմբագրել կոդը]Հուշահամալիր
[խմբագրել | խմբագրել կոդը]1959 թվականին Գերմանիայի Դեմոկրատական Հանրապետության կառավարությունը նախկին ճամբարի մի փոքր հատվածում ստեղծեց «Ռավեսբրյուկ ազգային հուշահամալիրը»։ Պարետատունը, կալանավորների սենյակները, դիակիզարանն ու Շվեդտզեե տանող մերձատար ուղիները, ինչպես նաև ճամբարային պատերի մի հատվածը ներառվեցին հուշահամալիրի տարածքի մեջ՝ որպես բնօրինակ օբյեկտներ։ Լճի ափին տեղադրվեց հուշակոթող՝ «Տանողը» անվանումով, որը ստեղծել է Վիլ Լամմերտը։ Խորհրդային զորքերի ծառայած հատվածներում պահպանվել էին ախտաբանական բաժանմունքը, ախտահանման հատվածը, կարի արհեստանոցը, բարաքների հիմքերը, ինչպես նաև ճամբարային ճանապարհները։
Նախկին պարետատան շինության մեջ ներկայացված էին ճամբարի պատմության ցուցանմուշները։ Հատուկ ուշադրության էր ներկայացված Դիմադրության շարժման բաժնին, որը ստեղծվել էր Գերմանիայի կոմունիստական կուսակցության կողմից։ 1991 թվականին, ըստ փորձագետների հետազոտության արդյունքների, ցուցադրությունը հանվեց, քանի որ գիտական տեսանկյունից այն անբավարար էր որակվել։ Մշակվեց նոր հայեցակարգ, և 1993 թվականին կրկին բացվեց նոր ցուցադրությունը։ 1994 թվականից Ռավենսբրյուկի հուշահամալիրում ներկայացվում է «Ռավենսբրյուկի կանայք» ցուցադրությունը, որտեղ 27 կանանց կենսագրությունն է ներկայացվում։ 1995 թվականից բացվեց «Ես ողջունում եմ ձեզ որպես ազատ մարդիկ» խորագիրը կրող ցուցադրությունը, որտեղ ներկայացված են փաստաթղթեր և լուսանկարներ 1945 թվականի ազատագրման ժամանակներից։
2004 թվականի հոկտեմբերին բացվեց նոր մշտական ցուցադրություն՝ «ՍՍ-ի շքախմբում՝ վերակացուները Ռավենսբրյուկ կանանց ճամբարում»։ Այն ցուցադրվում է ՍՍ-ի պահակախմբի հանրակացարանի պահպանված ութ շենքերից մեկում[15]։
2007 թվականին Ռավենսբրյուկ թանգարանում բացվեց «Հարկադրական սեքսը նացիոնալ-սոցիալիստական համակենտրոնական ճամբարներում» (Sex-Zwangsarbeit in NS-Konzentrationslagern) ցուցադրությունը, որը պատմում է կին-կալանավորների մասին, ովքեր պոռնկությամբ են զբաղվել ստիպողաբար։ 1942 թվականին, Հայնրիխ Հիմլերի մտահղացմամբ Ռավենսբրյուկում բացվում են հասարակաց տներ։ Դրանք ստեղծվել էին, որպեսզի այցելու տղամարդ-կալանավորների մոտ բարձրանա աշխատունակությունը, որոնք աշխատում էին ռազմական արդյունաբերությունում։ Կանանց մեծամասնությունը, որոնք մարմնավաճառությամբ էին զբաղվում ստիպողաբար, հավաքվել էին հենց Ռավենսբրյուկից[16]։
Փաստագրական ֆիլմեր
[խմբագրել | խմբագրել կոդը]1996 թվականին հոլանդացի ռեժիսոր և սցենարի հեղինակ Անետ վան Դարնևելդը (Anet van Barneveld) և Աննամարի Սթրեյբոսը (Annemarie Strijbosch) հիսունրոպեանոց կարճամետրաժ փաստագրական ֆիլմ նկարահանեցին՝ «Անցյալը կա» (հոլ.՝ Verleden aanwezig) վերնագրով։ Ֆիլմում նկարահանվել են նախկին հինգ կալանավոր կանայք եվրոպական տարբեր երկրներից՝ Ցեյա Ստոյկա (Ավստրիա), Լիդիա Ռոլֆի (Իտալիա), Աթ Բրյոր (Նիդերլանդներ), Ստելլա Կուգելման Գրիզ (Ռուսաստան) և Անտոնինա Նիկիֆորովա (ՌԴ)[17]։
