Cultur de vasos de bandas
La cultur de vasos de bandas es un orizon major de la eda neolitica european, florinte sirca 5500 a 4500 aec. Lo es comun cortida a LBK (de la deutx Linearbandkeramik) e es ance conoseda como la cultur de vasos linial. Lo es un parte de la cultur danubian descriveda par V. Gordon Childe.
La evidentes la plu densa per la cultur es sur la Danubio media, la Elbe alta e media, e la Reno alta e media. Lo represente un aveni major en la sperde comensante de cultiva en Europa. La seramica pos cual lo ia es nomida es composada de tases, boles, vasos, e carafas simple, sin manicos. En un fase plu tarda, los ta ave botones, botones perforada, fundas, e colos.
Locas importante inclui Nitra en Slovacia; Bylany en Txesco; Langweiler e Zwenkau en Deutxland; Brunn am Gebirge en Osteraic; Elsloo, Sittard, Köln-Lindenthal, Aldenhoven, Flomborn, and Rixheim longo la Reno; Lautereck e Hienheim longo la Danubio alta; e Rössen e Sonderhausen sur la Elbe media.
Du varias de la cultur temprana es reconoseda:
- La Cultur de vasos de bandas ueste, developada a la Danubia media, incluinte Magiar ueste, e estendeda a la Reno, Elbe, Oder, e Vistula.
- La cultur de vasos de bandas este, florinte en Magiar este.
Fases media e tarda ia es ance definada. En la fase media, la cultur ia comensa enclui la cultur de Bug-Dniester, e ia comensa fabrica vasos de notas musical. En la fase tarda, la cultur de vasos de puntas ia move a norde longo la Vistula e Elbe.
Alga cultures ia recambia la cultur de vasos de bandas tra sua estende, ma sin un coresponde clar entre sua varias e la cultures recambiante. La mapa de cultures es, en loca, complicada. Alga de la cultures seguente es la cultures de Hinkelstein, Großgartach, Rössen, Lengyel, Cucuteni, and Boian.
Nom
La nom "cultur de vasos de bandas" deriva de la tecnica de decora de la vasos, pd vasos de bandas pintada. Car la cultur de Startxevo ia es plu temprana ca lo, la investigores temprana ia xerca per asendentes ala. Multe de la vasos de la cultur Startxevo es decorada con bandas e spirales de pinta. La cultur de vasos de bandas" pare imita e boni los con bandas pintada.
Jeografia e cronolojia
La LBK ia comensa longa la Danubia media en Boemia, Baiern, Moravia, e Magiar, e ia sperde tra sirca 1500 km longo la rios en 360 anios. La rapidia de estende ia es sirca cuatro km en cada anio, cual no pote es nomida un invade o onda en normas moderne, ma pare rapida comparada con tempo arceolojial.
La LBK ia es alga distante de areas costal, pd lo no es videda en Danmarc o la costas de Deutxland e Polsca, o la costa de la mar Negra en Romania. La cultures de la costas norde ia resta como mesolitica, esplotante la corentes multe rica de salmon atlantica. On ave consentras minor de LBK en Nederland e a la bocas de la rios Oder e Vistula. Lo pare ce la neoliticas e la mesoliticas no ia esclui lunlotra. Alga inovas de la decora de vasos es fada par mesoliticas imitante la neoliticas, ci ia imita ance la metodos de cultiva.
Multe datas de carbona 14 ia es otenida per LBK, cual permete analises statistical. Un estima es ce la trovas es entre 5600 e 4750 aec (con un sertia de 95.4%). Ma lo es un estima; datos de Beljia sujeste ce la LBK ia dura tan tarda como 4100 aec.
La LBK no es la sola cultur cultivante a esta tempo de Europa. Per esta razona, on debe distingui la LBK de la neolitica jeneral, fada par divide la neolitica de Europa en fases:
- Neolitica temprana, 6000-5500: la aveni de la cultures cultivante plu sude, pd la cultur de Startxevo e la cultur de Bug-Dniester.
- Neolitica media, 5500-5000: La cultur de vasos de bandas temprana e media.
- Neolitica tarda, 5000-4500: La cultur de vasos de bandas tarda e la cultures derivada.
La fase final no es la fini de la neolitica, cual es la cambia de la neolitica e la eda de bronze. La stilos de vasos de la LBK permete un divide de sua tempo. Per esemplo:
- Temprana: la LBK este e ueste, orijininte a la Danubio media.
- Media: la vasos de notas musical, cual es comun en la estende la plu grande de la cultur, en cual varias rejional apare, incluinte la cultur de Bug-Dniester tarda.
- Tarde: la fase de la vasos de puntas.
