Grebbeberg

Dit artikel is in mierder Limburgse dialekte gesjreve. Perbeer estebleef waal mer ei dialek per alinea aan te hauwe.

De volgende sectie van dit artikel is gesjreve in 't Mestreechs.

Geziech op de Grebbeberg vaanoet 't zuidweste. Gans rechs zuut me Wageningen, get mie nao 't midde de steilen ooskant.

De Grebbeberg is 'nen heuvel in de Nederlandse gemeinte Rhenen (provincie Utrech), gelege aon de grens mèt Gelderland tösse de stei Rhenen en Wageningen. Heer maak deil oet vaan d'n Utrechsen Heuvelrögk, boe 't de zuieleksten heuvel vaan is. D'n heuvel is 52 meter hoeg vaanaof zieniveau. In 't zuie struimp de Nederrijn delaanks; door erosie is de zuidkant zier steil gewore. De weskant is deils bebouwd; hei vint me oonder mie de zoo Oudehands Dierenpark. D'n ooskant is veural aon de basis rillatief steil (7%) en daorum geleef bij fietsrenners. Daoneve heet dit stök 'n hoege netuurweerde en gief 't dao bezundere flora. In mei 1940 voont hei de slaag um de Grebbeberg plaots boebij 't Nederlands leger de Pruse drei daog laank wis tege te hawwe. E monumint en 'n iereveld bovenop de berg rappelere dao-aon.

Gesjichde

De volgende sectie van dit artikel is gesjreve in 't Heëlesj.

D'r naam va d'r Grebbeberg is aafgeleid va "Grebbe" of "Bisschop Davidsgrift", 'ne vuurloper van 't Valleikanaal, dat hüts durch d'r Geldesje Vallei sjtruimt. Dit kanaal kam oet i g'n Nederrijn, aa g'n voot va d'r heuvel.

Archeologische forsjóng hat aagetoeënd dat d'r Grebbeberg al 2.000 v. Chr. fortificaties houw. 't Guëf 'ne ringwal mit 'n druëge grach, d'r "Heimenberg". Dees sjtamt vermuijelig oet d'r zeëvenden ieëw. Wat de functie van dit boewwirk woar, is nag unbekank. 't Kan zich hangele um 'n fortificatie va de Franke teëge de Frieze, meh dit kan óch good angesjum zing.