2005 թվականին գերմանացի ռեժիսոր Լորետտա Վալցը (գերմ.՝ Loretta Walz) 90 րոպե տևողությամբ փաստագրական ֆիլմ նկարահանեց՝ «Ռավենսբրյուկի կանայք» (գերմ.՝ Die Frauen von Ravensbrück) վերնագրով։ Միաժամանակ լույս տեսավ նաև ռեժիսորի գիրքը՝ «Եվ դու այդտեղ ես հայտնվում ամառային մի հիանալի օր։ Ռավենսբրյուկի կանայք»[18][19]։
Ռավենսբրյուկը ֆիլատելիայում
[խմբագրել | խմբագրել կոդը]1957 թվականի ապրիլին ԳԴՀ-ի փոստը թողարկեց երկու փոստային նամականիշից բաղկացած շարք, որը նվիրված էր Ռավենսբրյուկի հուշահամալիրին[20]։
Ռավենսբրյուկի հայտնի կին-կալանավորների ցուցակ
[խմբագրել | խմբագրել կոդը]- Շառլոտա Այզենբլետտեր, (1903-1944) - Գերմանիայի Դիմադրության շարժման մասնակից
- Մարիա Անզորգե, (1880-1955) - գերմանացի քաղաքական գործիչ, Գերմանիայի սոցիալ-դեմոկրատական կուսակցության անդամ
- Լուիզա Ասլանյան (Louise Aslanian, 1906-1945) - ֆրանսահայ գրող, Ֆրանսիայի Դիմադրության շարժման հերոս, զոհվել է Ռավենսբրյուկում
- Էլիզա Աուգուստաս (Elise Augustat, 1889-1940) - գերմանացի քաղաքական գործիչ
- Անժելա Աուչ (Angela Autsch, 1900-1944) - կաթոլիկ միանձնուհի
- Դինա Բաբիտ (Dinah Babbitt, 1923-2009) - ամերիկաչեխական նկարչուհի և քանդակագործ
- Մարիա Բայդա (1922-2002) - ԽՍՀՄ հերոս
- Նինա Բառանովա (1927-2004) - Ռավենսբրյուկի ընդհատակյա գործիչ
- Հենրիկա Բարտնիցկա-Թայխերտ (Henryka Bartnicka-Tajchert, 1922-1997) - «Գորշ շարքեր» (Szare Szeregi) լեհական ընդհատակի անդամ
- Օլգա Բենարիո-Պրեստես (1908-1942) - գերմանաբրազիլական կոմունիստ, հեղափոխական
- Մայա Բերեզովսկա (Maja Berezowska, 1898-1978) - լեհ նկարչուհի, ծաղրանկարիչ
- Պաուլա Բերնար (Paule Bernard, 1920-1974) - Ֆրանսիայի Կարմիր խաչի բուժքույր
- Էսթեր Բեյարանո (Esther Béjarano, ծնված 1924) - Օսվենցիմի աղջիկների օրկեստրի մասնակից
- Գալինա Բիրենբաում (Halina Birenbaum, ծնված 1929) - հրեա գրող
- Դենիս Բլոշ (Denise Bloch, 1915-1945) - ֆրանսիացի լրտես Մեծ Բրիտանիայի կողմից
- Կորի տեն Բոմ (1892-1983) - ընդհատակյա գործիչ, ով Նիդերլանդներում Հոլոքոստից հրեաներին է փրկել
- Մարիա Բորտնովսկա (Maria Bortnowska, 1894-1972) - Կրայովի բանակի անդամ
- Աթ Բրյոր-Հիմբա (Aat Breur-Hibma, 1913-2002) - հոլանդացի նկարիչ և գծագրող
- Դանուտա Բժոսկո-Մենդրիկ (Danuta Brzosko-Mędryk, ծնված 1921) - լեհ բժիշկ-ատամնաբույժ, գրող
- Մարիա Բրել-Պլատեր-Սկասսա (Maria Broel-Plater-Skassa, 1913-2005) - դեղագործ, Լեհաստանի Դիմադրության շարժման անդամ, բժշկական փորձարկումների զոհ (վարակվել է գազային փտախտով)
- Անտոնիա Բրուհա (Antonia Bruha, 1915-2006) - Ավստրիայի Դիմադրության շարժման անդամ, գրող
