Fritz Moen
| Fritz Moen | |
 | |
| Statsborgarskap | Noreg |
| Fødd | 17. desember 1941 Sarpsborg kommune |
| Død | |
| Yrke | selger |
| Språk | norsk |
| Straff | bot, bot, fengselsstraff, fengselsstraff, sikring |
| Fritz Moen på Commons | |
Fritz Yngvar Moen (17. desember 1941–28. mars 2005), fødd i Sarpsborg og avliden i Oslo, er kjend for å ha vorte dømd av norsk domstol for to drap som han skulle ha gjort i 1970-åra, men som han seinare vart frikjend for etter at saka vart teke opp på nytt. Etter at ein annan hadde vedgått å ha gjort drapa, er det ikkje tvil om at Moen vart uskuldig dømd. Til saman vart Moen dømd til 21 år i fengsel og inntil 10 år med sikring (dåtidas regler for det som no heiter forvaring) for dei to drapa. Han sat 18 år og 6 månader i fengsel, og måtte dessutan stette sikringsvilkåra resten av levetida. Saka har gått inn i rettssoga under nemninga Moensaka, og vert halde fram som eit særs alvorleg døme på såkalla justismord.
Moen var fødd døv, og var særs dårleg til å uttrykkje seg forståeleg, men vart rekna for å ha normal intelligens og evne til å hugse godt. Han var lam i høgre armen og sterkt skada i ansiktet etter ei ulukke med moped i 1966. Våren 1978 vart han dømd for å ha teke livet av Torunn Finstad, og hausten 1981 for å ha drepe Sigrid Heggheim. Då den siste domen vart sagt, uttalte forsvarsadvokaten hans, Olav Hestenes, i rettssalen: «For første gang i skranken tillater jeg meg å si at det er begått justismord.»
Etter at privatetterforskar Tore Sandberg hadde engasjert seg sterkt i saka på slutten av 1990-talet, vart saka teke opp att, og Moen vart frikjend for det eine drapet i 2004, og for det andre i 2006. I desember 2005 hadde ein 67 år gamal mann vedgått på dødsleiet å ha gjort båe drapa.
Bakgrunnsstoff
[endre | endre wikiteksten]
- NOU 2007: 7 Fritz Moen og norsk strafferettspleie
- Tore Sandberg. 2007. Overgrepet : justismordene på Fritz Moen. Oslo: Damm ISBN9788202285302