Soong Ching-ling
- Þetta er kínverskt nafn: kenni- eða fjölskyldunafnið er Soong, eiginnafnið er Ching-ling.
Soong Ching-ling 宋庆龄 | |
---|---|
Soong Ching-ling árið 1937. | |
Heiðursforseti Alþýðulýðveldisins Kína | |
Í embætti 16. maí 1981 – 29. maí 1981 | |
Varaforseti Alþýðulýðveldisins Kína | |
Í embætti 27. apríl 1959 – 17. janúar 1975 | |
Persónulegar upplýsingar | |
Fædd | 27. janúar 1893 Sjanghæ, Kína |
Látin | 29. maí 1981 (88 ára) Beijing, Kína |
Stjórnmálaflokkur | Kuomintang (1919–1947), Kínverski kommúnistaflokkurinn (1981) |
Maki | Sun Yat-sen (g. 1915; d. 1925) |
Háskóli | Wesleyan-háskóli |
Starf | Stjórnmálamaður |
Soong Ching-ling (27. janúar 1893 – 29. maí 1981) var kínverskur stjórnmálamaður. Hún var þriðja eiginkona byltingarleiðtogans Sun Yat-sens sem leiddi Xinhai-byltinguna árið 1911. Soong var oft kölluð „frú Sun Yat-sen“ eða „móðir lýðveldisins Kína“. Soong Ching-ling var ein af Soong-systrunum, sem allar voru giftar kínverskum áhrifamönnum og höfðu talsverð áhrif á kínversk stjórnmál fyrir árið 1949. Eldri systir hennar, Soong Ai-ling, var gift auðjöfrinum H. H. Kung og sú yngri, Soong Mei-ling, var gift Chiang Kai-shek, samstarfsmanni Sun Yat-sens og síðar forseta Lýðveldisins Kína á Taívan. Maóstar sögðu um systurnar: „Ein elskaði peninga, önnur völd og sú þriðja landið sitt.“[1]
Soong gegndi ýmsum mikilvægum embættum eftir stofnun Alþýðulýðveldisins Kína árið 1949. Hún var varaforseti Kína (1949–1975) og varaformaður fastanefndar kínverska þjóðþingsins (1954–1959, 1975–1981). Soong ferðaðist um heiminn snemma á sjötta áratugnum og birtist í umboði Kínverja á ýmsum alþjóðaviðburðum. Í menningarbyltingunni var Soong hins vegar harðlega gagnrýnd.[2] Eftir að Liu Shaoqi forseti var drepinn í hreinsunum Maós árið 1968 gerðust þau Soong og hinn varaforsetinn, Dong Biwu, í reynd þjóðhöfðingjar Kína til ársins 1972,[3] en þá var Dong útnefndur forseti til bráðabirgða. Soong lifði menningarbyltinguna af en birtist æ sjaldnar opinberlega eftir árið 1976. Soong var formlega þjóðhöfðingi Kína sem formaður fastanefndar kínverska þjóðþingsins frá 1976 til 1978. Þegar heilsu Soong hrakaði í maí 1981 var henni veittur titillinn „heiðursforseti Alþýðulýðveldisins Kína“.
Tilvísanir
[breyta | breyta frumkóða]- ↑ Sandy Donovan, "Madame Chiang Kai-Shek: Face of Modern China", Compass Point Books, 2007
- ↑ Israel Epstein, Woman in World History: The Life and Times of Soong Ching-ling, bls. 551.
- ↑ Leaders of China (People's Republic of China), zarate.eu from 11 May 2017, retrieved 12 July 2017