- Մարգարեթ Բուբեր-Նոյման (Margarete Buber-Neumann, 1901-1989) - գերմանացի կոմունիստ, հրապարակախոս
- Մարի-Կլոդ Վայյան-Քություրիե (Marie-Claude Vaillant-Couturier, 1912-1996) - Ֆրանսիայի Դիմադրության շարժման անդամ, քաղաքական գործիչ
- Իզա Վերմեհրեն (Isa Vermehren, ծնված 1918) - կաբարեի արտիստ, դերասանուհի, 1950-ականներին դարձել է միանձնուհի
- Ուրշուլա Վինսկա (Urszula WińskaԱրխիվացված 2012-01-19 Wayback Machine, 1902-2003) - մեմուարների հեղինակ
- Ռոզա Վինտեր (Rosa Winter, 1923-2005)
- Ժենևի դը Գոլ-Անտոնիոզ (1920-2002) - Ֆրանսիայի Դիմադրության շարժման անդամ, Շառլ դը Գոլի եղբորորդին
- Վերա Գորբաչյովա (1912-1944) - Բրեստի հակաֆաշիստական ընդհատակյան շարժման մասնակից, զոհվել է վեցամյա որդու հետ գազի խցիկում
- Ժուլիետ Գրեկո (ծնված 1927) - ֆրանսիացի դերասանուհի և երգիչուհի
- Մարիա Գրոլմուս (Maria Grollmuß, 1896-1944) - կաթոլիկ հրապարակախոս, Գերմանիայի Դիմադրության շարժման մասնակից
- Հաննա Դեմիդեչկա-Դեմիդովիչ (Hanna Demidecka-DemidowiczԱրխիվացված 2012-01-19 Wayback Machine, 1901-1957) - լեհ նկարչուհի
- Վանդա Դոբաչևսկա (Wanda Dobaczewska, 1892-1980) - լեհ գրող
- Մարիա Ֆիլոմենա Դոլոնսկա (Marie Filomena Dolanská, 1895-1943) - չեխ մանկավարժ և միանձնուհի
- Մարիա Զենտարա-Մալևսկա (1894-1984) - լեհ գրող և հասարակական գործիչ
- Միլենա Եսենսկա (1896-1944) - չեխ գրող, լրագրող, Ֆրանց Կաֆկայի նամակների հասցեատեր
- Մարի-Լուիզ Զարրե (Marie-Louise Sarre, 1904-1999) - գերմանացի քանդակագործ, Գերմանիայի Դիմադրության շարժման մասնակից
- Լիզլ Յոգեր (Lisl Jäger, ծնված 1924) - ավստրիացի լրագրող, հակաֆաշիստ
- Ռոզա Յոխման (Rosa Jochmann, 1901-1994) - Ավստրիայի Դիմադրության շարժման մասնակից, քաղաքական գործիչ
- Վանդա Կեջինսկա (Wanda KiedrzyńskaԱրխիվացված 2012-01-19 Wayback Machine, 1901-1985) - լեհ գրող,
- Օլգա Քյորներ (Olga Körner, 1887-1969) - Գերմանիայի աշխատավորական կուսակցության գործիչ
- Էուխենիա Կոցվա (Eugenia KocwaԱրխիվացված 2012-01-19 Wayback Machine, 1907-1963) - Լեհաստանի Դիմադրության շարժման անդամ
- Քեթե Լայխտեր (Käthe Leichter, 1895-1942) - ավստրիացի սոցիոլոգ
- Կարոլինա Լանցկորոնսկա (Karolina Lanckorońska, 1898-2002) - պատմաբան, արվեստաբան
- Եվա Լաուբհարդտ (Eva Laubhardt, 1904-1998) - քահանա և Դիմադրության շարժման մասնակից
- Էռնա Լյուգեբիլ (Erna Lugebiel, 1898-1984) - Գերմանիայի Դիմադրության շարժման մասնակից
- Գերթրուդ Լյունկեր (Gertrud Luckner, 1900-1995) - Գերմանիայի Դիմադրության շարժման մասնակից
- Անյա Լունդհոլմ (Anja Lundholm, 1918-2007) - գերմանացի գրող
- Լիանա Միլլու (Liana Millu, 1914-2005) - իտալացի գրող
- Կարմեն Մորի (Carmen Mory, 1906-1947) - կապո համակենտրոնացման ճամբարում, հանցագործ
- Քեթե Նիդերքիրխներ (Käthe Niederkirchner, 1909-1944) - կոմունիստ, Գերմանիայի Դիմադրության շարժման մասնակից
