Վիքիպեդիայից՝ ազատ հանրագիտարանից
Տերևաոլորներ (լատ.՝Tortricidae), թիթեռների ընտանիք, Tortricoidea վերնաընտանիքի միակ ներկայացուցիչը[1]։
Թևերի բացվածքը 0,8-4 սմ է․ առջևի զույգ թևերը հաճախ խայտաբղետ են, ետինները՝ մոխրագույն։ Կնճիթիկը թույլ է զարգացած, բայց թիթեռները կարողանում են ծծել բույսերի հյութը և ջուրը։ Թրթուրները շարժուն են, 16-ոտանի (ունեն 5 զույգ փորային ոտիկներ), 0,9-2 սմ երկարությամբ, ապրում են սովորաբար խողովակաձև կամ ծրարաձև ոլորված տերևների մեջ (այստեղից՝ անվանումը), սնվելով՝ հաճախ անցքեր են բացում տերևներում, բողբոջներում, ծաղիկներում, պտուղներում և այլն։
Հայտնի է տերևաոլորների ավելի քան 10 000 տեսակ[2]։ Տարածված են ամենուրեք, հատկապես Ասիայի արևադարձային անտառներում։ Բազմաթիվ տերևաոլորներ բույսերի վտանգավոր վնասատուներ են։ Հայաստանում՝ տարածված վնասատու տերևաոլորներից են ամենակեր, վարդենու, կաղնու կանաչ տերևաոլորներ, խնձորենու, կաղնու, սալորենու պտղակերները, սոճու շիվապատատը, խաղողի ողկուզակերը և այլն։
Այս հոդվածի կամ նրա բաժնի որոշակի հատվածի սկզբնական կամ ներկայիս տարբերակը վերցված է Քրիեյթիվ Քոմմոնս Նշում–Համանման տարածում 3.0 (Creative Commons BY-SA 3.0) ազատ թույլատրագրով թողարկված Հայկական սովետական հանրագիտարանից (հ․ 11, էջ 669)։
|