Algarbe
L Algarbe ye ua region ó ounidade territorial para fines statísticos de nible II (bccertual que cumprende l çtrito de Faro.
Lhemita a norte cul Alanteijo, a lheste cun Spanha (Andaluzia), a sul i a oeste cul Ouceano Atlántico. Ten ua ária de 4 988,56 Km² i ua populaçon stimada an 434 023 habitantes (2009).[1] De la region fázen parte 16 munecípios.
L Algarbe custitui hoije ua de las regiones turísticas mais amportantes de Pertual i de la Ouropa. L sou clima temperado mediterránico, caratelizado por Ambiernos amenos i cúrtios i Beranos lhongos, calientes i secos; las augas tépidas i calmas que banhan la sue cuosta sul; las sues paisaiges naturales; l patrimonho stórico i etnográfico i la sue deliciosa i saudable gastronomie son atributos qu'atraen milhones de turistas nacionales i strangeiros todos ls anhos i que fázen de l Algarbe ua de las regiones mais zambolbidas de l paíç. L Algarbe ye hoije la terceira region mais rica de l paíç, cun un PIB per capita de 87% de la média ouropeia.
Stória
[eiditar | eiditar código-fuonte]Zde ls albores de l reino, l Algarbe custituiu ua region bien delimitada i andebidualizada, nun solo an tenermos geográficos mas tamien de l punto de bista eidantitairo, cun caratelísticas stóricas, climáticas, etnográficas, arquitetónicas, gastronómicas i eiquenómicas mui própias.
Durante seclos, l Algarbe fui punto de passaige para bários pobos, ancluindo ls tartessos, fenícios, griegos i cartagineses. Fizo parte de l Ampério Romano, ostentando cidades relebantes cumo Balsa i Ossónoba, i durante cerca de cinco seclos stubo sob l domínio de ls pobos eislámicos, atingindo un eilebado splendor cultural i eiquenómico. Treminada la reconquista de la region durante l reinado de D. Fonso III, l'antigo Al-Gharb mourisco fui ancluído ne l reino crestiano de Pertual, entrando nua cierta decadéncia que serie anterrompida yá ne l seclo XV pula odisseia de la sploraçon de la cuosta africana i de la cunquista de las praças marroquinas, sob l comando de l Anfante D. Anrique. Cul fin de la persença pertuesa nas praças africanas, la region antrou outra beç nua cierta decadéncia, acentuada pula çtruiçon amposta pul terramoto de 1755. Mais tarde, l Algarbe ampeçou l seclo XX cumo ua region rural, periférica, cun ua eiquenomie baseada na cultura de fruitos secos, na pesca i na andústria cunserbeira. Assi i to, a partir de la década de 1960, dá-se la spluson de l'andústria de l turismo, mudando por cumpleto la sue strutura social i eiquenómica.
Atualmente, l turismo custitui l motor eiquenómico de l Algarbe. L'antiga porbíncia tradecional ten alguas de las melhores praias de l Sul de la Ouropa, i cundiçones scepcionales pa la prática d'atebidades i çportos al aire lhibre.
Cidades Percipals
[eiditar | eiditar código-fuonte]Faro, Portimao , Lagos , Tavira , Albufeira e Loule.
Refréncias
[eiditar | eiditar código-fuonte]- ↑ «População residente (n.º) por local de residência, sexo e grupo etário (por ciclos de vida); anual (2009)». Instituto Nacional de Estatística. Cunsultado an 3 de febreiro de 2011