- Թերեզա Նոչե (Teresa Noce, 1900-1980) - իտալացի պարտիզան և քաղաքական գործիչ
- Դագմար Օստերման (Dagmar Ostermann, ծնված 1920)
- Օնդինա Պետեանի (Ondina Peteani, 1925-2003) - իտալացի պարտիզան
- Զոֆիա Պոսմիշ (Zofia Posmysz, ծնված 1923) - լեհ գրող, սցենարիստ
- Հելենե Պոտեց (Helene Potetz, 1902-1987) - ավստրիացի քաղաքական գործիչ
- Զոֆիա Պոցիլովսկա-Կանն (Zofia Pociłowska-Kann, ծնված 1920) - լեհ նկարչուհի, քանդակագործ
- Աննա Պրյոլ (Anna Pröll, 1916-2006) - Գերմանիայի Դիմադրության շարժման մասնակից
- Վանդա Պուլտավսկա (Wanda Półtawska, ծնված 1921) - բժշկական գիտությունների դոկտոր, հոգեբույժ
- Էլիզ Ռիվե (Élise Rivet, 1890-1945) - Ֆրանսիայի Դիմադրության շարժման անդամ
- Լիլիան Ռոլֆ (անգլ.՝ Lilian Rolfe, 1914-1945) - Ֆրանսիայի Դիմադրության շարժման անդամ
- Զոֆիա Ռոմանովիչովա (Zofia Romanowiczowa, ծնված 1922) - լեհ գրող ւ թարգմանիչ
- Ֆիլիպինա դը Ռոտշիլդ-Սերեյս (Philippine de Rothschild-Sereys, ծնված 1933) - բարոնուհի, գինեգործ
- Զոֆիա Ռիսյուվնա (Zofia Rysiówna, 1920-2003) - թատրոնի և կինոյի լեհ դերասանուհի
- Վերա Սալվեկվարտ (1919-1947) - բուժքույր, կապո, ռազմական հանցագործ
- Վիոլետտա Սաբո (Violette Szabo, 1921-1945) - Դիմադրության շարժման մասնակից, Բրիտանական դիվերսիոն խմբի անդամ
- Էուխենիա ֆոն Սկենե (Eugenia von Skene, 1906-?) - կապո
- Մարիա Սկոբցովա (Մայր Մարիա, 1891-1945) - Կոստանդնուպոլսի տիեզերական պատրիարքության միանձնուհի, բանաստեղծ, Ֆրանսիայի Դիմադրության շարժման մասնակից
- Սեյա Ստոյկա (Ceija Stojka, ծնված 1933) - ավստրիացի գրող, նկարիչ
- Իրենա Տարնովսկա (Irena Tarnowska, 1900-1984) - լեհ մանկավարժ, սկաուտ
- Յոհաննա Տեշ (Johanna Tesch, 1875-1945) - գերմանացի քաղաքական գործիչ
- Ժերմեն Տիյոն (Germaine Tillion, 1907-2008) - ֆրանսիացի էթնոլոգ, Ֆրանսիայի Դիմադրության շարժման անդամ
- Էմիլի Տիյոն (Émilie Tillion, 1876-1945) - ֆրանսիացի գրող, Ֆրանսիայի Դիմադրության շարժման անդամ
- Նատալիա Տուլասևիչ (Natalia Tułasiewicz, 1906-1945) - լեհ կաթոլիկ աստվածաբան
- Մարթա Ֆուխս (Martha Fuchs, 1892-1966) - գերմանացի քաղաքական գործիչ
- Մարիա Հիշպանսկա-Նոյման (Maria Hiszpańska-Neumann Արխիվացված 2014-04-07 Wayback Machine, 1917-1980) - լեհ նկարչուհի և գրաֆիկ
- Ալինա Ցենտկևիչ (Alina Centkiewicz, 1907-1993) - լեհ գրականագետ
- Շարլոտա Ցինկե (Charlotte Zinke, 1891-1944) - գերմանացի քաղաքական գործիչ
- Հիլդեգարդ Շեդեր (Hildegard Schaeder, 1902-1984) - գերմանացի եկեղեցու պատմաբան
- Կատարինա Շտարից (Katharina Staritz, 1903-1953) - գերմանացի աստվածաբան
- Աննա Շտիգլեր (Anna Stiegler, 1881-1963) - գերմանացի քաղաքական գործիչ
- Աննա Էբերտ (Anna Ebert, 1889-1947) - գերմանացի քաղաքական գործիչ
- Էլիզա Էվերտ (1907-1940) - գերմանացի հեղափոխական-կոմունիստ