Economia
La popla de la LBK ia abita terazas rial e prosima a la rios. Los ia identifia rapida la rejiones de loes fertil. Los ia cultiva un colie de plantas en jardines peti. La plantas ia inclui:
Alga spesies, plu rara, ia es posible no plu ca malerbas per esta cultur:
- Hordeum, orzo
- Panicum miliaceum, milio
- Secale cereale segal
- Vicia ervilia, visia amarga
- Vicia faba, fava de visia
Canaba (Cannabis sativum) e lino (Linum usitatissimum) ia dona la popla de LBK la materias ru per cordas e stofa, cual ia es fabricada a casa. De papavera (Papaver somniferum), introduida plu tarda de la Mediteraneo, ia es posibe usada como un medisin paradole.
La popla de LBK ia es ance elevores de bestes, con boves favorida, an si capras e porcos es ance trovada. Como cultivores oji, los ia usada la granes plu bon per se mesma e la granes min bon per la animales. La canes ia es ance presente, ma no tan multe como plu tarde. Los ia aumenta sua dieta par xasa servos e senglares en la foresta abrida de Europa sentral de acel eda.
A la comensa de la LBK, no moves grande de poplas ia es trovada. La cuantia de popla ia es multe plu grande alora, un aveni nomida la cambia demografial de la neolitica, cual produi un popla stable de grupos peti juntada cual intercambia migrores entre xasores-coliores e orticulturistes. La LBK alora ia ave un crese de la cuantia de nases, la resulta de un diminui de la periodo de teti de enfantes. Ma a la fini de la LBK, la crese de cuantia de popla ia desapare causada par un crese de la cuantia de mores, posible de la patojenes comunicada par multe plu contata sosial.
La popla nova ia es fisada asta la capasia de la tera, e alora la cuantia de popla tro multe ia move a areas min abitada. Prosiminte la fini de la cultur, an si multe tera per cultiva ia es ancora desponable, la cuantia de popla ia cade. Lo pare ce la boves ia es la parte la plu importante de sua economia, e la tera per pastori ia ateni la limita. Carne de bove e produidas de lete ia es la parte la plu grande de la dieta de la popla de LBK, comparada ce la depende sur cultiva en Asia sude-ueste.
Utiles
Petra focosa e osidiana ia es la materias xef usada per puntas e laminas. On no ia usa metal. Los ia colie gran con falxetas fabricada par inserta laminas de petra en la interna de pesos curvada de lenio. Un util, un axia spesa (en engles "shoe-last celt"), ia es fabricada de un lamina siselin molida, liada a un manico. Los ia es usada per cade arbores e fabrica con lenio. Elicadores ia es fabricada con puntos de petra liada a bastetas cual pote es jirada. Raspadores e cotelas es fasil trovada. La usa de pesetas de petra focosa (pd microlitos), ia desende de la eda mesolitica, ma petras raspada es un indica de la neolitica.
Esta materias indica un spesiali de labora e comersa. La petra focosa ia veni de Polsca sude; la osidian ia veni de la montes de Bukk e Tatra. Colonias en esta rejiones ia spesiali en mina e fabrica. La produidas ia es esportada a tota otra rejiones de LBK, cual ia debe ave alga cosas per intercambia. Esta es un razona forte per pensa ce los ia ave un unia etnica entre la locas sperdeda de la cultur.
Casas
La unia de abita ia es la casa longa, un strutur retangulo, 5.5 a 7.0 metres larga e de un longia variante. Per esemplo, un casa a Bylany ia es 45 metres longa. La mures esterna ia es de vim e arjila, a veses alternante con troncas fendeda, con tetos apoiada e palida, suportada par linias de tre palos traversante.
La opina plu comun es ce esta casas no ave fenetras e sola un porte. La porte ia es locida a un fini de la casa. Interna, la casa ia ave un o du mures cual crea asta tre areas. Interpretas de la usa de esta areas varia: Labora pote es en la fini con la porte, per lumina, la media ia es usada per dormi e come, e la fini la plu distante de la porte pote es usada per reserva gran. Un otra interpreta sujeste ce la interna ia es divideda en areas per dormi e per vive comun, e un enclui a la fini a retro per manteni animales.
Fosos ia core longo parte de la mures esterna, spesial a la fini encluida. La intende per sua usa no es conoseda, ma los no es probable per defende, car los no es multe profonda. Plu probable, la fosos ia colie acua de pluve e de cloaca. Un casa grande con multe persones e animales ta ave un sistem de drena. Posible, on ave un fini a cual pluve ia es colieda, e un otra fini (a via de la porte) ia es la loca de animales e latrinas
Dejetadas ia es estraeda e poneda en cavetas esterna. La labora cual produi dejetadas, como la prepara de peles e produi utiles, ia es fada estra la casa.
Casas longa ia es colieda en viletas de sinco a oto casas, separada par sirca 20 metres en un tota de sirca 300 a 1250 acres. Viletas visina formida colonias, alga tan densa como 20 per 25 km2, otras tan rarida como un per 32 km2. Esta strutur de colonias no suporta la opina ce la popla de la LBK no ave un strutur sosial o ia es anarcias. Ma la strutur resta oscura e abri a interpreta. Un casa longa ia pote suportada un familia estendeda, ma la longia de vive ia pote preveni plu ca du jeneras. La casas ia nesesa tro multe labora per es la abitas de familias solitar; donce, casas comunial es la divina la plu bon.