- Յոժկա Յաբուրկովա (չեխ․՝ Jožka Jabůrková, 1896-1942) - չեխ լրագրող և գրող
- Վանդա Յակուբովսկա (1907-1998) - լեհ կինոռեժիսոր
Ռավենսբրյուկի որոշ հայտնի տղամարդ-կալանավորներ
[խմբագրել | խմբագրել կոդը]- Յուրեկ Բեքքեր (1937-1997) - գերմանացի գրող, որը ճամբարում հայտնվել է 5 տարեկանում
- Օյգեն Անտոն Բոլց (1881-1945) - գերմանացի քաղաքական գործիչ
- Ֆրից Վոլֆհայմ (Fritz Wolffheim, 1888-1942) - գերմանացի քաղաքական գործիչ
- Պյոտր Գավրիլով (1900-1979) - խորհրդային սպա, ԽՍՀՄ հերոս
- Կառլ Զեյց (1869-1950) - ավստրիացի քաղաքական գործիչ
- Կառլ Կունկել (Karl Kunkel, 1913-2012) - գերմանացի կաթոլիկ քահանա
- Յուլիուս Լեբեր (գերմ.՝ Julius Leber, 1891-1945) - գերմանացի քաղաքական գործիչ, Դիմադրության շարժման անդամ
- Գուստավ Նոսկե (գերմ.՝ Gustav Noske, 1868-1946) - գերմանացի քաղաքական գործիչ
- Ռուդոլֆ Պեխել (Rudolf Pechel, 1882-1961) գերմանացի լրագրող, Դիմադրության շարժման անդամ
- Յոզեֆ Ռայտեր (Josef Reither, 1880-1950) - ավստրիացի քաղաքական գործիչ
- Յալմար Շախտ (1877-1970) - գերմանացի ֆինանսիստ և քաղաքական գործիչ
- Օտտո Շնիվինդ (Otto Schniewind, 1887-1970) - գերմանացի ֆինանսիստ
Պատկերասրահ
[խմբագրել | խմբագրել կոդը]Դիակիզարան | Ճամբարի դարպասներ (տեսարան ներսից), հին հեռախոսային կայան և ջրատեխնիկական սարքավորում | Ճամբարի դարպասներ (տեսարան դրսից), պահակազորի տունը | Բարաքների ընդհանուր տեսքը, 1939 թիվ |
Հուշարձան «Տանողը» | ՍՍ-ի նախկին պարեկատուն, այժմ թանգարան | ՍՍ-ի պահակազորի բնակելի շենք | Գերմանական փոստային նամականիշ |
Գրականություն
[խմբագրել | խմբագրել կոդը]- Гоби В. Детская комната. Пер. с французского. - Харьков, Белгород: Клуб семейного досуга, 2016. - 224 стр. ISBN 978-59910-3516-3
- Мюллер Ш. Слесарная команда Равенсбрюка: Воспоминания заключённой № 10787. Пер. с нем. — М.: Политиздат, 1985. — 174 с.
- Christian Bernadac. Les mannequins nus, Ravensbrück, le camp des femmes. Famot, 1975.
- Lord Russel of Liverpool. The Scourge of Swastika. A short history of Nazi War Crimes illustrated. London: Corgi Books.
- Jack G. Morrison. Ravensbrück. Das Leben in einem Konzentrationslager für Frauen 1939—1945. Pendo, 2002. ISBN 3-85842-486-2
- Germaine Tillion. Frauenkonzentrationslager Ravensbrück. Fischer, Frankfurt, 2001. ISBN 3-596-14728-X
- Loretta Walz. Und dann kommst du dahin an einem schönen Sommertag. Die Frauen von Ravensbrück. Kunstmann, 2005. ISBN 3-88897-388-0
- Brown, Daniel Patrick. The Camp Women: The Female Auxiliaries Who Assisted the SS in Running the Concentration Camp System, 0-7643-1444-0. This is where the information on female guards with the exceptions of Suze Arts and Elisabeth Lupka was obtained from.
- Helm, Sarah (2015). If This Is A Woman: Inside Ravensbruck: Hitler's Concentration Camp for Women. London: Little, Brown. ISBN 978-1-4087-0107-2.
- Marlies Lammert: Will Lammert – Ravensbrück, Akademie der Künste, Berlin 1968. In German
- Saidel, Rochelle G. (2006). The Jewish Women of Ravensbrück Concentration Camp. University of Wisconsin Press. ISBN 978-0-299-19864-0.
- Karolin Steinke: Trains to Ravensbrück. Transports by the Reichsbahn 1939–1945, Metropol Verlag, Berlin 2009, 978-3-940938-27-5.
- Delia Müller, Madlen Lepschies: Tage der Angst und der Hoffnung. Erinnerungen an die Todesmärsche aus dem Frauen-Konzentrationslager Ravensbrück Ende April 1945. Dr. Hildegard Hansche Stiftung Berlin.. 3-910159-49-4.
- Snyder, Timothy D. (2015). Black Earth. The Holocaust As History and Warning. ISBN 978-1-101-90346-9.
- See Carola Sachse: Jewish forced labor and non-Jewish women and men at Siemens from 1940 to 1945, in: International Scientific Correspondence, No. 1/1991, pp. 12–24; Karl-Heinz Roth: forced labor in the Siemens Group (1938–1945). Facts, controversies, problems, in: Hermann Kaienburg (ed.): concentration camps and the German Economy 1939–1945 (Social studies, H. 34), Opladen 1996, pp. 149–168; Wilfried Feldenkirchen: 1918–1945 Siemens, Munich 1995, Ulrike fire, Claus Füllberg-Stolberg, Sylvia Kempe: work at Ravensbrück concentration camp, in: Women in concentration camps. Bergen-Belsen. Ravensbrück, Bremen, 1994, pp. 55–69; Ursula Krause-Schmitt: The path to the Siemens stock led past the crematorium, in: Information. German Resistance Study Group, Frankfurt / Main, 18 Jg, No. 37/38, Nov. 1993, pp. 38–46; Sigrid Jacobeit: working at Siemens in Ravensbrück, in: Dietrich Eichholz (eds) War and economy. Studies on German economic history 1939–1945, Berlin 1999.
- Bundesarchiv Berlin, NS 19, No. 968, Communication on the creation of the barracks for the Siemens & Halske, the planned production and the planned expansion for 2,500 prisoners "after direct discussions with this company": Economic and Administrative Main Office of the SS ( WVHA), Oswald Pohl, secretly, to Reichsführer SS (RFSS), Heinrich Himmler, dated 20.10.1942.
- Karl-Heinz Roth: forced labor in the Siemens Group, with a summary table, page 157 See also Ursula Krause-Schmitt: "The road to Siemens stock led past the crematorium," pp. 36f, where, according to the catalogs of the International Tracing Service Arolsen and Martin Weinmann (eds.). The Nazi camp system, Frankfurt / Main 1990 and Feldkirchen: Siemens 1918–1945, pp. 198–214, and in particular the associated annotations 91–187.
- Wanda Kiedrzy'nska, in: National Library of Poland, Warsaw, Manuscript Division, Sygn. akc 12013/1 and archive of the memorial I/6-7-139 RA: see also: Woman Ravensbruck concentration camp. An overall presentation, State Justice Administration in Ludwigsburg, IV ART 409-Z 39/59, April 1972, pp. 129ff.
- Megargee, Geoffrey P., ed. (2012). Encyclopedia of Camps and Ghettos, 1933–1945. in association with United States Holocaust Memorial Museum. Bloomington: Indiana University Press. ISBN 978-0-253-35599-7.
Ծանոթագրություններ
[խմբագրել | խմբագրել կոդը]- ↑ 1,00 1,01 1,02 1,03 1,04 1,05 1,06 1,07 1,08 1,09 1,10 1,11 «Концлагерь Равенсбрюк». Вторая мировая война 1939-1945. Արխիվացված է օրիգինալից 2009 թ․ փետրվարի 26-ին. Վերցված է 2012 թ․ հունվարի 30-ին.