Escavas a Oslonki en Polsca ia revela un colonia grande e fortida (de sirca 4300 aec, pd LBK tarde), cual ia covre un area de 4000 m2. Cuasi 30 casas longa e plu ca 80 tombas indica ce lo ia es un de la colonias la plu rica en tota Europa sentral. La casas ia es entre sete e 45 metres longa en entre sinco e sete metres larga. Los ia es construida con palos enorme encluida par vim e arjila.
Asede fasil a acua pur ia es ance nesesada, cual es u otra razona perce colonias ia es en areas basa prosima a acua. Un cuantia de posos de la eda ia es descovreda, con un fore de palos construida un strato a un ves cuando la stratos presedente ia afonda en la poso.
Un vista temprana ia vide la cultur de vasos de bandas como un vive pasosa. Pos alora, colonias con sercas de palos e osos danada par armas ia es descovreda, cual sujeste a min alga violentia. Un studia ia trova la sceletos de 26 adultes e enfantes ci ia es matada par colpas a sua testas de armas tipal de la neolitica, o par flexas. Ma la plu de colonias conoseda no ave indicas de violentia.
Vasos ia es trovada en la casas longa e ance en la tombas. Analise de esta vasos indica de cada casa ia ave sua propre tradision. La aveni de vasos xef en tombas de femes indica ce la femes de la casa longa probable ia fabrica la vasos. Par esamina la cualia, linias de jenealojia pote es definada. Lo es posible ce la cultur ia es endogama e matrilocal, pd persones ia sposi con persones de otra viletas e ia vive a la casa de la sposa.
Relijio
La detalios de sistemes de crede en un cultur preistorial no es comprendeda completa. Ma la studia siensal de cosas cultural cual survive pote condui nos a alga posibles:
La idea de la matre-diva es la plu comun sujeste per la neolitica de asia sude-ueste, la sivilia de la Ejean, e Europa. La iconografia ia es eritada de la paleolitica: La cultur Gravetian ia introdui lo a la estende de la futur LBK de Asia ueste e Rusia sude, de do lo estende se tra Europa, cual ia es abitada par la umanas cromagnon e ia es la fonte de multe obras de arte, como la Venus de Willendorf.
Con la traversa a la neolitica, un asentua sur la misterio de jenera e nase ia continua domina la relijios de Europa. No credes vera nova ia es introduida a Europa par la LBK.
Marija Gimbutas, un arceolojiste famosa per sua laboras sur la preistoria de Europa, ia presente un studia de la iconografia e credes de Europa neolitica, incluinte la LBK. El ia segue la unia de temas de reprodui en ojetos cultural cual otras no suspeta de tal temas. Per esemplo, tombas de la LBK, cual ia es foreda con petras, arjila, o jeso, pote es videda como ovos: la mor reveni a la ovo e ala espeta un renase.
La esiste de tal cavetas a la mesma eda cuando femes e enfantes ia es enterada su la solos de casas sujeste un varia de credes relijiosa, e la usa de e seni e entera ance. Alga de la scultetas no ia es de femes ma es androjine. Posible la crede de europeanes de cualce cultur ia es sempre complicada.
Costumes funeral
La neolitica temprana en Europa ia inclui la entera de femes e enfantes su la solos de casas. La corpos de omes adulta ia es asenta. Probable, la cultur neolitica ia ave costumes diferente per omes e femes, e la femes e sua enfantes ia es multe importante en sua credes sur la casa.
Estas continua asta sirca 4000 aec. Ma en la Balcanes e Europa sentral, la semetero ia comensa es usada sirca 5000 aec. semeteros de LBK ia conteni de 20 a 200 tombas, ordinada en grupos cual pare es fundida sur relata. Mases de femas de cualce eda ia es incluida. E seni e entera ia es praticada. La enterada ia es poneda en un posa flexeda en cavetas foreda con petras, jeso, o arjila. Semeteros ia es prosima a la areas de abita, ma ia es distinguida de los.
La presente de benes de tomba indica ce los difere entre seso e domina. La tombas de omes ia inclui axias, utiles de petra focosa, e mone o joalas de concas de spondilos. La tombas de femes ia conteni multe de la mesma cosas, ma ance la plu parte de la vasos e contenadores de ocer. La benes ia es interpretada como donadas a la mor o sua propre poseses.
Sola sirca 30% de la tombas ave benes. Esta sujeste ce un difere en domina esiste, ma la natur de la distingui no es conoseda. Si a benes ia es donada, alora alga ia es plu onorada ca otras; si los ia es poseses, alora alga ia es plu rica ca otra.
Esta tradisiones es contrastada con la tombas coletiva, cual sujeste famiones, epidemicas, o geras.