{{cite web}}
: External link in
(օգնություն)|work=
- ↑ 2,0 2,1 Карасева Н. Д. (16 июня 2007). «Штурман экипажа Великая Отечественная война». Православие и мир. Արխիվացված է օրիգինալից 2012 թ․ հունվարի 30-ին. Վերցված է 2009 թ․ հունվարի 23-ին.
- ↑ 3,0 3,1 3,2 3,3 «Антифашистский центр Равенсбрюк». Молодёжная правозащитная группа Республики Карелия. 2005 թ․ մայիսի 26. Արխիվացված է օրիգինալից 2008 թ․ փետրվարի 26-ին. Վերցված է 2009 թ․ հունվարի 23-ին.
{{cite web}}
: External link in
(օգնություն)|work=
- ↑ 4,0 4,1 4,2 Аристов С. — Воронежский государственный педагогический университет««Судьбы бывших узниц Равенсбрюка – «белое пятно» исторической памяти России. Опыт участника Воронежского семинара устной истории»». Международная программа «Поддержка молодых российских исследователей». Արխիվացված է օրիգինալից 2012 թ․ հունվարի 30-ին. Վերցված է 2009 թ․ հունվարի 23-ին.
{{cite web}}
: External link in
(օգնություն)|work=
- ↑ «Личная история. Бланка Ротшильд». Энциклопедия Холокоста. Արխիվացված օրիգինալից 2012 թ․ փետրվարի 2-ին. Վերցված է 2012 թ․ հունվարի 30-ին.
- ↑ Amesbergerová H., Auerová K., Halbmayrová B. Sexualizované násilí. Ženské zkušenosti z nacistických koncentračních táborů. — Praha, 2005. — S. 258. ISBN 80-7341-585-2
- ↑ 7,0 7,1 7,2 7,3 7,4 7,5 Мюллер (1985)
- ↑ 8,0 8,1 Арзуманов Г. Коллекция обвиняет // Филателия СССР. — 1975. — № 9. — С. 10-11.
- ↑ Арзуманов Г. Коллекция обвиняет // Филателия СССР. — 1975. — № 9. — С. 10-11.
- ↑ 10,0 10,1 10,2 «Конвейер смерти». глава 5 из книги Д. Мельникова и Л. Чёрной «Империя смерти». Արխիվացված է օրիգինալից 2012 թ․ փետրվարի 2-ին. Վերցված է 2012 թ․ հունվարի 30-ին.
- ↑ При написании раздела использовались материалы из французской статьи Ravensbrück, раздел Personnel, немецкой статьи KZ Ravensbrück, раздел Personal, а также биографических статей указанных персоналий
- ↑ Silke Schäfer — Dissertation (6 февраля 2002). «Zum Selbstverständnis von Frauen im Konzentrationslager. Das Lager Ravensbrück» (PDF) (գերմաներեն). TU Berlin. Արխիվացված է օրիգինալից (pdf) 2006 թ․ հուլիսի 25-ին. Վերցված է 2009 թ․ փետրվարի 9-ին.
- ↑ «США депортировали в Германию бывшую надзирательницу женского концлагеря Равенсбрюк». Newsru.com. 20 сентября 2006. Արխիվացված օրիգինալից 2012 թ․ հունվարի 30-ին. Վերցված է 2009 թ․ հունվարի 23-ին.
{{cite web}}
: External link in
(օգնություն)|publisher=
- ↑ «Состав соединений и частей 2-й танковой Армии». Сайт группы Советских войск в Германии. Արխիվացված է օրիգինալից 2012 թ․ հունվարի 30-ին. Վերցված է 2009 թ․ հունվարի 23-ին.
{{cite web}}
: External link in
(օգնություն)|work=
- ↑ «Ausstellungen (Выставки)». Сайт мемориала Равесбрюк ((գերմ.)(ֆր.)(անգլ.)(իտալ.)(լեհ.)). Արխիվացված է օրիգինալից 2008 թ․ դեկտեմբերի 8-ին. Վերցված է 2012 թ․ հունվարի 30-ին.
{{cite web}}
: External link in
(օգնություն)CS1 սպաս․ չճանաչված լեզու (link)|work=
- ↑ «Sex Zwangsarbeit im KZ ist noch ein Tabu Thema» (գերմաներեն). Die Welt online. 14 января 2007. Արխիվացված օրիգինալից 2012 թ․ փետրվարի 2-ին. Վերցված է 2012 թ․ հունվարի 30-ին.
{{cite web}}
: External link in
(օգնություն)|publisher=
- ↑ «О документальном фильме Verleden Aanwezig». Moving image (անգլերեն). Արխիվացված օրիգինալից 2012 թ․ փետրվարի 2-ին. Վերցված է 2012 թ․ հունվարի 30-ին.
{{cite web}}
: External link in
(օգնություն)|work=
- ↑ «О фильме Die Frauen von Ravensbrück». IMDb (անգլերեն). Արխիվացված օրիգինալից 2012 թ․ հունվարի 30-ին. Վերցված է 2009 թ․ հունվարի 23-ին.
{{cite web}}
: External link in
(օգնություն)|work=
- ↑ «Шокирующее кино». Новости на Радио Культура. 2005 թ․ ապրիլի 7. Արխիվացված օրիգինալից 2012 թ․ հունվարի 30-ին. Վերցված է 2009 թ․ հունվարի 23-ին.
{{cite web}}
: External link in
(օգնություն)|publisher=
- ↑ По информации из каталога «Михель»
Արտաքին հղումներ
[խմբագրել | խմբագրել կոդը]- Mahn- und Gedenkstätte Ravensbrück Արխիվացված 2017-10-24 Wayback Machine
- Lagergemeinschaft Ravensbrück/Freundeskreis e. V.
- Österreichische Lagergemeinschaft Ravensbrück und FreundInnen
- Ravensbrück – Überlebende erzählen. Dossier der Bundeszentrale für politische Bildung
- «Фотоматериалы, собранные Чрезвычайной государственной комиссией по расследованию злодеяний немецко-фашистских преступников о военных преступлениях». Победа 1941-1945 — Государственные архивы РФ, хранящие фотодокументы о Великой Отечественной войне 1941-1945 гг. Արխիվացված օրիգինալից 2012 թ․ հունվարի 30-ին. Վերցված է 2009 թ․ հունվարի 23-ին.
{{cite web}}
: External link in
(օգնություն)|work=
- «Mahn- und Gedenkstätte Ravensbrück». Stiftung Bradenburg Gedenkstätten (գերմաներեն). Արխիվացված է օրիգինալից 2012 թ․ հունվարի 30-ին. Վերցված է 2009 թ․ հունվարի 23-ին.
{{cite web}}
: External link in
(օգնություն)|work=
- «Некоторые рисунки заключённых Равенсбрюка». Comité Vrouwenconcentratiekamp Ravensbrück (հոլանդերեն). Արխիվացված է օրիգինալից 2012 թ․ փետրվարի 2-ին. Վերցված է 2012 թ․ հունվարի 30-ին.
{{cite web}}
: External link in
(օգնություն)|work=
- «Życiorysy więźniarek obozu Ravensbrück» (լեհերեն) — Биографии женщин-заключённых лагеря Равенсбрюк. Արխիվացված է օրիգինալից 2012 թ․ հունվարի 30-ին. Վերցված է 2009 թ․ հունվարի 23-ին.
- «Открытка — «Валентинка», подаренная узнице лагеря Равенсбрюк С. П. Шевель». Музеи России. Արխիվացված օրիգինալից 2012 թ․ հունվարի 30-ին. Վերցված է 2009 թ․ հունվարի 23-ին.
{{cite web}}
: External link in
(օգնություն)|work=
- Свидетельские показания бывших узников концлагеря Равенсбрюк на сайте «Хроники Террора»
Վիքիպահեստն ունի նյութեր, որոնք վերաբերում են «Ռավենսբրյուկ» հոդվածին։ |
|
- 1930-ականների հիմնադրումներ Գերմանիայում
- Գերմանիայի պատմություն
- Գերմանիայի տեսարժան վայրեր
- Երրորդ ռայխի մահվան ճամբարներ
- Համակենտրոնացման ճամբարներ
- Հոլոքոստ
- Հոլոքոստը Գերմանիայում
- Հոլոքոստի թանգարաններ
- Մարդկության դեմ ուղղված հանցագործություններ
- Նացիստական Գերմանիա
- Նացիստական Գերմանիայի համակենտրոնացման ճամբարներ